الكيرتيكر غالبا بيجدوا صعوبة في تقييم نفسهم واعطائها الاهمية والاولوية اللازمة الحقيقة انتي مفروض تكوني اهم شخص في حياتك ، اذا لم تعتني بنفسك فالاختيار المقابل هو انك تستني حد يعتني بيكي وتفضلي اعتمادية وتدوري في فلك النرجسيين ، مطلوب منك تقدري نفسك وتكوني لكي قيمة بالنسبة للاخرين وتحصلي على تقديرهم لكن مش بطريقة النرجسي ، النرجسي عايز يكون اهم من الجميع لكن انا بقول لك تكوني مهمة عند نفسك عشان تكوني مهمة عند اللي حواليكي ، لما تقدري نفسك وتحسي بقيمة نفسك دة بيتنقل للاخرين عن طريق سلوكك ولغة جسدك ، شفتي انتي من نظرة النرجسي بتفهمي هو عايزك تعامليه ازاي وهو متوقع منك ايه ، نفس الكلام بالنسبة لك اللي انتي متوقعة انك تتعاملي بيه بيخرج منك للناس حتى من نظراتك لهم ومن تفاعلك معاهم ، فإذا انتي مقدرة نفسك الاخرين حتوصلهم الرسالة انك لكي قدرك وقيمتك
بطلي تحاولي تسعدي الاخرين
بطلي تهتمي بآراء الاخرين
من حقك تختاري حاجات جديدة
قيمي قراراتك
حب نفسك يأتي من معرفتك بيها وتقبلها والتعاطف معاها وتشجيعها ، لما تبطلي تحاولي تسعدي الناس وتبدأي تشاركيهم تميزك وقدراتك ومواهبك دة حيحسسك اكتر بالحرية والقيمة والسعادة
هل انتي لكي قيمة ؟ كونك لكي قيمة مش معناه انك احسن من اي حد ،لا معناه انك انك تقيمي نفسك كشخص جدير بالاهتمام ، شخص مفروض يُعتنى به ويهتم به ويتم حمايته ، وكمان معناه انك تتعاملي مع نفسك ومع احتياجاتك بجدية وتديهم اهتمام واولوية في حياتك ، بدون الاحساس بقيمة نفسك مش حتقدري توصلي لقوتك وحقوقك ولا حتقدري تنتبهي لاحتياجاتك ولا تحمي نفسك ، طول ما انتي حاطة احتياجات الاخرين قبل واهم من احتياجاتك طول ماحيقل احساسك بقيمتك وقيمة ذاتك ، وتخليكي ضعيفة وعرضة للاستغلال والتلاعب والسيطرة من الاخرين ، احتياجات الاخرين مهمة لكن انتي كمان احتياجاتك مهمة ، اهتمامك بالاخرين اكتر من نفسك حاجة غير صحية وحاجة غلط ولاتمت للمثالية بصلة لانك بتظلمي شخص لحساب باقي الناس والظلم عمره ماكان مثالية والشخص دة طبعا هو انتي .
لاحظي الناس اللي بتحبك ، شوفي بيهتموا بيكي ازاي وانتي حتفهمي انك اد ايه مهمة ،كمان لاحظي وحوارك الداخلي مع نفسك شكله ايه ، اذا كان ايجابي وتشجيعي ولا سلبي وكله تقليل وعدم احترام ، اذا كنتي بتشوفي نفسك مش مهمة وملكيش لاحول ولا قوة و مانتيش كفؤ او فاشلة كل دة بيوصل للي ادامك وبيحس بيه وبيعاملك على اساسه ، والدليل على كدة ان ضحية النرجسي اول ما بتتعافى وتحس بقوتها بيبان عليها ويبدأ النرجسي يسألها مالك انتي فيكي ايه انتي متغيرة ليه ، بالرغم من انها ممكن تكون ساكتة بس ما اخدتش اي موقف من اي نوع ، مجرد سكوتها ومجرد احساسها بنفسها ومجرد انها فهمت ان العيب مكنش فيها وانها انسان سوي مفهوش عيب خلى النرجسي يحس ان فيه تغيير حصل وفعلا بيبدأ يخاف ويستغرب ويبقى مش فاهم هي ازاي بقت قوية كدة لدرجة انه يبدأ يقول لها انتي حد لاعب في دماغك ليه ؟ عشان هو حس بالتغيير اللي حصل جواها لان احساسك بنفسك بيتترجم زي ماقلنا لتفاعل ولغة جسد.
دلوقتي حقولك على تمرين لطيف جدا لما تعمليه حتطلعي بفايدة رائعة ونفسية مختلفة
كالعادة هاتي ورقة وقلم واكتبي الصفات الايجابية وكل حاجة تلاقيها جديرة بالاهتمام في نفسك ، اذا مقدرتيش تملي الصفحة يبقى انتي محتاجة تركزي اكتر وتبصي جواكي اكتر وتحاولي تاني وكمان تطلب مساعدة اللي حواليكي واللي بيحبوكي وبتثقي فيهم (اهلك ، صاحباتك ، اولادك لو كبار ، زمايلك في الشغل ،….) تقولي لهم يكتبوا اي حاجة بيشوفوها حلوة فيكي في ورقة ويطبقوها ويدوها لك ومتفتحيهاش تشيليها في مكان لحد ماتجمعي كل الورق من الكل بس ميكنش حد كاتب اسمه في الورقة وياريت لو تجيبي نوتة صغيرة وتديهم منها الورقة عشان يكون الورق كله شكل بعضع عشان لما تقعدي وتفتحي الورق وتقرأي اللي فيه متعرفيش دي من مين ودي من مين عشان متفقديش قيمة الكلام وتقولي اه اصلها بتحبني عشان كدة قالت كدة ، الاحسن انك تقرأي من غير ماتعرفي مين اللي كاتب ايه . الكلام اللي حتلاقيه مكتوب هو دة وصفك الداخلي اللي الناس شايفينه ، دخليه في اعماقك ،بعد ماتقرأي الورق اكتبي اللي فيه وكملي الصفحة بتاعتك وكل ماتفتكري حاجة اكتبيها ، وكل ماتحسي انك قليلة او مش كفاية امسكي الورقة بتاعتك واقرأيها بصوت عالي تسمعي نفسك وشوفي تأثير الكلام عليكي ، لازم حتتغيري ونظرتك لنفسك حتختلف.
لازم يكون عندك استجابة لنفسك ولاحتياجاتك ولمشاعرك بالظبط زي مابتستجيبي لغيرك من اللي حواليكي لانك لو ما استجبتيش لنفسك حتبقي مستنية حد يستجيب لطلباتك (الاعتمادية ) ودة اللي دايما يجذب لك الناس المسيطرة .
حظر الكلام اللي عملهولك النرجسي بسبب الخوف لاتقولي حاجة تزعله ولا تتسبب في غضب نرجسي ولا يفهمها غلط ،او حتى منعه لكي من انك تقولي رأيك في اي حاجة عشان هو المفروض انه صاحب القرار عشان هو الراجل والكلام الكتير دة خلاكي بتخافي تتكلمي سواء في وجوده او غير وجوده خلاكي بتخافي تقولي رأيك لا يكون غلط ، وطبعا لانه حطم كمان ثقتك بنفسك ، وطبعا الوضع دة لازم ينتهي لازم تتكلمي وتعبري عن رأيك وعن مشاعرك بعيدا عن النرجسي ، ارجعي دربي نفسك انك تتكلمي مع اللي حواليكي وتعبري عن نفسك بعض الحالات بتقول انا مبقتش اعرف اتكلم ولا اطلع اللي جوايا والبعض الاخر عنده افراط في الكلام بس للاسف مش عن نفسها لا عن النرجسي ومش عايزة تسمع برضه اي كلام غير عن النرجسي حتى لو الكلام عن نفسها بيبقى تقيل ومش بتسمعه بشغف ، شفتي انتي وصلتي لايه ؟ لازم تعبري عن نفسك وتقربي من الناس وتقتلي الخوف اللي جواكي .

اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11