الصمت العقابي
ليه النرجسي بيعمل الصمت العقابي؟
شوفي عايزاكي تلاحظي كدة امتى النرجسي عمل لك صمت عقابي وايه الاحداث اللي كانت حاصلة قبل الصمت دة مايحصل ؟ حتلاقي ان حاجة من الحاجات اللي حقولها دي لازم تكون حصلت قبل الصمت العقابي
١- اكتشفتي خيانة وواجهتيه وطبعا انكر وزعل وانتي ازاي تشكي فيا او عمل لك تغيير التركيز ولف الكاميرا عليكي والهب مشاعرك فانهارتي وقلب الترابيزة
٢- بتحاولي تحمليه مسئولية الاولاد وتبيني له انه مقصر فحيقلب الترابيزة ويطلعك غلطانة وتبقي انتي الملامة ويحملك مسئولية الغلط بتاعه وبعدين يهرب بالصمت العقابي
٣-بتعملي حاجة بتحبيها ( خرجتي مع صاحباتك ، عزمتي اهلك ، اتفرجتي على فيلم مع اولادك وقعدتوا تضحكوا وانبسطتوا من غيره ، مسكتي كتاب وطولتي شوية ،….) وهنا بيعمل رابط بين الحاجة اللي بتحبي تعمليها وبين الاذى اللي بيحصل لك بسبب الصمت العقابي فمع الوقت الرابط دة بيقول لعقلك انك لو عملتي الحاجة دي حتتئذي فمتحبيش تعمليها تاني ودة نوع من انواع سيطرة النرجسي
٤- برضه تبع السيطرة : اذا خالفتي اوامر النرجسي او رفضتي تعملي حاجة هو عايزها او قلتي له لا على حاجة ولو كانت تخصك انتي ومش من حقه يتدخل فيها ولو كانت هايفة جدا زي مثلا ( كلي سمك وانتي مش عايزة ،متسهريش ، اسهري ، متخديش معاكي كتب في المصيف ، متقرأيش اصلا ، …) وطبعا دة معناه انه مش مسيطر وانك بتخرجي عن السيناريو اللي هو راسمه لكي في الحياة فيعمل لك صمت عقابي
٥- طبعا بيعلمك الادب ويخليكي تحرمي تعملي اي حاجة من اللي فات دة كله
٦- لو انتي انشغلتي عنه بطفل جديد مثلا او دراسة او اي حاجة فلازم يشد انتباهك بالصمت العقابي وممكن متكونيش انشغلتي ولا حاجة بس هو محتاج منك اهتمام اكتر فيعمل صمت تقومي تفضلي طول الوقت تفكري هو ماله وتفضلي كل تركيزك عليه وتفكيرك فيه وبالتالي متعرفيش تشوفي نفسك ولا مشاكلك ولا تعرفي تاخدي قرار في اي شيء
٧- هو اصلا لما بتواجهيه باي غلطة او اهمال مش بيكون عنده اي ردود يا اما لانه عارف انه غلطان يا اما لانه مش فاهم نفسه ومش فاهم هو بيعمل كدة ليه فمعندوش حاجة يقولها هو اصلا فارغ داخليا
٨- ممكن جدا تكوني انتي اصلا مقاطعاه مخاصماه يعني وهو عايز يجبرك تصالحيه وطبعا وقود نرجسي
٩- هو لما بيعمل لك صمت عقابي وانتي تلفي وراه وتحايليه ياخد وقود ايجابي ولو انهرتي واكتئبتي وقود ولو اتخانقتي وصرختي وشتمتي وقود سلبي يعني كله وقود
١٠- انتي بالنسبة له آلة فلو منعتي عنه الوقود باي شكل فبيعتبر الالة عطلت ولازم يصلحها ومن ضمن طرق التصليح الصمت العقابي
١١- اهم حاجة واسوأ حاجة انه بيكون عايز يوصل لك انك مش مهمة وهو مش شايفك ودي اسوأ حاجة ممكن تتعمل في الانسان

ازاي تواجهي الصمت العقابي
١- استغلي الوقت اللي فيه صمت عقابي في انك تاخدي هدنة وتحاولي تشتغلي على نفسك وتتعافي وتقوي نفسك وترجعي ثقتك في نفسك
٢- لازم تردي على الصمت العقابي بصمت عقابي مماثل
٣- حطي حدودك معاه بطريقة من ثلاثة صمت عقابي ، تعترضي زي ماقلنا قبل كدة ، اساليب ملتوية زي موضوع الموبايل وتفتيشه
٤- واجهي الحقيقة بالرغم من صعوبتها ( اللي بيعمل كدة مش بيحبك ، وكل الحب الحب والعلاقة الجميلة هي اشياء بداخلك فقط وليست واقع ابدا )

اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11