دلوقتي النرجسي بيعتبرك آداة من الادوات اللي موجودة في البيت وطبعا الادوات دي كلها ملكه وموجودة عشان تحقق له الراحة والسعادة ، فدة دورك في حياته تحققي له كل طلباته ، ودة اللي تيودور بيقول لك متعمليهوش ابدا متحققيش له كل طلباته طبعا كلها او اغلبها بتكون على حساب نفسك ، هو بيقول ان انتي دورك في حياته عبارة عن ثلاث حاجات :
١-تعملين كخادمة (دي ترجمة كلام النرجسي تيودور)
٢- تسمحين لي بفعل ما اريد فعله ( اخونك ، ابهدلك ، اهينك ، اضرب عيالك واضيعهم ، اعصي ربنا في بيتك …… )
٣- تسترضيني لما افقد اعصابي ( سواء معايا حق او معيش )
وتفسيرا للكلام دة هو بيقول ان النرجسي عنده متطلبات الاطفال اللي هم بادئين حياتهم ومعلقين كل احتياجاتهم على اللي حواليهم اكل وشرب وتنظيف وتدفئة وبعدين لما بيكبروا بينضجوا ويفهموا ان الحياة لابد تكون اخذ وعطاء لكن النمو دة مش بيحصل عند النرجسي هو بيظل كما هو طفل رضيع عايز ياخد وبس لكن مينفعش يعطي ولو اعطى حيكون بمقابل ضخم ، وبعدين بيفسر انه انتي مفروض تعملي له كل دة ليه ؟ عشان هم مميزين ويستحقوا معاملة خاصة ، وكمان انتي آداة من أدواتنا اللي مفروض تخدمنا ، ولازم تمدينا بالوقود اللي هو دورك اصلا وكمان دة طبعك اصلا انك تراعي الناس وتاخدي بالك منهم وتخدميهم وتسعديهم ، واحنا بنستغل الطبع دة فيكي لانك بتستمدي سعادتك من اسعاد الاخرين ومش بتحتاجي لمقابل وكفاية عليكي انك بتكوني سعيدة لما تسعدي غيرك ( قمة الدنو والدنائة)
غلطتك بقى انه لما بيتعصب ويفقد اعصابه انتي بتتهمي نفسك فورا وتقولي اكيد عملت حاجة وتبدأي تلملمي وتشوفي وتطبطبي وممكن تكوني كمان من النوع اللي مش بيحب المشاكل وبيحب السلام النفسي فتحاولي تحلي المشاكل بسرعة عشان مش عايزة نكد فللاسف بتتعاملي معاه على انه طفل اول ما يعيط ترضعيه او تغيري له المهم تعملي له اي حاجة ( اللي هي بالنسبة له وقود نرجسي ) فهو لما بيلاقي قلة الادب والصوت العالي والخناقات اللي ملهاش سبب بتجلب له الوقود اللي هو عايزه يبقى حيشتغلك كل شوية وحيفضل كل الوقت بيدور على اي حد عمل اي غلطة لو ملقاش حيعمل زي ماقلنا قبل كدة اللي كان بيخبي المقص ويتخانق عشان مش لاقيه فإنتي بقى المفروض لما تلاقيه بدأ مهاتراته دي ولا يكون لك اي رد فعل ولا تتحركي ولا كأن الكلام لكي او زي ما اتفقنا غيري الموضوع واتكلمي في اي حاجة تانية مهمة بالنسبة له عشان تتقي شره خصوصا لو هو بيضرب
هنا تيودور بيقول جزئية لازم تعرفيها عشان تساعدك على فهم النرجسي اللي معاكي ايا كان هو مين ، بيقول انهم النرجسيين بينتابهم شعور بالضعف والضياع والخوف وكأنه زي الطفل الصغير المثير للشفقة وطبعا الشعور دة بيتعارض مع عظمتهم وقوتهم المزيفة فبيكرهوا الشعور دة جدا وبيسبب لهم ازعاج شديد جدا ومفيش اي حاجة ممكن تنهي الشعور دة غير الوقود النرجسي اللي انتي بتقدميه له عن طريق التملق والطبطبة والدلع والخدمة او انه يبططك ويبهدلك فيشعر بالقوة عشان كدة انتي مهمة جدا بالنسبة له كخادم وجهاز من الاجهزة المنزلية ( عشان بس متتغريش )
شوفي بقى ليه تيودور بيقول لك متهاوديش النرجسي ولا تجري عليه ولا تطبطبي ولا تديه وقود نرجسي ؟ لان دة حيأثر عليكي نفسيا وعصبيا وجسديا ، بيحصل انك بتفقدي احترامك لذاتك بالتدريج ، في كل مرة بيتطاول عليكي وانتي تجري تطبطبي وتدادي وتحايلي انتي بتاخدي خطوة للخلف ، والنرجسي هدفه خبيث ومعاملته لك مهينة وبغيضة واتهاماته فاضحة ومع ذلك انتي برضه بتعطي وتخضعي وتدلعي وشوية شوية بيضيع احساسك بنفسك وطبعا دة اللي هو عايزه انك تكوني امتداد له فقط كائن غير مستقل ينتمي له ولايعترف ولا يفهم انك شخص منفصل كائن بذاته لان الكلام دة لا يتوافق مع مصالحه واحتياجاته .
وبيختم تيودور النقطة دي بانك ابدا متلبيش لنا طلباتنا ولا تراضينا لما نفقد اعصابنا لان دة بيخلينا نطلب اكتر واكتر وانتي بتلاقي نفسك بتدوري في فلكنا وبتفقدي احساسك بنفسك

تابعونا على الفيس
اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11
قناة التلجرام
https://t.me/learnaboutnarcisest