شوية حاجات خطر تعمليها مع النرجسي دة لو انتي قاعدة معاه ومش ماشية ولو انتي عملتيها متعمليهاش تاني ولو انتي لسة في علاقة جديدة انتبهي (١)
١- متصدقيش الاطراء : طيب تعرفي ازاي ان الموضوع فيه حاجة غلط ؟ لما الموضوع يبقى مجاملة ورا مجاملة ورا مجاملة يبقى فيه حاجة غلط ، لما تلاقيه بيمدح حاجة انتي بتحبيها وانتوا لسة عارفين بعض جديد دة مش معناه انه بيحب اللي انتي بتحبيه لا دة معناه انه دور لما عرف بتحبي ايه وبيشتغلك فمتتأثريش وتقولي انه مهتم بيكي ، متثقيش في اي كلام يقوله خصوصا بعد ماتكتشفي انه نرجسي ، وخدي بالك لو منعتي عنه الوقود النرجسي حيبدأ القصف العاطفي من اول وجديد وطبعا حيكون هادي وجميل فانتي بمنتهى الهبل والعبط تليني وترجعي زي ما كنتي ويلف تاني يديكي ٣٠ الم على سهوة
٢-متدخليش معاه في اي التزام بسرعة : زي ماقلنا قبل كدة لو خطيبك حيحاول يحول علاقتكم لعلاقة جنسية بأقصى سرعة ولو مقدرش حيعجل بالزواج ولما يعجل بالزواج حيعجل بالاولاد طبعا عشان يضمن ربطك اكتر ، خدي بالك ( اللي على لسة مجابتش اولاد) و حتي في التزاماتك في البيت ومع الاولاد اوعي تفرضي على نفسك مهام المفروض هو يقوم بيها وهو حيحاول اصلا يفرضها عليكي بنعومة خيالية ، ازاي ؟ لوسمحتي خدي الزبالة في ايدك وانتي نازلة ( اللي هي مفروض شغلته ) ولو اخدتيها المرة اللي بعدها لو مأخدتيهاش حيسألك انتي مأخدتيهاش ليه ، ولوسمحتي وصلي ماما للدكتور بدالي عشان عندي شغل و بعد كدة دي حتبقى شغلتك مش شغلته وتوصيل الاولادمدارسهم وكل المشاوير اللي هو مفروض يعملها حتلاقي نفسك بتعمليها بداله ، طب نعمل ايه ؟ في لحظة صفا كدة وهو رايق لاي سبب ارمي عليه المهمة اللي عايزة تخلصي منها بنعومة وحنية وخصوصا لو عايز منك حاجة حيروح المشوار ، كام يوم وتعيديدها وهكذا لحد ماتردي له كل مهامه وحاذري انه يرجعها لك تاني ولو لسة مأخدتيش مهامه اصلا خدي بالك لاتلزمي نفسك ابدا بأي شيء مش مفروض عليكي
٣- شوفي لا تدخلي معاه في شراكة ولا تسلفيه ولاتعرفيه اصلا ان معاكي فلوس واذا عرف سلفيهم لحد واذا اخد منك فلوس خلي حد يستلف منه وبعدين خديهم انتي من الحد دة وكدة كدة نكد فخدي فلوسك من عينيه ولو بيضرب حيضرب من غير ماتاخديهم ولو مش بيضرب وبينكد بس برضه حينكد من غير ماتاخديهم يبقى نكد بنكد بس خدي حقك ، هو بيكون شايف انك كلك على بعضك بممتلكاتك ملكية خاصة له ، ( عندي حالة كانت بتدور على شغل ولما ربنا كرمها واشتغلت قال لها الحمد لله كنت عارف ان ربنا حيرزقني !!!! وهو بيشتغل ومرتبه كبيييير جدا اكبر من مرتبها ، لكن هي دي نظرته ) . يقول اتش جي تيودور المصنف نرجسي عن نفسه والنرجسيين “ نحن مناطق الكوارث سيئة السمعة في المسائل المالية “
٤- متحاوليش تكوني منطقية معاه لانه هو مش منطقي هو شايف انه صح على طول وانتي واي حد يخالفه غلط ، لانه شايف نفسه احسن حد وبالتالي مستحيل حيوافق علي اي كلام يقول انه بيغلط او مش فاهم او وجهة نظره غلط ، وطبعا انتي من الرعاع اللي هو سيدهم فإزاي حتكوني صح وهو غلط مهما كنتي منطقية وهو غير منطقي فهو مش حيعترف بغلطه ولا حيتناقش معاكي بمنطقية ابدا بس حيجادل طبعا بالباطل ويعصبك وينبسط ويوحي لك انه قرب يقتنع فانتي تهدي حيلك في الكلام وفجأة يقول لك جملة مجنونة تجننك وتقومي تتنططي وهو ياخد وقود نرجسي على حساب اعصابك وصحتك ، يبقى المنطقي انك لا تتناقشي معاه في شيء على الاطلاق ، طلباتك منه تعتمد على تهديد غير مباشر بشكله ادام الناس ، غير كدة مش حتاخدي منه حق ولا باطل
٥- اخطر حاجة عملتيها وحتفضلي تعمليها لو مكنتيش تفوقي لنفسك هي انك تشاركيه اوجاعك وتعرفيه نقاط ضعفك ، مش عشان حيستغلها ضدك وبس ، لا دة كمان حيعرف يطلع منك ردود الافعال اللي هو عايزها عشان ياخد بيها نشوة ومتعة كوقود نرجسي ولو كنتي عرفتيه نقط ضعفك ابدأي اتخلصي منها ( بالصلاة والدعاء والقراءة والتثقيف والعلاقات السوية ، ارجعي لصديقاتك واخواتك واهلك وتفاعلي مع جيرانك ) وبعدين هو حيشوف ان ملكيش نقط ضعف فمش حيعرف ياخد منك اللي هو عايزه ولا حيعرف يستغلك

تابعونا على الفيس
اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11