عشر صفات لازم تتخلصي منها عشان تتخلصي من ارتباطك بالنرجسي ومتقعيش تاني فريسة له ولا لغيره
ليه النرجسي اختارك ؟ وليه اختار اللي بعدك ؟
النرجسي بيختار ضحيته بناء على احتياجاته ، هو عايز ايه ؟ عايز الوقود النرجسي فبالتالي بيختار اللي حتقدر تديه اكبر قدر من الوقود . طيب ايه اللي عرفه ان انتي حتديه الوقود دة ، عرف ازاي انك عندك الصفات اللي تؤهلك لخدمة الملك العظيم النرجسي ؟ انا حقولك ازاي . هم عشر حاجات بيشوفهم فيكي وبيكونوا دليل قاطع على انك الضحية المنشودة
١- بيشوفك حد مش بيتكلم عن نفسه ولا احتياجاته ولا بيقول رأيه في اي موقف عشان ميحرجش اللي ادامه ومش مهتم بخططه ولا ترتيباته زي ما مهتم بخطط وترتيبات اللي حواليه ودة بيبان عليكي في تعاملاتك مع الناس لو حد طلب منك اي طلب وانتي مش فاضية او عندك مشوار او اي حاجة شاغلاكي مش بتقولي لا انا مشغولة او عندي التزامات او انا مش عايزة اعمل دة او انا مش مقتنعة بدة ، لا انتي علطول موافقة وعمرك مابتكوني معترضة وبتخافي تكسفي حد ، كل دة معناه انك سهل السيطرة عليكي واستغلالك ( ودة ايه سببه ؟ انك مش بتحطي نفسك في الاول ، في اول الاولويات ، مش مدية نفسك حقها ولا قيمتها ولا بتلبي لها احتياجاتها ومخلياها اخر اهتماماتك ودة بيخليكي مستباحة وحدودك مفتوحة ودة لازم يتغير فورا ، من دلوقتي حطي احتياجاتك في المقدمة وحطي نفسك في اول اولوياتك )
٢- دايما عايزة تهدي الاخرين وتسعديهم ومهتمة بالكل ودايما تسألي دة ماله ودة ماله وزعلان ليه وتحاولي تحلي مشاكلهم ودة بيحقق لك سعادة لكن غير اصيلة ولا دايمة لانها من برة لجوة وانتي كمان لما بتكوني سعيدة بتبقي مش عايزة اللي حواليكي مش سعداء عايزاهم هم كمان سعداء فتبذلي جهد تاني عشان تسعديهم وهكذا حلقة مفرغة ودة طبعا بيخليكي مصدر وقود عظيم للنرجسي وبتكوني صيد ثمين له . ودي صفة لازم تتخلصي منها لان السعادة اللي بتيجي من برة مش دايمة لانها متوقفة على الغير لكن السعادة اللي من جواكي اللي ناتجة عن انك متصالحة مع نفسك ومسامحاها وبتحبيها دي السعادة اللي بتدوم ، بصي حواليكي وقولي لي كم واحد في حياتك بيحاول يسعدك وكام واحد انتي بتحاولي تسعديه ، وانتي حتفهمي انك لازم تسعدي نفسك بنفسك وتوقفي تصدير السعادة للاخرين قبل نفسك )
٣- انتي من النوع اللي دايما محتاجة تبرري تصرفاتك عشان تضمني انك تكوني مقبولة من الاخر وخايفة يزعل فدايما كل حاجة تبرريها وتقولي اسباب مش من حق حد يعرفها وحتى مشاعرك واختياراتك بتبرريها للي معاكي عشان تراضيه (شخصية ارضائية ) ودة وقود برضه هايل للنرجسي ، عشان تكوني نفسك لازم متبرريش نفسك لان انتي حلوة كدة زي ما انتي زي ماربنا خلقك انتي كدة حلوة داخليا واللي مش عاجبة يبعد ،
٤- لو انتي من النوع سريع الانفعال والقلق والخوف لدرجة الرعشة اثناء انفعالاتك دة بيبان في معاملاتك مع اللي حواليكي ودة معناه بالنسبة للنرجسي انك سهل السيطرة عليكي بالتخويف والترهيب ، لازم تتخلصي من الخوف ، حعمل حلقة عن الخوف ان شاد الله
٥- في مجال العمل او في انجاز اي مصلحة او في التعامل مع الاغراب بتكوني نشطة وجريئة ومنجزة ولكي تأثير جيد على الاخرين ومتحدثة لبقة واجتماعية فدة معناه انك واجهة كويسة وممكن تكملي الصورة الاجتماعية اللي بيصدرها للمجتمع واللي هي اصلا مصدر وقود من المجتمع كله
٦- لما تكوني من النوع اللي حاسة بالذنب طول الوقت ودة بيبان في كلامك ، زي مثلا تفتكري موقف حصل بينك وبين حد او اي تصرف انتي عملتيه وتقولي انا مش قادرة اسامح نفسي الجملة دي جملة غير صحية بالمرة ومش مفروض ابدا حد يقولها او يكررها ، دي مؤشر على الاحساس بالذنب والعار الدائم والمستمر واللي بحطم البني ادم ، او انك من النوع سريع الاعتذار وكثير الاعتذار ، او لو كنتي طول الوقت مش راضية عن انجازك وبالتالي مش راضية عن نفسك وحاسة انك مقصرة كل دة معناه انك حتبذلي قصارى جهدك عشان ترضيه من غير هو مايتعب و حيعرف يتلاعب بيكي كويس وبسهولة جدا لانك اصلا حاسة بالذنب لوحدك فلما هو يحاول يثبت الاحساس دة عندك مش حيكون فيه مقاومة منك
٧- بتجادلي كتير بس مش بتعرفي تاخدي موقف ودايما بتفشلي في انك تاخدي حقك او انك بيصعب عليكي اللي ادامك ومبترضيش تكسفيه اكتر من كدة فبتنسحبي متنازلة عن حقك ، ودة اكبر مصدر وقود للنرجسي الجدال هو بيحب الجدال لانه بيبرع في توصيل اللي ادامه للانهيار ودة طبعا الهدف
٨- اذا شافك شخصية اعتمادية وطول الوقت مستنية حد ياخد لك قرار ، طول الوقت مش عايزة تكوني لوحدك متعرفيش تعملي حاجة لوحدك متقدريش تعتمدي على نفسك خصوصا في الاحتياجات الشخصية ، ودة هو عايزه تماما لانك طول ما انتي كدة مش حتقدري تبعدي عنه مهما ذلك واذاكي
٩- لو لقاكي طول الوقت في مود وحش وكتير مكشرة ومتضايقة ومكتئبة دة بيحسسه انه ممكن يعاملك وحش طول الوقت لانك كدة كدة مكسورة ومكتئبة فبتوفري عليه طريق طويل انه يكسرك ، ودايما بلاحظ ان حالات كتير بتكون اصلا بتتعالج من الاكتئاب من قبل ماتعرف النرجسي وهو بيختارها عن قصد وكمان بتكون فريسة سهلة الصيد وسهل السيطرة عليها
١٠- انتي مش حاطة لنفسك حدود اصلا حدودك مفتوحة وسايبة كل اللي عايز يدخل يدخل دة طبعا لانك مبتعرفيش تقولي لا ، ومبتحدديش موقفك من تدخل الناس في حياتك ولا حتى في شغلك ، متطلبيش طلبات محددة ومفهومة ، مبتقوليش انتي عايزة ايه ومش عايزة ايه ، انتي شخصيتك هلامية مش واضحة ولا متحددة وبكدة بتكوني صيد ثمين برضه

اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11