ازاي تستردي ثقتك بنفسك بعد ماحطمها النرجسي ؟؟
حقولك ٦ حاجات تعمليهم عشان ترجعي ثقتك بنفسك ودة من كتاب healing from narcissistic relationship الشفاء من العلاقة النرجسية لدكتور مارجاليس فيجيلستاد .
عشان ترجعي ثقتك بنفسك لازم تغيري تصرفاتك وسلوكياتك وطريقتك في الحياة ، لازم تحيدي الخبرات او التجارب القديمة المؤلمة يعني ايه تحيديها ي؟ يعني توصلي نفسك لمرحلة انها مبقتش تحزنك وتزعلك وانها بقت جزء من الماضي منسيتيهوش لكن قادرة تتعايشي معاه ومتصالحة مع نفسك فيما يخصه .
١- استدعي قوتك الداخلية
يعني ايه قوتك الداخلية؟ كل انسان ربنا خلقه له بداخله قوة خاصة بيه واحد قوته في ذكائه واحد قوته في طيبة قلبه وواحد قوته في صبره وواحد قوته في تواصله القوي مع البشر وهكذا كل انسان وله ميزة ربنا اداها له محدش معندوش لان ربنا عدل ، لكن اللي بيحصل اننا إما بنتنازل عنها او او اننا بنتعرض لشخصية زي النرجسي بتسلبنا كل ما اوتينا من قوة ، وعشان تستردي قوتك دي تاني لازم يكون عندك تناغم مع نفسك ، يعني ايه ؟ يعني فيه تواصل كدة بينك وبين نفسك فيه حوار داخلي وفيه اتصال وفيه تصالح ورضا ودة غالبا بتفتقده ضحية النرجسي لانها دايما بتلوم نفسها على انها اتخدعت واتضحك عليها واسائت الاختيار وكل الكلام دة انا رديت عليه عليه في حلقات التشافي ٦و٧ وشرحت لك انتي ازاي اتضحك عليكي وانك ملكيش ذنب في اللي حصل وححط لك لينك الحلقتين في اول كومنت ، مطلوب منك تتصالحي مع نفسك وتسامحيها وتطبطبي عليها كمان ، دلوقتي حقولك طريقة تساعدك على انك تعرفي قوتك الداخلية
هاتي ورقتين و اكتبي في الاولى نقاط القوة والمواهب ، ازاي يعني؟ ركزي كدة وافتكري وانتي طفلة ووانتي مراهقة ايه الحاجات اللي اتعلمتي تعمليها بما فيها القدرات الشخصية ، زي ايه ؟ زي كونك صديق جيد ،او انك مخلصة ، عطوفة ، مساعدة ، وكمان المهارات اليدوية زي الطبخ ، قدرة على تنظيم الماديات(تمسكي مصروف البيت مثلا) ، بتعرفي تنظمي اعياد الميلاد او الرحلات (منظم جيد) ، مش لازم تكوني ممتازة في الحاجات دي لكن يكفي تكوني بتعرفي تعمليها ، بعد ماتخلصي الورقة الاولى تجيبي الورقة التانية وتكتبي فيها بقى الحاجات اللي حبيتيها واستمتعتي بعملها على مدار حياتك برضه مش لازم تكوني ممتازة فيها المهم بتعرفي تعمليها وبتحبيها وبتستمتعي وانتي بتعمليها ، خلي الورقتين في متناول ايديكي وكل ماتفتكري حاجة ضيفيها وفي الاخر تطلعي المتكرر
هاتي الورقتين بقى وحطيهم جنب بعض وشوفي ايه اللي اتكرر في الاتنين يعني ايه اللي موجود في الاولى والتانية برضه وهو دة اللي اتكرر هو نقاط القوة عندك وشغفك .
ودة حنستفيد منه في ايه ، مجرد احساسك انك عندك حاجة انتي بتحبيها وبتستمتعي بعملها وبتعرفي تعمليها فدة قوة داخلية ترجع لك جزء من ثقتك بنفسك والاعظم من كدة انك تجربي تعمليها وتنجحي فيها ودة حيديكي ثقة مهولة في نفسك .
حقولك مثال حاطه دكتور مارجاليس بغض النظر عن الفوارق بينا وبينهم في الاهتمامات بس هو مثال توضيحي :
الورقة الاولى : مساعدة الاخرين ، حب الكلاب ، تستمتع بالحديث مع الناس ،
الورقة التانية لعميلة عنده كان فيها من ضمن اللي كتبته هو مكتبش كل الورقة هو كتب المهم : انها بتكون صداقات بسهولة ، عطوفة ، مساندة جيدة ، مصففة شعر جيدة، جيدة في المبيعات
من الورقتين قدرت تعرف حتعمل ايه في حياتها لانها كانت مطلقة من نرجسي وبدون عمل ولقت انها عندها نقاط قوة هي عطوفة وبتساعد الاخرين وبتجيد الكلام مع الناس ودة معناه انها عندها قوة التواصل مع الاخرين وفي نفس الوقت هي شاطرة في المبيعات وبتحب تصفيف الشعر وبتحب الكلاب طبعا الدكتور ساعدها في التوصل للنتيجة انها ممكن تصفف شعر الكلاب واشتغلت في صالون للكلاب ( دة عادي جدا هناك ) وعشان هي عطوفة وبتحب الكلاب قدرت تنجح معاهم وعشان هي عندها قوة التواصل عرفت تعمل زباين كتير وفتحت لنفسها صالون في بيتها بأقل التكاليف وقدرت توصل لثقة جيدة بنفسها لان النجاح من ضمن الحاجات العظيمة اللي بتنمي الثقة بالنفس

تابعونا على الفيس
اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11
قناة التلجرام
https://t.me/learnaboutnarcisest
الكتب :
١- Becoming the Narcissist's Nightmare
٢- In sheep's clothing
3- healing from narcissist