١-اطلبي بشكل واضح ومباشر
لما يكون لكي حق عند النرجسي وهو واخده منك ومش بيديهولك اطلبيه منه بشكل مباشر ، يعني متلفيش وتدوري او تقولي له ينفع تعمل كذا ؟ وهو اصلا حقك يعني مينفعش تقولي ينفع؟ لا المفروض تقولي لو سمحت اعمل كذا ، لانك لما بتطلبي على شكل سؤال بتسهلي عليه انه يقول لأ . ولو راوغتي حتفتحي له باب المراوغة والتملص منك وهو غالبا حيفضل انك تراوغي عشان يعرف يراوغ لان لو طلبتي بشكل مباشر وبدون مراوغة حتقللي فرص النرجسي انه يشوه الطلب او يعمل مش فاهم ، وكمان اذا ماستجبش لطلبك استجابة منطقية حتفهمي انه بيراوغ ومش ناوي يديكي حقك ، طيب لو مااستجابش حتعملي ايه ؟ حتكرري الطلب بشكل مباشر برضه بدون عدائية ولا تهديد ، اطلبي باحترام وباصرار واكدي في كلامك ان الامر مهم وانك محتاجة الشيء دة . متخافيش من ردود افعاله صممي على حقك بهدوء وبرود ولو عمل غضب نرجسي عشان يهرب من الطلب اتفرجي عليه وهو بيتنطط ويستشيط غضب وانتي ولا هنا ما انتي متوقعة انه يعمل كدة ولما يخلص فهميه ان اللي عمله دة مغيرش اي حاجة وانك مازلتي محتاجة للشيء دة ومهم جدا انك تاخديه ، لازم تسمعيه الكلمتين دول بعد مايخلص غضب او ثورة فورا لانه احتمال يعمل صمت عقابي بعدها وممكن انتي اللي تعملي له صمت عقابي لو هو معملش عقابا له على انه عمل الغضب النرجسي بدون وجه حق ولمجرد انك بتطلبي حقك
٢- ركزي على هنا والآن
لما النرجسي او غيره يعمل تصرف فيه تعدي للحدود معاكي وحتدخلي معاه في مناقشة عن التصرف دة خليكي مركزة علي الغلط اللي هو عمله لان هو حيحاول يخرجك برة الموضوع بالتلاعب والتهرب والمراوغة حيجيب سيرة موقف قديم ويقولك انتي عملتي كذا في اليوم الفلاني ودة شيلني منك وانتي مش بتحبيني وحيلف بيكي الكرة الارضية عشان يخرجك برة الموضوع اللي انتي لكي حق فيه وهو مش عارف يهرب من انه يعتذر او يلتزم بعدم تكراره ، فإنتي لما يعمل معاكي كدة لاتنساقي ولا تدافعي عن نفسك في موضوع قديم ولا تتجاوبي لاي كلام خارج الغلطة اللي هو عاملها رجعيه تاني لموضوعك وقولي له خلينا في موضوعنا وفهمني انت ناوي تصلح الغلطة دي ازاي ومتخليهوش يوعدك انه بكرة حيعمل كذا او انه حيتغير او انه مش حيكرر الغلطة لا كدة هو برضه خرج من الان وراح للمستقبل اللي انتي مش ضامناه فيه ، يبقى هو لازم حالا يعمل حاجة تصلح الغلطة اقلها انه يقول اسف واحسنها انه يصلح الغلط اللي عمله يعني لو اهان ابنه او بنته او قال لهم معلومة مشوهة او قصر في شيء من مسئولياته يصلح في التو واللحظة .. الغلطة اللي متتصلحش في ساعتها مش حتتصلح ( دة كلام دكتور جورج سيمون كاتب كتاب في ثياب الخراف)
طبعا انا عارفة ان الموضوع مع النرجسي مش سهل وهو اصلا الكاتب بيتكلم عن النرجسي والسيكوباتي وجميع الشخصيات المستغلة ، لكن كمان هو بيقول ان مش سهل ابدا تغيير او كسر العادات لكن مع التكرار وكثرة المحاولات حتوصلي للي انتي عايزاه
عارفة انك حتقولي لي حاولت كتييييير وبقالي سنين بحاول حقول لك انتي كنتي بتحاولي بطريقة غلط . كنتي اما بضعف وتحايل ومذلة وبالتالي مفيش اي استجابة ، او بحدة وسلاطة لسان وسخرية واستفزاز وطبعا كان بيعند معاكي ، دلوقتي المفروض تغيري طريقتك ، دلوقتي اتناقشي واعترضي بقوة واصرار وتصميم مع التحلي بالادب والاحترام وعدم السخرية ولا التطاول مهما كان اللي ادامك حقير علي الاقل متمسكيهوش عليكي غلطة وكمان هدوؤك وادبك حيخوفه ودة كلام من الحالات اللي حاولت وقدرت تحقق نتيجة معقولة على الاقل وقفت جزء من الاذى
كمان دكتور جورج بيقول ان النقطة المهمة البارزة في اهمية هنا والان هي ان التغير الحقيقي في تصرف اصحاب اضطرابات الشخصية دايما بيكون في اللحظة اللي بتواجهي فيها التكتيك بتاعه ، حضرب لك مثل : كان عندي حالة اكتشفت ان زوجها نرجسي خفي وكانت في صمت عقابي و هو عايز يكسر الصمت وكانت متعودة انه يكسر الصمت بتكتيك الشعللة فيوجه لها عدة اتهامات مستفزة فتتفاجيء وتنهار وتبكي وهو يقوم يصالحها ويبوس راسها وخلصنا على كدة وهكذا كل مرة ، قلت لها لما يبدأ الشعللة استرخي تماما واحاولي تكوني قاعدة في مكان مريح عشان اعصابك تكون هادية وخليكي مبتسمة وكل اتهام يوجهه لكي تردي عليه بايوة فعلا عندك حق بس هو دة الوضع نعمل ايه ، امرك لله ، انت مضطر تستحمل وهي مبتسمة وهادية ، المهم هي عملت كدة وجت تحكي لي ايه اللي حصل ، هو بدأ يقول لها انتي طول عمرك بتعامليني بندية وطول عمرك بتعامليني راس براس ، قالت له يااه اد كدة انا تاعباك في حياتك ؟ طبعا الاجابة اربكته لانها قالتها وهي بتضحك ومبسوطة على غير العادة مدافعتش عن نفسها وازاي دا انت مفتري وكاتم نفسي والكلام دة كله لا هي غيرت استجابتها فاربكته فلما سألته اد كدة انا كنت تاعباك رد بدون تفكير وقال آه وسكت ولحق نفسه وقال لا بس انتي بتعامليني بندية ، قالت له بجد طب والله كويس انت كدة بتعظمني وبتحسسني اني حد قوي هو انت حد يقدر يعاملك بندية والله ياشيخ رفعت معنوياتي ، طبعا ردها اربكه وخلاه قعد ساكت حوالي خمس دقايق يفكر في سلاح تاني راح قايل لها انتي طول عمرك مش بتحبيني وتحلفي كدب انك بتحبيني ، وطبعا متوقع انها تنهار كالعادة وتدافع عن نفسها لكن هي قالت له وانت تعرف منين كنت بحبك ولا لا انت دخلت قلبي وعرفت ، ربنا بس اللي عارف انا كنت بحبك ولا لا ، دخلت كنت عشان توصل له انها مبقتش بتحبه بس من غير ماتقول ، المهم وجه لها كمان اتهامين وهي ترد بنفس الطريقة والضحك فلما لقى التكتيك باظ بطل تماما الشعللة
تابعونا على الفيس
اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11
قناة التلجرام
https://t.me/learnaboutnarcisest
الكتب :
١- Becoming the Narcissist's Nightmare
٢- In sheep's clothing
3- healing from narcissist