ليه النرجسي بيتغير لما يتغني و ربنا بيفتحها عليه
النرجسي لما بيكون معهوش فلوس بيحاول غالبا يتجوز واحدة تساعده يعني بتشتغل او اهلها مرتاحين او وارثة المهم هي حتكون نواة الثروة بتاعته وطبعا بيكون خافي شره وبيتعامل بحذر وحرص وميقدرش يظهر ميوله السادية(ادمان اذية الغير) طول ماهو لسة محتاج لضحيته ، وبعدين اول ما العجلة تمشي تلاقيه قلب واتغير وبانت ميوله السادية وتبدأ هي تقول بعد ما اتغنى بان على حقيقته . هو فعلا اللي بيحصل ان النرجسي لما بيكون معاه فلوس بيقدر يمارس دوافعه السادية بحرية اكتر ومن غير مايخاف من النتايج اللي ممكن تحصل بسبب السادية دي واللي منها انك ممكن تسيبيه وتمشي او توقفي مساعدتك له او انك تفضحيه وتعرفي الناس حقيقته او حتى تلجأي للسلطات ، لكن لما يعمل ثروة
(١) الفلوس بتعمل له درع حماية من الكلام دة كله وتغنيه كمان عن مساعدتك وبتؤمنه من اي ردود افعال منك او من غيرك ،
(٢) الفلوس بتسمح له يكون وقح وفاسد و يقدر ياخد اللي هو عايزه منك بالهدايا او بتهديدك فمش حيكون محتاج يخبي نرجسيته وحيكون اكتر حرية
(٣)الفلوس بتخليه يقدر يشتري الصداقات والتقبل من اللي حواليه ،وحتى من اللي حواليكي انتي كمان طبعا بعطاؤه القهري اللي اتكلمنا عنه لان كل الناس حتقول لك انه طيب وكريم وراجل زي الفل والعيب فيكي ، اكتر حاجة بتساعده علي انه يقلب عليكي اللي حواليكي الفلوس لانه صاحب واجب وكريم وانتي بتقولي انه مقصر معاكي ازاي ؟وكل دة مكنش يقدر يعمله وهو معندوش فلوس او هو بياخد منك الفلوس او بيخطط ياخدها منك
(٤)كمان الثروة بتخلي النرجسي اكتر تغطرس واستعلاء ودة بيكون بشكل اقوى واسوأ من لو مفيش ثروة ، وطبعا بتحسسه بالتميز على باقي الناس واحتقارهم ودة وقود نرجسي بيخليه يحس اكتر بذاته المتضخمة ويبدأ يشوف انه يستحق حد احسن منك او على الاقل يستحق اكتر من علاقة ميكفيهوش واحدة وعشان كدة منهم كتير بيروح يتجوز الثانية اول مايبقى معاه فلوس ،
(٥)كمان هو لما بيتغني محدش بيكون عارف انه كان فقير منبوذ ومعهوش ملاليم غيرك وانتي اللي اديتيه وسندتيه وبالتالي دة بيضعفه ادامك ويحسسه انك احسن منه ودة طبعا كاف انه يكون عدواني معاكي ويبدأ يحقر فيكي عشان يقول لك انه احسن منك وتبدأ نرجسيته تظهر

النرجسيين بينقسموا لنوعين من حيث علاقتهم بالفلوس
١- نوع مش بيستخدم الثروة في الشراء بالعكس بعضهم بيفضل لابس نفس اللبس لمدة ١٥ سنة ومعندوش سيارة وميبانش عليه اي مظهر من مظاهر الثراء ويحافظ على فلوسة ويخفيها ومحدش يعرف هي اد ايه ولا اقرب الناس له . اهمية الفلوس في الحالة دي للنرجسي مش بتكون عشان يصرفها ويلبي بيها احتياجاته لا بتكون رخصة للخطيئة(دة كلام فاكنين) وللاستغلال والاساءة للغير ، هي بتطلق الوحش النرجسي المكبوت جواه .ولو حصل انه تم هجره الفلوس بتساعده انه مينهارش.
٢- النوع التاني بيصرفوا في المطاعم والرحلات والاكل الصحي وممكن يشتروا هدايا على مضض (عشان مصلحة)، وبعضهم مدمن قمار و مضاربة وطبعا مدمن خسارة وزوجات كتير بتشتكي من الحكاية دي تقول مضيع كل فلوسه في المجازفات من النوع دة ،

اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11

الكتب :
Malignant self-love