الاستفزاز. تعملي ايه لما النرجسي يستفزك، مازلنا في كتاب تيودور الهروب كيف تهزم النرجسي
الناس الطبيعيين الاسوياء بيمروا باربع مراحل لما يحبوا ياخدوا اي قرار :
١- بيشوفوا موقف حصل
٢- فبيدرسوا الموقف اللي ادامهم كويس وبعدين يقيموا الوضع عشان يحددوا ايه اللي بيحصل
٣- وبعدين يحددوا مسارات العمل المتاحة لهم قبل ماياخدوا القرار
٤- واخيرا بياخدو القرار
تيودور بيقول ان هو والنرجسي اللي زيه مش بيمروا بالاربع مراحل دي هو بيشوف الموقف ويتصرف مباشرة او يعمل رد فعل بدون تفكير لان هو متبرمج على كدة وان هو زي الالة لما تضغطي على اي زرار فيها حتشتغل من غير اعتبار لاي نتايج ،وهو بيتوقع انك تكوني زيه وانك تتفاعلي مع تصرفاته الخبيثة معاكي بدل ماتقعدي تفكري حتتصرفي ازاي ، هو عايزك تفوتي الخطوة التانية والثالثة وتروحي للخطوة الثالثة مباشرة عشان ياخد منك رد فعل يعني وقود نرجسي وهو عشان انتي مش بتعملي كدة بيحاول يوصلك لكدة عن طريق انه يحطك تحت ضغط ويستفزك بأي طريقة ، زي مثلا انه يقول كلام مزعج او يغازل صاحبتك او يسيب لك شات بينه وبين واحدة عشان تشوفيه ،او يتهمك انك عملتي غلطة انتي اصلا معملتيهاش او يتلكك على اي كلمة تقوليها ويقولها بمعنى سيء ويشتمك ويتخانق ، …. انتو اكيد عارفين حاجات كتير من دي ، وبكدة يوصل للتفاعل والانفعال اللي هو عايزه منك وياخد الوقود النرجسي المطلوب . هو بيقول ان النرجسي بيعشق انه يشوف ردود افعالك الانهيارية دي وانتي مفروض تعملي الاتي عشان تتجنبي استفزازه :
١- لازم تكوني عرفتي طرق الاستفزاز اللي بيستخدمها بكل اشكالها ومع الوقت حتدركيهم كلهم لما يجربهم معاكي مرة ورا مرة
٢- ركزي هل الموضوع اللي بتتناقشوا فيه ممكن تتوصلوا فيه لاي نتيجة دقيقة ومحددة ؟ هل انتي تقدري تحددي هو عايز ايه بالظبط من المناقشة هل فيه حاجة واضحة انتوا بتتكلموا فيها ؟

حتتفاجئي لما تعرفي انك لو تجنبتي الاستفزاز بتاعه حتكوني مسكتيه متلبس من غير ماهو يحس وحتتفاجئي اكتر لما تراقبيه وهو بيستفزك وانتي واعية تماما انه بيحاول يستفزك وحتشوفي هو اد ايه شكل الطفل العبيط وانتي اد ايه كنتي طيبة لما كنتي بتبلعي الطعم وتتفاعلي مع لؤمه ، ومع الوقت حتعرفي تميزي انهي مناقشة بتكون حقيقية ومفروض تكمليها وانهي مناقشة بتكون استفزاز ولازم توقفيها .
٣- اوعي تدخلي في محاولة توجيهه للمناقشة بشكل منطقي لان هو مش عايز اي منطقية طبعا وبالتالي مش عايزك توجهيه للمنطقية وفي الحالة دي حيفضل يزود في استفزازك لحد مايوصلك للانهيار وينجح في اللي هو عايزه ، وكمان مش حينسى انتي تعبتيه اد ايه لحد ماوصلك للانهيار دة فحيفضل يكمل استفزاز عشان ياخد حق التعب دة ، لو انتي قدرتي تفشلي الاستفزاز دة ممكن في الحالة دي تحصلي على مناقشة منطقية ، وبعدين بيشبه الكلام دة بانك بتنزعي فتيل قنبلة قبل ما تقدري تخرجيها من المبنى لانك لو حاولتي تخرجيها ممكن تنفجر فيكي ، فانتي ابطلي الاستفزاز دة بانك تتجنبيه وبعدين لما يفشل شوفي اذا كان الموضوع محتاج مناقشة ولا تسكتي
٤- حافظي على هدوئك تماما ولا تعلقي بكلمة او ممكن تبتسمي ابتسامة هادية وتقولي انت شايف كدة ، طيب تمام ، معلش. ،مفيش حلول للاسف ، بمنتهى الهدوء ، وبكدة حيفهم ان الاستفزاز مش شغال ومش حيشتغل معاكي فحينسحب ومش حيهدر طاقة في حاجة مفهاش فايدة
٥- مترديش عليه كلمة بكلمة ولا توجهي له اهانات لانه عايز يتخانق عشان الوقود وانتي كدة بتحققي له طلبه
٦- اذا كنت بحاول استفزك باتهامات باطلة ادحضيها مرة واحدة يعني ردي عن نفسك رد واحد بالنفي وبس هو كدة كدة مش حيسمعه لكن لو انتي حاسة ان دة حيريحك اعمليه وانا شايفة انك متعمليهوش بالعكس قولي له طيب معلش. ، ولو بيتهمك بالخيانه قولي له طب ليه سايبني على زمتك لو انت عارف اني بخون ؟ بهدوء وبرود وبدون انفعال
تجنب الاستفزاز بيضيع على النرجسي فرصة انه يطلعك مجنونة وعصبية ويلف يقول للناس الكلام دة وكمان لو سجلتي عليه الكلام دة حيكون دليل كويس ضده في قعدات التحكيم


اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11

الكتب :
Escape /How to beat the narcissist