لا تتحديه بشكل ظاهر : شوفي هو الكاتب نرجسي فبيقول لا تتحديه اصلا ، لكن انا شايفة انك تتحديه وتتحدي ابوه بس بذكاء وحكمة يعني مينفعش اي انسان مهما كانت قوته يقف ادام الاسد ويقول له اتحداك انك تقدر تاكلني دة يبقى غبي ومش سوي وبيتخبط لكن الانسان الطبيعي الذكي يعمل حفرة يوقع فيها الاسد ، وبرضه كدة بيبقى بيتحداه لكن تحدي عقل مش تحدي عضلات
عشان كدة انا شايفة انك تقدري تتحديه لاني متأكدة ان اي انثى اذكى من اي نرجسي مهما بلغت درجة ذكاءه ، المهم انك لاتتحديه علنا ، متقوليش له انا بتحداك لانه مش حيسمح لك بالرغم من انه عايزك تتحديه ، يعني ايه الكلام دة ؟ يعني هو عايزك تتحديه عشان ميسمحلكيش ، عشان يدخل في نوبة الغضب النرجسي ويبقى عنده اسبابه المنطقية (بالنسبة له ) او عشان يفَشِل تحديكي دة ويهده وهو يقدر فيهدك وينتصر وياخد وقود نرجسي ، او عشان ينفذ حاجة معينة في دماغه ومش عارف ينفذها ازاي فيفضل يستفزك لحد ما تقولي له اتحداك تعملها فيعملها ويقول هي اللي استفزتني وتحدتني (زي الجواز التاني مثلا او الخيانة او يخليكي برة ويغير كالون باب الشقة ،….) يعني التحدي الظاهر منك حيمكنه منك طبعا وحيسهل له الهجوم عليكي ، فمهما استفزك لاتتحديه بالكلام ابدا . لكن تحديه بالفعل بدون ماتعرفيه نواياكي ، تحديه بـإنك متبينيش له ضعفك وانهيارك ولا تعطيه اي نوع من انواع الاهتمام ، تحديه بإنك متهتميش بكلامه الجارح اللي بيستفزك بيه ولا بتهديداته مهما كنتي خايفة متبينيش له خوفك ، اكبر تحدي للنرجسي انك تقطعي عنه الوقود النرجسي حتشوفيه مكسور وبيلف حوالين نفسه ، هو دة التحدي الحقيقي
من ضمن الجمل اللي كاتبها جي اتش تيودور في موضوع التحدي. دة ( وانا كنت نزلتها لكم في بوست ) ان هو يحبك تتحديه ليه : “ نحن نحب ان نرى وجهك يتقطع من الغيظ ونرى دموعك وانهيارك فنرى كم نحن اقوياء فنحن من تسبب في هذا “ ….. حسبنا الله ونعم الوكيل
٨- متحاوليش تفهميه : يعني متحاوليش تفهمي هو بيفكر في ايه ومتحاوليش تفهمي هو متضايق ليه ومتحاوليش تفهمي اي حاجة لان هو مش شخصية واحدة عشان تفهميها هو عبارة عن عدة قطع او شرائح من عدة شخصيات هو ركبها وعمل منها الصورة الجميلة اللي ظاهرة للناس ، هو اختار من كل شخص يعرفه احسن حاجة فيه وفضل يقلدها لحد ما اتقنها وصدق انه ده هو نفسه وهي دي الصورة المزيفة او النفس الزائفة اللي هو عايش بيها وبيخبي وراها النفس الهشة الحقيقية اللي مش بتظهر غير خلف الابواب المغلقة . المهم انك حتلاقيه مثلا مكشر وزعلان وممكن بيبكي وفجأة في اقل من ثانية تحول لشخصية مرحة وبيضحك ، أو يبقى بيضحك وبيتعامل طبيعي وفجأة كشر وبرأ بدون اي سبب وجيه ، فهو متحول ومضطرب وعشوائي ومتناقض وسريع التحول من حال لحال ودة بيلخبط اي حد مهما كان ذكي او فاهم ، فانتي مطلوب منك انك تقرأي وتفهمي شخصيته وتثقفي نفسك وتقوي نفسك وتقفي علي مشاكلك الذاتية وتحليها وتطوري ذاتك وتتصالحي مع نفسك وفي نفس الوقت تذاكري شخصية اللي ادامك من الكتب والقراءة مش منه لان هو غالبا مش فاهم نفسه ، ومتحاوليش تسأليه مالك زعلان ليه ولا بتفكر في ايه لانه مش حيرد ولو رد حيكذب . دة غير انه اصلا ممكن يكشر لك ويعمل نفسه حزين عشان تلفي وراه في الشقة تسأليه مالك وتتحايلي عليه ودة وقود نرجسي ومش بس كدة دة كمان حيفضل سايبك تتحايلي لحد مايشبع ويروح مزعق لك ويقول لك ماقلت لك مفيش ويهزمك نفسيا ويهينك ويحبطك وطبعا كدة احلي وقود اخده منك بسبب طيبتك وتعاطفك ودة غالبا بيحصل كتير في اول مرحلة التحطيم بعد كشف القناع لانك بعد كدة بتفهمي وبتبطلي تقولي مالك لكن اللي لسة في الاول بيتعمل فيها كدة كتير ، فاللي لسة في اولا الطريق تاخد بالها وتسيبه يولع في نفسه .
واللي في الاول خالص وعلى البر تهرب ومتكملش عشان ربنا حيحاسبها لو استمرت بعد ماعرفت المعلومات دي
اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11
قناة التلجرام
https://t.me/learnaboutnarcisest