تعملي ايه لما النرجسي يختفي فجأة من حياتك
ليه النرجسي بيعمل الاختفاء دة ؟ تيودور بيقول انا بختفي وارجع عشان اشوف فرحتك برجوعي ودة اللي بيقولوا عليه لذة الصلح وطبعا هو بيحس بقيمته اوي من فرحتك دي وبياخد وقود ايجابي
دة غير ان هو اصلا مضطرب داخليا ومودي وملول وغير مستقر نفسيا فهو اصلا متقلب ، كمان هو بيحكم سيطرته عليكي بالانسحاب دة بحيث يخوفك لاتفقديه ، او يخليكي توقفي اي حاجة عملتيها اتسببت في الانسحاب دة بما في ذلك انك تتنازلي عن ابسط حقوقك ، والاهم بقى من كل دة انه ياخد وقود نرجسي من رد فعلك على انسحابه (وقود سلبي ) ورد فعلك على رجوعه (وقود ايجابي)
انسحاب النرجسي له طرق كتير اهم اتنين فيهم الصمت العقابي والانسحاب العاطفي
حنبدأ بالصمت العقابي وانا عملت فيه حلقتين ودي الثالثة لاني لقيت معلومات جديدة برضه فلازم اوصلها لكم ، اول معلومة تيودور بيقول ان الصمت العقابي بيحولك من شخص مرح محب للحياة وبيحب يخرج ويستمتع بالطبيعة ( على عكس النرجسي اللي معندوش اي احساس بالمتعة ولا بيحس بالطبيعة ولا جمالها وبيعتبر دة تفاهة وقلة عقل وفراغ ) لشخص منعزل منكسر فاقد الثقة في نفسة عنده احساس بعدم الاستحقاق وفاقد الرغبة في الاستمتاع بالحياة والطبيعة مش عايزة تخرجي ولا تشتغلي ولا قادرة تركزي في حاجة وحالك بيقف ،ودة انجاز عظيم للنرجسي بمجهود قليل ،
المعلومة التانية تيودور بيقول ان اثناء الصمت العقابي هو بيعمل معاكي تصرفات مستفزة ومحقرة عشان يكسرك اكتر وخصوصا لو حس انك مطنشاه ومتجاهلاه ومش فارق معاكي صمته فيحرق دمك بقى ، ازاي؟ تلاقيه يتصل بالعيال ولايكلمك ، وبعضهم يبعت المصروف للعيال مش لكي وبعضهم يحمل مسئولية البيت في غيابه لواحد من الاولاد ومزيد من التجاهل لكي و القهر ، مفروض بقى انك فاهمة كدة فتتجاهلي كل التصرفات الطفولية دي ،
كمان فيه طريقة جديدة بيعملها كنوع من انواع الصمت ، وبتكون مؤلمة جدا : يعزمك على عشا في مطعم جميل او سفرية مثلا ويخطط معاكي للخروجة وطبعا انتي بتكوني في منهى السعادة ومتشوقة للخروجة او السفر وبعدين بمجرد وصولكم للمطعم او الفندق يدخل في سكة نكد صامت ، سكوت مفاجيء وحزن رهيب وتتنيح مستفز ولو سألتيه ماله مش حيرد وحيفضل باصص لك زي التمثال ويحسسك انتي عملتي عملة سودة او انه يقلب لك السفرية نكد ويحكي لك عن مغامراته مع اللي قبلك واللي ظلموه واللي هجروه او يحكي لك اد ايه كان بيحب اللي قبلك او هي كانت بتحبه او يتغزل فيها مثلا وكل دة وهو بيوحي لك انك انتي السبب في بعده عنها وانك اخدتيه منها وبعدها يقلب صمت تاني وطبعا تيودور بيقول ان الطريقة دي لما بينفذها مع الضحية بتمشي من المكان معيطة ومنهارة ودة اكبر كم من الوقود ممكن ياخده بأقل مجهود طيب انا ليه بقول لك الكلام دة وبعض الناس بتقول انتي بتحزنينا علي حالنا طب ماتقولي لنا حلول (مش عايزة اقول ان النرجسيين اكيد مش عايزين ضحاياهم يعرفوا هم بيعملوا فيهم ايه ولا عايزينهم يفهموا انهم بيعملوا فيهم كدة عن قصد ) المهم انا عايزاكي تفهمي ان هو بيعمل كدة عشان يكسرك مش عشان هو حزين فعلا ولا عشان هو انتي غلطتي ولا عشان انتي اخدتيه من اللي قبلك هو بيعمل كدة عشان يكسرك

طيب تعملي ايه ؟

١- اول حاجة تيودور بيقول اطمني هو كدة كدة راجع ، لازم يرجع بعد الصمت العقابي دة ولا كأن حاجة حصلت وطبعا حياخد احلى وقود من فرحتك برجوعه ، فمتقلقيش وسيبيه ياخد وقته هو راجع لانه استثمر فيكي (بقاله اد ايه عمال يكسر في شخصيتك ويكبت فيكي ويعلمك تكوني مطيعة وضعيفة واهدر طاقة اد ايه في كل دة وحيسيبه ويمشي كدة ازاي ) فهو راجع لكن امتى حيرجع دي بتختلف من شخص للتاني
٢- طيب طالما هو راجع يبقى ملوش اي لازمة انك تطارديه ولا كل شوية تتصلي ولا تبعتي ماسجات لان هو كدة عايز ماسجات بتبكي فيها عشان ياخد وقود ، هو بيقول انك ممكن تتصلي بيه مرة واحدة بس وتبعت رسالة واحدة وتبقى كدة عملت اللي عليكي ومتعبروش بعد كدة نهائيا ولاتتحايلي ولا نتصالح ولا العبط دة ، وبرضه تقفلي عليه سكة مسألتيش عني ليه
٣- بيقول لك طول ما انتي بتتحايلي عليه يرجع وبتتصلي وتتوسلي وتسوقي عليه اصحابك واهله عشان يرجع طول ما هو بياخد وقود ومش حريجع لانه مبسوط بتعذيبك دة ، لكن لو سبتيه ومعبرتيهوش حيلاقي نفسه خسران خدمة واكل وشرب وسريره بدون اي فايدة فحيرجع .خصوصا لو شافك عايشة حياتك ومش مهتمة بعدم وجوده تيودور بيقول انه حيرجع زاحف ، ولو كل مرة عملتي كدة ومعبرتيهوش ، مرة على مرة حيبطل اصلا يخرج من البيت وحيدور على اسلوب تلاعب غيره
٤- تيودور بيقول لك عشان تبوظي له التكتيك دة تماما لما يرجع بيدعي الانتصار ومتخيل انك حتقومي ترحبي بيه وتعيطي من الفرحة انه رجع ، انتي ابتسمي والقي عليه التحية وكملي قراءة في الكتاب اللي كنتي ماسكاه او كملي تجهيز الغدا اللي كنتي بتجهزيه يعني ارجعي للي كنتي بتعمليه عادي جدا كأنه كان في مشوار ورجع او كان في الشغل ورجع زي كل يوم .
٥- خدي بالك انه اول مرة ممكن يغيب اسبوع اوالصمت يستمر اسبوع وتاني مرة هو عارف انك حتتوقعي اسبوع برضه فحيزود عشان يوحي لك انه مش راجع بقى فمتقلقيش حيرجع برضه

اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11
الكتب
Escape