ازاي تمسكي زمام المناقشة مع النرجسي وتوقفي اللف والدوران اللي بيعمله معاكي
تيودور بيقول ان دة اسلوب تلاعب قوي مصمم لاجهادك واحباطك وطبعا ياخد بيه وقود نرجسي جيد ،
طبعا انتي بتكوني عايزة توصلي بالمناقشة لنتيجة مرضية وفي نفس الوقت عايزة النرجسي يشوف الغلط اللي عنده ويصلحه ،لانك اذا قدرتي تحرزي تقدم في المناقشة ممكن تخليه يعيد تفكير في موقفه وممكن يحاول يصلحه ودة طبعا هو مش حيسمح بحصوله ، النرجسي خبير في اللف والدوران وطبعا الاستعباط وقلب الحقائق واللامنطقية ، وتلاقيه بيقول كلام ملوش معنى وغريب وملوش علاقة بالموضوع . ودة طبعا اول مايحصل لازم تفهمي انه عايز يثير مشاعرك وياخد منك وقود ، والطريقة اللي بيعمل بيها كدة بتكون سهل تقفشيها لانه بيستخدم فيها كلمتين (دائما و ابدا ، اللي هو انتي دايما تعملي كذا او انتي ابدا عمرك ماعملتي كذا ) وطبعا يقلب الحقايق وانتي تبقي اصلا اللي عايزة تقولي له الجمل دي و تبقي حتموتي وتوضحي الحقيقة وعايزة تتناقشي وتبدأي تدخلي في جدال وهو يلففك فيه زي ماهو عايز ويستثيرك وفي الاخر برضه ياخد الوقود . طيب تواجهي الكلام دة ازاي وتتحكمي انتي في المناقشة وتبوظي له اسلوب التلاعب دة
١- مش معنى ان النرجسي بيقول حاجة وهو يبدوا انه مقتنع بيها جدا وبشكل سلطوي ان كلامه صحيح ، ومش معنى انه بيعيد ويزيد في نفس الكلام انه صح ، وخصوصا انك عارفة انه غلط من اول مرة قالها فمش مفروض تتهزي وتصدقيه مهما كررها لان هو دة اللي هو عايزه ، هو عايزك تقبلي كلامه عشان يلغي مخك وتفكيرك تماما ويشوش افكارك وتتقييمك لنفسك وفي معظم الوقت بيكسب المناقشة بالتخويف والتبريء ، يبقى انتي مفروض تثبتي على الصح اللي انتي عارفاه ومتغيريش موقفك لمجرد انه متمسك بموقفه بقوة و متخليش خوفك منه يأثر على موقفك بس دة مش معناه انك تدخلي في جدال معاه عشان تثبتي انك صح لا انا عايزاكي تثبتي على اعتقادك انك صح ومتتهزيش
٢- اوعي تفقدي اعصابك وتبدأي تتعصبي نتيجة الاجهاد اللي بتسببه المناقشة دي لان هو عايز كدة، لو رزعتي الباب او رميتي اللي في ايدك ومشيتي يبقى هو كدة كسب المناقشة ونجح في اللي هو عايزه
٣- انتي في اول المناقشة قلتي رأيك او بينتي موقفك ووضحتي له غلطه ، خلاص انتهى كلامك لحد هنا متكرريش كلامك ابدا لان هو حيعمل نفسه مسمعهوش عشان تعيديه تاني وتالت وتبقي في موقف دفاع عن النفس ، او هو مش حيسمعه لان احساسه بالعظمة بيخليه ميسمعش غير نفسه فانتي حتجهدي نفسك ع الفاضي وفي نفس الوقت حتضعفي موقفك وحتفقدي ثقتك في مصداقيتك وفي رأيك فانتي مفروض تكوني واثقة من نفسك وعارفة انه سمع وبيستعبط فخلاص متكرريش ودة حيفسد له المخطط بتاعه
٤- مفروض تعرفي نوع المناقشة مفروض تفهمي انها رايحة لمفيش هو احيانا يخدعك ويوهمك انه على وشك الاقتناع زي ماقلت لك قبل كدة وبعدين فجأة يقول لك ايه العبط اللي بتقوليه دة ويرجعك لنقطة الصفر تاني فانتي مش لازم تنخدعي ولو انتي نفذتي النقطة اللي فاتت اللي هي تقولي كلامك مرة واحدة ومتكرريهوش حتقطعي عليه سكة المخادعة دي ، كمان لما تفهمي المناقشة من اولها انها لف ودوران حتقدري توقفيها بأي شكل وتنهيها بهدوء وتفسدي له التكتيك بتاعه
٥- متهاجميهوش اثناء المناقشة وتبدأي تقولي له انت بتلف وتدور ، انت بتكذب ، انت بتقول اي كلام ، بالرغم من ان دة ممكن يوقف المناقشة ويوقف اللف والدوران اللي هو بيعمله الا انه حيوصله لغضب نرجسي طبعا او انه يمسك عليكي غلطة يشتكيكي بيها للناس وتبقي خسرتي المناقشة وخسرتي خطوة كمان بعدها
٦- عبري عن مشاعرك بهدوء ووضحي انك مستاءة من عدم فهمه بس ببرود وبدون اي نوع من انواع الانفعالات تماما بس مطلوب منك توضحي له انك مش راضية عن المناقشة والاسلوب اللي تمت بيه ، واطلبي انك تاخدي بريك من الكلام بمنتهى الزوق والكياسة والبرود وانسحبي ودة حيربكه جدا وحيسكته تماما
ممكن تقولي له خلينا ندي كل واحد دوره في الكلام واديه الفرصة يبدأ واسمعيه وانتي ساكتة تماما لحد مايخلص بس بشرط تكوني هادية وعندك ثبات انفعالي ولا تتهزي مهما استفزك وبعد مايخلص تماما قولي وجهة نظرك واسكتي ، الطريقة دي حتقطع عليه اللف والدوران من اول الكلام لانك مقاطعتيهوش وهو بيتكلم وحددتي لكل واحد دوره فهو مش حيقاطعك ومش حيعرف يلف بيكي ولو حاول حتعملي الخطوات اللي فاتت


اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11
الكتب
Escape