تتعاملي ازاي مع تخويف النرجسي
التخويف حلقة (ايه اساليب التلاعب اللي بيستخدمها النرجسي مع الضحية ؟ ..)
النرجسي بيستخدم التهديد المقنع او الخفي بحيث يحسسك بالخوف وفي نفس الوقت يعمل لك لخبطة لانك مش بتكوني فاهمة هو بيهوش ولا ممكن يعمل كدة فعلا ، يعني يقولك ملكيش لازمة في حياتي ولما يصالحك يقولك مقدرش اعيش من غيرك فدي اول فايدة بياخدها من تخويفك . وفي نفس الوقت التخويف المقنع دة بيخليكي مش عارفة تمسكي عليه غلطة ولا تقدري تحكي للناس وحتقولي ايه وهو ممكن يقلب عليكي الترابيزة ويطلعك مجنونة وبيتهيألك وهو طبعا مكنش يقصد اللي انتي فهمتيه او اصلا هو مقالش كدة وخصوصا انه لما بيحب يخوف مش بيكمل الجملة ابدا عشان متتمسكش عليه يعني يقولك (لو مسكتيش انتي حرة ، او لو عليتي صوتك انتي عارفة اللي حيحصل … ) النوع دة من الكلام اللي تبقي اصلا عارفة قصده وتخافي ومتقدريش تقولي له انت قلت ،
في حالة ان النرجسي يخوفك حاولي ميكونش لكي رد فعل قوي لان دة اللي هو عايزه ، هو عايزك تنفعلي وتكبري الموضوع طبعا عشان ياخد وقود وفي نفس الوقت يقلب الترابيزة ويطلعك مجنونة ، تيودور بيقولك اعملي نوت اكتبي فيها اللي بيحصل منه يوميا عشان حتحتاجيها لما تحبي تواجهيه ادام الناس ، وكمان اذا حبيتي تصعدي الامور وتوصلي للمحكمة يكون معاكي مذكرات تساعدك وكمان بيؤكد عليكي انك تسجلي المواقف وتحاولي توثقيها وتخليها في مكان بعيد عن ايده وبيقول لك متوريهالوش عشان تثبتي له اللي هو بينكر انه عمله ولا تعرفيه طريقها لانه طبعا حيفسدها فكوني واعية . ومتستهونيش باي حدث تافه وسجليه لانه حينفعك بعدين . هو بيقولك صوريه سواء صور او فيديو اخفي الموبايل في مكان ميخدش باله منه وصوري دايما الاحداث .وابعتيها فورا على اي ايميل موثوق فيه . كمان الصور دي حتفكرك دايما باللي بيعمله فيكي خصوصا لما يعمل هوفرينج وتلاقي نفسك بتتسائلي هو انا كنت ظالماه ولا ايه ، او لما يعمل لك جاسلايتينج وتبدأي تشكي في سلامة عقلك وتصدقيه انك مجنونة ومحتاجة تروحي لمعالج نفسي .
ولما يبدأ في تخويفك متفضليش قاعدة في نفس المكان حاولي تتهربي وتتحركي من ادامه بحيث تلخبطي له الخطة هو اصلا عامل سيناريو في دماغه و متوقع انه حيحصل بالحرف الواحد لان انتي كل مرة بيكون رد فعلك هو هو فانتي لما تغيري رد فعلك وتسيبيه وتمشي حتعملي له لخبطة غير متوقعة ، وطبعا دة في مصلحتك ممكن تخليه ياخد هدنة عشان يقعد يفكر في التكتيك البديل . كمان انتي بتجاهلك له وخروجك من المكان بتحرميه من رد الفعل اللي هو عايزه منك سواء كان الاذعان والخضوع لرغباته(وقود ايجابي ) او انك تتحديه (وقود سلبي) وبالتالي هو مش حيبذل مجهود تاني في التكتيك دة ومع كل مرة يحاول تخويفك تعملي نفس الكلام ممكن يبطل تماما

اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11

الكتب :
Malignant self-love