اية العلامات اللي بتكون دليل على ان الشخص اللي خرج من علاقة مؤذية تعافى تماماً و استرد صحته النفسية و أصبح قادر على التعامل كشخص طبيعي
١- اول حاجة انه مش فارق معاكي وجوده من عدم وجودة يعني لابتضايقي ولا بتنبسطي لما بتشوفيه مبقاش فيه اي احساس زيه زي اي واحد غريب متعرفيش عنه حاجة
٢- غضبك وغيظك منه اختفى ورغبتك الشديدة في الانتقام شبه اختفت
٣- حتلاقي نفسك مش فارق تفتحي البلوكات او تسيبيها و مهما حاول يقرب لك تاني او يحسن صورته ادامك حتحسي انه عيل بيلعب ولا له عليكي اي تأثير
٤- اصبحتي خبيرة في النرجسيين ، يعني مستحيل تنجذبي لهم ولا تجذبيهم وكمان حتشوفي الرد فلاجز العلامات الحمراء بسرعة مش حيعرفوا يخدعوكي تاني
٥- بقيتي عندك امل في حياة جديدة احسن من اللي كنتي عايشاها بدون اي امل
٦- نظرتك لتجربتك مع النرجسي بتتغير كل ما ارتفع مستوى تعافيكي ، يعني بعد ماكنتي شايفة انها صدمة وكارثة وبعدين بقيتي بتشوفي انها سنين عمرك راحت ع الفاضي ، وبعدين بقيتي تشوفيها ابتلاء من ربنا ، حتبدأي تشوفي انها تجربة علمتك حاجات كتير وفهمتك الدنيا وطلعتي منها بأولادك وكانت سبب في قربك من ربنا وتعرفك عليه بشكل مختلف فيه الحب والتوكل والتفويض وحاجات كتير اكيد مكنتيش تعرفيها عن ربنا الرحمن الرحيم الصمد اللي بترمي حمولك عنده وهو يسندك ويقف جنبك ، نظرتك للتجربة اصبحت نظرة ايجابية وبتشوفي منها مكاسبك وبتنسي المخاسر وبتنتظري العوض من ربنا (حتي اللي عاشت عمرها كله معاه واكتشفت وهي عندها ستين سنة برضه لو تعافت حتحس كدة وحترضى بقدر ربنا وحتنتظر العوض منه برضه )
٧- بقيتي قادرة تتعاملي صح مع اولادك وقادرة تسمحي لهم يكونوا نفسهم وقادرة تتقبلي طفولتهم ومراهقتهم ومشاكلهم وقادرة تتحكمي في نفسك وعصبيتك بشكل جيد
٨- حوارك الداخلي اتغير من انا غبية اني صدقته وانا اخترت غلط وانا مغفلة وهو ضحك علي سنين لـ انا حنونة وكنت محتاجة احب واتحب انا اخترت الصور ةاللي هو عرضها علي بالكذب فالمشكلة فيه هو انه كذاب ومش سوي والدليل على انه مش مشكلتي ان كل اهلي صدقوه مش انا لوحدي
٩- بدأتي تعتمدي علي نفسك وتقضي مصالحك بنفسك ولو بالتدريج وببطء
١٠- بدأتي تحسي ان اوقات الابتسام والراحة النفسية والانشراح في حياتك بقت اكتر من اوقات الحزن و الاكتئاب والقهر على اللي راح
١١- بقيت بتحسي بالرضا عن نفسك وبتحبي نفسك وبتثقي فيه وبتتعاطفي معاها وبدأت تبقى هي اهم حد في حياتك
١٢- اصبح عندك احساس بالحرية حتى لو انتي مستمرة معاه كعلاقة زوجية ، لان احساسك بالقوة والاستغناء عنه بيديكي شعور بالحرية وكمان بيخرجك من تحت سيطرته اللي كانت بتحسسك انك مسجونة
١٣- بقيتي مش محتاجة تكدبي عليه لانك بطلتي تخافي منه وبطلتي تلفي وتدوري وتعملي مقدمات لما تحبي تطلبي منه حاجة او حق من حقوقك لانك بطلتي الخجل الغير صحي
١٤- بدأتي تحسي انك تقدري تنافسي منافسة شريفة في اي حاجة بشكل صحي ولو حتى في الطبخ وحلاوة اكلك وبقيتي تقدري تحققي نجاحات وانجازات في حياتك زي مشروع صغير زي صفحة تتجاري عليها ع الفيس ، زي كورسات تديها في تخصصك ، اي نوع من انواع الانجازات والنجاحات
١٥- بقيتي عندك رغبة تحضني اولادك وتقربي منهم وحسيتي بوجودهم في حياتك بعد ماكنتي كل حاجة بتعمليها لهم بدافع انك تثبتي له انك كويسة او عشان تراضيه او عشان هو عايزك تعملي كدة كل دة كان بيخليكي تتفاني مع اولادك بدون ماتكوني مستمتعة بالعطاء لهم ولا حاسة بحبهم لكي لكن بعد التعافي المشاعر دي كلها بتتغير وبتلاقي امتع شيء في حياتك قعدة حلوة مع اولادك
١٦- اصبحت مشاعرك ايجابية وبقيتي متفائلة ودايما متوقعة ان بكرة احسن
١٧- بقيتي بتامي كويس والارق اختفى تماما
١٨- بقيتي فاهمة ومدركة تماما ان
(١) الموضوع مكنش غلطتك والمشكلة كانت فيه هو ،بطلتي تلومي نفسك تماما
(٢)حبك له مستحيل يشفيه ولا يغيره ومبقتيش تحاولي ابدا تغيريه ولا عايزة اصلا
(٣) العلاقات الصحية حق من ابسط حقوقك وتقدري تحصلي عليها مع اشخاص اصحاء بغض النظر كانت علاقة زواج او صداقة او اخوات
(٤) انك مش ملزمة تبرري تصرفاتك لحد طالما مبتعمليش حاجة تغضب ربنا ولو عملتي حاجة تغضب ربنا فانتي محتاجة تكلمي ربنا وتستغفريه مش محتاجة تبرري تصرفك لحد غيره
(٥) مش انتي الشخص اللي مفروض يتلام في العلاقة دي ولا انتي اللي كنتي مجنونة ولا فيكي اي حاجة غلط
(٦) انتي تستحقي الحب والاحترام وتستحقي تاخدي زي مابتدي وتستحقي حياة افضل


اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11