٣- اثناء مواجهة تصرف من تصرفات النرجسي احرصي على انك تحمليه مسئولية تصرفه
طبعا لما تواجهيه بتصرف غلط اول حاجة حيقولك انتي السبب انتي اللي مقصرة معايا انتي اللي استفزيتيني اي حاجة واي كلام عشان يرمي عليكي المسئولية ويهرب هو منها لكن انتي مترديش على الكلام دة وارجعي قولي له انا بتكلم على موقف حصل حالا انت عملته منقطع الصلة بامبارح وبكرة دة حصل حالا وانت مسئول عنه وانا مش قابلاه نهائيا واوعي تدافعي عن نفسك ، وفي نفس الوقت متكونيش عدائية زي ماقلنا عشان متديلوش فرصة يقول انك اعتديتي عليه ويلوي الكلام ويطلعك غلطانة وانتي اللي صاحبة الحق ، عشان كدة لازم تمسكي اعصابك وتتجنبي السخرية والعدائية والتقليل اثناء المواجهة ، يعني زي مابيقولوا بالبلدي كدة متشتميش المجنون عشان متبهدليش نفسك

٤- اطلبي لنفسك
لما يكون لك حق مفروض تاخديه اتكلمي عن نفسك واطلبي لنفسك ومتاخديش اولادك درع حماية وانتي بتطلبي يعني لما تكوني محتاجة تخرجي مثلا مينفعش تقولي الاولاد محتاجين يخرجوا لا النرجسي عارف وفاهم انك بتخافي تطلبي وبتتجنبي الطلب عشان تتجنبي غضبه ودة بقويه عليكي اكتر وبيخليه يتلاعب بمشاعرك ويزود احساسك بالذنب لمجرد انك تطلبي حق من حقوقك وكمان هو عارف انك بتخجلي وهو بيزود عندك الاحساس دة عن قصد لحد ما اصبح الاخجل والاحساس بالذنب عندك احساس مرضي مش طبيعي ، عندي حالة كل ماتطلب تخرج يقول لها امال بتصلي وتقرأي قرآن ايه بس وعايزة تخرجي يعني بيحسسها بالذنب ويخجلها من نفسها لانها طلبت تخرج وهو مانعها اصلا من الخروج لوحدها ولازم هو اللي يخرجها يعني مسجونة ولما تفتح بقها يوهمها انها كدة بتطلب معصية ويفتري علي ربنا ، المفروض بقى انك تفهمي ان من حقك تطالبي بحقوقك ومن حقك تخرجي وتروحي عن نفسك ربنا مخلقش جمال الطبيعة للرجال دون النساء محدش قال كدة ابدا ، المهم لما تطلبي حق من حقوقك تقولي لوسمحت انا محتاجة كذا دربي نفسك على انك تطلبي وتكسري نقطة الضعف دي ، واحيانا بعض الحالات لما تبدأ تطلب النرجسي بيرتبك ويقلق ويحس ان فيه حاجة غلط لانها بتعمل حاجة جديدة مش موجودة في سيناريو النرجسي اللي هو راسمهولك فبيحصل عنده ارتباك وقلق وممكن يقاوم التغيير دة بكل قوة عنده عشان يرجعك للقالب اللي هو عايزك تكوني فيه فإوعي تخافي ولا تتهزي ، هو في الاول حيكون زي الثور المذبوح بيرفص في كل اتجاه وفي الاخر حيرضخ او حيسيبك ويمشي يدور على غيرك ودة غالبا مش اللي بيحصل لان غالبا النرجسي بيتمسك بفريسته وحقولك الجزئية دي بالتفصيل ليه هو بيتمسك بفريسته وامتى بيرميها في حلقة منفصلة ان شاء الله
تابعونا على الفيس
اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11
قناة التلجرام
https://t.me/learnaboutnarcisest
الكتب :
١- Becoming the Narcissist's Nightmare
٢- In sheep's clothing
3- healing from narcissist