(٥) حطي حدودك وكوني قوية ومتخليش حد يعدي الحدود دي ابدا مهما كان مين
خلينا نشرح يعني ايه حدود اصلا ؟
شوفي انتي قيمتك ايه عند نفسك ؟ انتي شايفة انك تستحقي ان الناس تعاملك ازاي ، انتي ممكن تقبلي اي نوع من المعاملة ؟ الاسئلة دي لازم يكون لها اجابات واضحة جدا عندك عشان تقدري تفهمي يعني ايه حدودي وازاي ابنيها وازاي احميها
يعني انا بحترم نفسي جدا ومحبش الهزار كتير ومحبش اتكلم مع اي حد في اي حاجة ومحبش حد يتدخل في خصوصياتي ويسألني عن حياتي الخاصة ، احب اعمل واجباتي فقط ومحبش اخد مسئوليات غير مسئولياتي ، احب اساعد اه لكن محبش حد يستغلني ، احب لما اطلب حقي اخده ومحدش يبخثني حقي ، احب ان يبقى لي وقت لنفسي اختلي فيه بنفسي محدش يتطفل علي فيه ، محبش حد يزورني من غير موعد ، احب احافظ علي مواعيد نومي وصحياني ومحبش حد يضطرني اني اسهر واغير اسلوب حياتي ، احب لما اتناقش مع حد يحترم رأيي ويحترم اختلافي معاه في الرأي وميكلمنيش بسخرية ولا استهزاء حتي لو كان رأيي غلط ، وطبعا انا ملتزمة بكل دة مع الاخرين عشان كدة مفترض ان الاخرين يلتزموا معايا بيه . طبعا مش كفاية اني التزم عشان هم يلتزموا الاخر احيانا بيكون محتاج انك توضحي له حدودك ، طب ازاي توضحيها بالتعامل ، انتي فاهمة حدودك فلو حد تعداها انتي حتضايقي ففورا لازم تقولي لا انا مش بحب دة لو سمحت متقولش كدة لو سمحت انا محتاجة اكون لوحدي ، لو سمحت اعمل الحاجة الفلانية لان دي مسئوليتك ، انا اسفة مش حقدر اعمل الشيء دة بدلك لان معنديش وقت او تعبانة او مش عايزة اعمل دة .
يبقى دلوقتي فهمنا ان الحدود دي بتتبني عن طريق حاجتين
1- انك تكوني انتي عارفة حدودك ، يعني عارفة انتي عايزة ايه ومش عايزة ايه ، بتحبي ايه ومش بتحبي ايه حتقبلي ايه ومش حتقبلي ايه
2- انك تكوني عارفة انتي حتعملي ايه لو حصل وحد تعدى على حدودك دي ولازم تكوني حتقدري تعملي اللي انتي قررتي تعمليه ، يعني قررتي تقولي لا ، يبقى لازم تعرفي تقولي لا . قررتي تمشي من ادام اللي اتعدى علي حدودك ، يبقى لازم تكوني عندك الجرأة انك تنفذي وتمشي من ادامه . وهكذا
الكلام دة بينطبق علي كل الناس بصفة عامة و على النرجسي بصفة خاصة لانه هو زي ماقلنا قبل كدة مبيعرفش يحترم حدود حد ولا عايز يكون فيه حدود اصلا .
من الحاجات المهمة جدا اللي حتساعدك انك تبني حدودك انك تفهمي ان دي حاجة من ابسط حقوقك ومن اساسيات احترامك وحبك لنفسك ، وانك بتحمي نفسك مش بتؤذي حد ، وانك مفروض متحسيش بالذنب ابدا لما تقولي لا لأي حد (وانتي لكي حق تقولي لا ) حتى لمامتك وباباكي ، من حقك تحمي نفسك ومترتبطيش بحد مش عاجبك فمن حقك تقولي لهم لا ، من حقك تدرسي اللي انتي عايزاه ومن حقك تشتغلي اللي انتي عايزاه ، من حقك تصوني كرامتك ولما يقولوا لك اصبري على الظالم من حقك تقولي لهم لا ، لكن لا بأدب واحترام .

تابعونا على الفيس
اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11
قناة التلجرام
https://t.me/learnaboutnarcisest

الكتب :
١- Becoming the Narcissist's Nightmare
٢- In sheep's clothing
3- healing from narcissist