انتي دايما مبالغة في ردود افعالك ، انتي مش طبيعية انتي عندك مشكلة في التحكم في غضبك ، انتي مستفزة انتي مجنونة
دي الجمل اللي النرجسي بيقولها لك بعد مايسبب لك انهيار عاطفي عن قصد . الهدف هنا انه يلخبطك ويخرجك من الموضوع اللي انتي بتواجهيه بيه ويبدله بمشكلة انك معندكيش استقرار عاطفي وانك مش طبيعية ومحتاجة علاج
فمثلا انتي لو بتواجهيه بحاجة عملها (شات مع واحدة - صور - كذبة كذبها عليكي -حاجة مخبيها عليكي وانتي اكتشفتيها ……) فهو يحول الموضوع عليكي بدون مايتكلم في اللي هو عمله اصلا حيقلب الترابيزة علطول حيقول لك انتي اللي شكاكة انتي غيورة انتي عندك مشكلة ، طبعا بالنسبة لك اللي بيقوله دة غير متوقع لان انتي مش حتكوني متوقعة الهجوم انتي متوقعة انه يدافع عن نفسه وبتلاقي نفسك انتي اللي في وضع دفاع ومحبطة ومنزعجة وهو حيزود في شعللتك ويحذرك من انك تعلي صوتك او يقول لك انتي مش لاقية حاجة تقوليها انتي عايزة تتخانقي على اي حاجة ، او يقول لك ايوة بدأنا بقى في سلسلة النكد الانهيارات ودة طبعا حيزيد من غضبك ونرفزتك وبعدين يقول لك انه زهق من انهياراتك والدراما والنكد اللي انتي معيشانا فيه وانفعالاتك المبالغ فيها ، في اللحظة دي انتي بتنهاري وتنخرطي في البكاء وممكن يوصلك للذهول لما يقولك انتي مش طبيعية انتي مجنونة او مؤذية او انك عندك مشكلة عدم تحكم في اعصابك وغضبك ويزيد انه حيسيبك لو مكنتيش تتعلمي تتحكمي في نفسك وغضبك
بكدة هو حطك في كورنر العاطفة ومأخدتيش حقك منه وقدر يهرب وكمان ياخد وقود سلبي ويخليكي تنهاري وانتصر عليكي وكمان حيعمل لك صمت عقابي وفي الاخر تضطري تصالحيه
لانك طبعا لما تهدي حتفضلي تقولي لنفسك انا ازاي بتعصب كدة انا غلطت وتقتنعي انك فعلا عندك مشكلة وخصوصا لو انتي فسختي خطوبة او اتطلقتي قبل كدة حيتهيألك ان انتي السبب ان المشكلة دي هي السبب وتتعهدي لنفسك انك مش حتكرري الغلط دة تاني - لكن دة لو حصل كبتك دة حيخلي المرة الجاية اسهل على النرجسي في انه يزقك للانهيار بشكل اسهل واسرع وبتدخلي في حلقة مفرغة بتتكرر
خدي بالك لما يحصل كدة افهمي انك مش مجنونة ولاعندك مشكلة انتي انسانة طبيعية جدا وانفعالك طبيعي جدا - ودي اسمها حرب نفسية .. طيب هل انتي عايزة تنهي الحرب النفسية دي ؟
حقول لك كذا نقطة لو عملتيها حتقدري تنهي الحرب دي :
١- لما تحبي تواجهيه اوعي من غير مايكون معاكي دليل مادي في ايدك ماتستعجليش ، راقبي واصبري وحاولي تسجلي عليه حاولي سكرين شوت ولازم يكون عندك نسخة في مكان تاني ساعة المواجهة عشان ممكن يكسر الموبايل .
٢- مينفعش تروحي تواجهيه بإنه مهملك ولامقصر في حقك ولاحق اولادك بعد ماعرفتي انه نرجسي والا تبقي بتهرجي ، متتكلميش في حاجة غير مادية لانه حيعرف يستفزك بشكل اسهل
٣- لو احرجك ادام حد او ضايقك بكلمة ردي عليه بهزار في ساعتها ادام الناس ، ممكن بعدها يعمل لك صمت عقابي او غضب نرجسي لما تروحي بس حيحرم يعملها تاني عشان حيحافظ على شكله ادام وبعدين لو استنيتي لما تروحي وواجهتيه حيعمل لك برضه صمت عقابي او غضب نرجسي لكن مش حتكوني استفدتي واحراجه ادام الناس اللي حيخليه يحرم يحرجك تاني
٤- اذا كان ولابد من المواجهة بغلطة كوني متوقعة السيناريو اللي قلته لك دة واتعاملي على اساسه يعني تكوني باردة جدا ومهما وجه لك اتهامات متعبريهوش ابتسمي وقولي جمل هادية ( ايه دة انت متأكد - تفتكر؟ - وماله انا كدة انت مضطر تستحمل …..) الردود دي حتخليه مصدوم ومش مستوعب انه تكتيكه فشل وطبعا هو اللي ممكن يقع في فخ الغضب وانتي اوعي تخافي ابدا قولي لاحول ولا قوة الا بالله وسيبيه لما يخلص غضبه ويهدا قولي له ليه كل دة ، دة مكانتش كلمة وسيبيه وامشي
في النهاية المواجهة مع النرجسي زي عدمها وطبعا احسن طريقة تموتيه بيها هي التجاهل ثم التجاهل ولما يضايقك وتتجاهليه حيدور على طريقة تانية وثالثة لحد مايزهق ويرجع للهوفر وساعتها تاخدي منه اللي انتي عايزاه

اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11
قناة التلجرام
https://t.me/learnaboutnarcisest