بيقولك السيد تيودور لا تحاولي ان تغيرينا لاننا لانريد ان نتغير ولا نستطيع اصلا ان نتغير ، ليه بقى هم مش حيقدروا يتغيروا ؟ لان التغيير دة محتاج وقت وجهد وهم معندهمش وقت غير للحصول على التموين النرجسي وكمان هم مش حيضيعوا طاقتهم في بذل اي مجهود غير للحصول على الوقود دة . والاهم من كدة بقى ان هم مش عايزين اصلا يتغيروا هو تيودور بيقول احنا مش حنتغير لاننا مستمتعين بما نحن عليه ، مستمتعين باللي بنحصل عليه من تقدير واحترام الاخرين ، احنا ملوك في قصورنا المشوهة وخيالنا المشوه ايضا .
واضح طبعا ان النرجسي شايف نفسه كويس جدا وزي الفل وملك الملوك واحسن واحد في العالم طب بزمتك لو انتي مكانه وفاكرة نفسك احسن حد في العالم حتفكري اصلا تتغيري ؟ ولا لو حد قالك لازم تتغيري حتقولي عليه مجنون ؟ النرجسي بقى بيقول عليه مجنون وكمان بيقدر يقنعه ان هو اللي مجنون والعيب فيه ودة اللي بيحصل عادة مع زوجة النرجسي وخصوصا لو كانت من النوع المتعاطف . طيب وبالنسبة للجزء الاسود اللي مستخبي جوة النرجسي اللي هو النفس المزيفة دي كمان هو مش عايز يغيرها؟ طبعا هو مش معترف بوجودها اصلا ومستحيل يخلي اي حد يكتشفها عشان كدة زي ماقلنا مش بيحب انه يكون في علاقة حميمية عشان مينكشفش اللي جواه لحد وتلاقيه كل ماتقربي منه جدا نفسيا وعاطفيا يفجر خناقة كبيرة عشان يبعدك ويحطك برة حدوده اللي هو حاططها لتأمين نفسه الحقيقية . وبالتالي هو مش حيكون عايز يفتكر انه عنده عوار داخلي وكمان انتي شايفاه وعايزة تغيريه فهو بيرفض دة تماما وبيتهمك بانك بتتآمري عليه وتقللي من قدره فبينتج عن دة الغضب النرجسي اللي بتشوفيه وهو يروح يقول هي اللي استفزتني كالعادة.
تيودور بيقول هنا ان النرجسي الخفيف اللي في اول درجات النرجسية مش عايز يتغير عشان معندوش استعداد يعمل مجهود ويضيع طاقته في التغيير وينشغل عن تجميع الوقود النرجسي ، اما النرجسي الخبيث فمش عايز يتغير عشان هو مستمتع بحالته دي وبتعذيبه للي حواليه وبيقول انهم (اللي حواليه )عبارة عن بيادق شطرنج بيستمتع بتحريكهم زي ماهو عايز ، وانه بيستمتع بالسيطرة على شريكه وباللعب بيه وبإغضابه وبإحباطه وبإهانته لان دة بيشعره بالقوة (منتهى الحقارة).
خدي بالك انتي لما بتحاولي تغيري بيكون على اساس انك متخيلة ان الشخص اللي عرفتيه في اول العلاقة اللي كان حبوب ومتفاني في حبك وكان اد ايه جميل خارجيا وداخليا دة انتي متخيلة انه شخص حقيقي ، واحنا طبعا فهمنا من البوستات اللي فاتت انه مش حقيقي ابدا وانه قناع حاطه وانه نفس مزيفة ، يعني الانسان اللي انتي حبيتيه وفاكراه بيحبك مش موجود اصلا دة كان كرتون وخلص ، فانتي عايزة تغيري على اساس انه النرجسي عنده حاجة حلوة وحاجة وحشة فانتي عايزة تساعديه يخلص من الحاجة الوحشة اللي فيه ودة طبعا مش حقيقي هو النرجسي عبارة عن تكوين شيطاني ممزوج بالطين البشري مفيش فيه اي حاجة حلوة ، الحاجة الحلوة دي كانت خيال فمفيش حاجة اصلا حتساعدك في تغييره مفيش حد يقدر يغيره غير ربنا فريحي نفسك ووفري مجهودك في انك تخرجي من ادمان النرجسي او في تحسين احوالك المادية عشان تقدري تسيبيه ووفريها كمان للتركيز على اولادك اللي اكيد حيكونوا محتاجين يتعالجوا بعد مايبعدوا عن ابوهم النرجسي او حتى انتي تبعديهم عنه نفسيا لو مفيش امل تبعدوا عنه جسديا .
خدي بالك كمان ان النرجسي لئيم وفاهمك وعارف انك بتحاولي تغيريه وهو بيحب الالاعيب والمناورات فلما حيحس انك ناوية تبذلي مجهود في تغييره حيلعب بيكي لعبة قذرة منها يخليكي تستمري معاه فترة اطول ومنها ياخد منك وقود نرجسي من الاحباطات اللي حيسببها لك ، (ودة بيكون افيد له من تفجير غضب نرجسي زي ماقلت في اول البوست وكمان دة بيتوقف على مدى خبث نرجسيته)هو في البداية حيوهمك انه حيتغير وممكن يقول لك مثلا : انا عايز اتغير بس مش عارف ازاي ، ارجوكي ساعديني ، محدش حيقدر يساعدني غيرك ، اوعدك اني حتغير ، اقسم لك ان دي اخر مرة ، …… وهكذا . لحد مايقنعك انك تساعديه ويوهمك انه بدأ يتغير ويوصلك لفرحة عظيمة بالتغير وبعدين يفاجئك بغضب نرجسي ملوش اي سبب ولا داعي عشان يشوف مدى احباطك وصدمتك وحزنك على وقتك ومجهودك وصبرك معاه ومحاولة مساعدته ويبقى كأنه بيطلع لك لسانه ويقولك ضحكت عليكي ، كنت بهزر ، مش حيحصل اني اتغير ومش حسمح لك تغيريني .
تيودور بيقول متسمعيش لاي حد بيدعي انه غَيَّر النرجسي لانه مبيكنش غيره هو بيكون يا اما النرجسي خدعه وفهمه انه اتغير او ان النرجسي كان كبيييير في العمر وعنده شيء من الليونة في التصرفات وحاصل عنده شوية تحسن في التصرفات بسبب الضعف اللي بيحصل نتيجة الكبر والشيخوخة لكن دة مش استئصال للنرجسية اللي جواه .
انا اعتقد ان الحكم على التغيير في الشيخوخة دة ملناش فيه لان دة بيدخل في حسن الخاتمة او سوء الخاتمة وهل ممكن يتوب ولا لأ وطبعا بيتعاقب على اللي عمله في الناس وربنا له في خلقه شئون واحنا بنشوف انتقام ربنا منهم في شيخوختهم وفي امراضهم وفي اذلالهم للي كانوا هم بيذلوهم ، المهم ان مسألة الخاتمة دي ملناش فيها مع الثقة في ان ربنا عادل ولايمكن يضيع حق حد .
تابعونا على الفيس
اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11
قناة التلجرام
https://t.me/learnaboutnarcisest