حنتعامل ازاي
{١} الحياة فيها ثلاث حالات : جيد ، سيء ، مش فارق
لما تتعاملي مع شريكك النرجسي حتتعاملي كالآتي :
١- في حالة “جيد” : حاجة كويسة حصلت معاكي زي اخدتي علاوة من شغلك ، اترقيتي ، حد قالك مجاملة لطيفة عن لبسك او اي حاجة كويسة فيكي ، او حتى يومك كان جيد :
القاعدة : لا تشاركي اي شيء جيد يحصل لك مع شريكك النرجسي ، عارفة ان الكلام دة غريب وممكن البعض يحس انه فيه تطرف ،لكن ببساطة حقولك راجعي كدة اخر خمس مرات انتي قلتي له علي حاجة كويسة حصلت لك او اي انجاز او اي حاجة فرحتك ، سواء كانت حاجة كبيرة زي ترقية في العمل او اقل حاجة زي انك اتعلمتي اكلة جديدة مثلا ، ايه كان رد فعل زوجك ؟ اكتبي الخمس مرات اللي فاتوا ، الخمس احداث سعيدة واكتبي قصاد كل حدث هو استجابته كانت ايه ، وبعدين تعمدي انك تعملي دة في الكام يوم اللي جايين وتشاركيه كام حدث جيد حصل معاكي واكتبي كل مرة رد فعله
فعليا انا معرفش حتكتبي ايه ، لكن اذا زوجك نرجسي فانا بقولك ان على الاقل ٤ من الخمسة ان مكانش الخمسة كلهم استجابة غير لطيفة وممكن فيها سخرية وتقليل زي ( ترقية فلوس ولا اي كلام ، اصلهم عالم مش فاهمة حاجة ، اللي في سنك اخد عشر ترقيات بعد دي ، ….. ) او تجاهل صريح و تام لكي ( نادر جدا لو الزوج بيشجع وبيكون لفايدة طبعا حتعود عليه زي الفلوس او استغلال منصب الزوجة ، او خايف من تهديد منصبها له اصلا ) .طيب بناء على الكلام دة انتي ليه تقولي له الاخبار السارة وليه تشاركيه اللحظات السعيدة وانتي متأكدة انه حيفسدها ؟ هنا دكتور راماني بتحط احتمالات لانتي ليه بتروحي تشاركيه افراحك :
١- انك عندك امل ان المرة دي حتكون مختلفة ، لانك شايفاها اخبار حلوة واي حد لازم يشوفها حلوة فكل مرة تقولي يمكن يشوفها حلوة
٢- احتمال سيء هو انك تكوني شايفة انك متستحقيش الحدث الجيد اللي حصل لك فتروحي واخداه للشخص الوحيد اللي انتي عارفة انه حيفسده .
٣- انك تكوني وصلتي انه الاستهزاء بيكي من النرجسي اصبح مألوف بالنسبة لك ويكون تقليله واستهزاؤه بترقيتك مماثل لافعال ابوكي او امك وانتي صغيرة لما كانو يسخروا ويقللوا من نجاحاتك او هواياتك . الشيء السيء هنا انه فيه حاجة مرضية بشكل منحرف عن طريق سلوك معين بيتكرر بنفس الشكل في كل مرة ولو كان السلوك دة محرج او فيه استهزاد او تجريح ، ففي الحالة دي انتي رايحة تقولي له الاخبار الجيدة عشان تاخدي جرعة التهزيء اعزكم الله للاسف بعض ضحايا النرجسي بتوصل لكدة لكن اظن قليل جدا منهم . المهم ان دة طبعا مؤذي جدا لها ولذاتها وبيعرضها للامراض فوق ما النرجسي بيعمل فيها .
خدي بالك ان احلامك وابداعاتك كمان مش مفروض تشاركيها من النرجسي لانه حيفسدها وحيحبطك وحيمنعك اصلا تنفذيها ، اشتغلي في صمت .
طيب نعمل ايه ؟
اكتبي في ورقة اسماء الناس وسميها ناس الاخبار الجيدة ( المشجعين والمساندين و الناس اللي تعتقدي انهم مؤمنين بيكي ) دول ممكن يكونوا اصدقائك ، عيلتك ، زمايلك في الشغل ، صاحباتك في النادي ، في المسجد ، دول اللي ممكن تستعوضي بيهم عن النرجسي ولما يكون عندك اخبار كويسة قوليها لهم الاول ، لما تشاركيهم نجاحاتك واحلامك حتدي نفسك فرصة تستمتعي بالخبر الجيد وتدي نفسك قيمتها بانك تتشاركي اخبارك مع حد يقدرها ويقدرك ، وفي الحالة دي حتعملي ايه مع شريكك ؟ اما انك متقوليش اصلا الخبر ( لو مش فارق انه ممكن يعرف من برة ويعمل مشكلة ) او انك تقولي بعد ماتكوني خلاص شاركتي اصحابك وانبسطتي .


{٢} في حالة “سيئ” زي مثلا مشاكل في العمل ، حد عيان في عيلتك ، خناقة مع صاحبتك ، مشكلة في العربية ، درجات وحشة في امتحان ابنك ، طبعا الاخبار السيئة دي بيكون وقعها اسوأ بكتير من الاخبار الجيدة بالنسبة لردود فعل النرجسي ، وتلاقيه كأنه ماصدق لقى حاجة يؤنبك ويهزأك عليها ، طيب حنعمل ايه؟
القاعدة : نفس الكلام متشاركيهوش الاخبار السيئة زي ما متشاركيهوش الاخبار الجيدة ، ولو حتعرفيه حتكوني مجهزة لدة
الاخبار الوحشة بتتصنف ثلاث اصناف
١- خبر يخصك وبيسبب لك انتي شخصيا ازعاج (مشكلة في الشغل ، زعل مع صاحبتك ، المواصلات زحمة او الطريق واقف)
٢- خبر يخص الاسرة وبالتبعية حيأثر على النرجسي ( سيبتي الشغل ، السيارة حصل فيها مشكلة ، غسالة الاطباق عطلت ، المدرسة روحت الولد لسوء تصرفه )
٣- اخبار وحشة بتبرز ضعفك بشدة ( مرض عضال في احد افراد الاسرة ، وفاة حد بتحبيه جدا ، انتي نفسك مرضتي )
كل خبر من دول حنتعامل معاه بشكل مختلف :
الاول : بما ان النوع دة من الاخبار بيحصل يوميا وبيخصك لوحدك ، اللي هو احنا بنحتاج نحكي يومنا لحد ، وبما ان الحد دة للاسف نرجسي ومش حيديكي المساندة ولا المساعدة المطلوبة بل بالعكس ممكن يسمعك كلمتين ملهمش لازمة وسواء سكت وقعد يبص في موبايله او التلفزيون وتجاهل كلامك او اتكلك كلام سخيف فدة زود سوء اليوم وزود احباطك عشان كدة الحل الامثل انك تحكي يومك لحد تاني من الناس اللي حددتيهم للاخبار السارة
الثاني : الخبر هنا حيمسه خاصة ماديا ، لو خبطة سيارة او غسالة باظت اي حاجة تتعلق بيه حتكوني مضطرة تقولي له الخبر ، النقطة هنا انك تستعدي لكذا حاجة في الحالة دي ١) انك تقولي فورا ومتضيعيش الوقت ومتكونيش خايفة من رد فعله وتقولي الخبر بدون مقدمات وفي جمل مختصرة لانه كدة كدة حينفجر ،فوفري على نفسك مجهود المقدمات والكلام الكتير

الباقي في اول تعليق


اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11
الكتب
should i go or should i stay