(٥) ركزي على نفسك
معظم الcaretaker بيفضلوا مشغولين بالنرجسي طول الوقت لانها اصبحت عادة زي كل العادات ، انتي محتاجة تقفشي نفسك وانتي بتعتني بيه وتوقفي الرعاية دي فورا وفي كل مرة تنتبهي انك بتديه رعاية مش من حقه تتوقفي وتبدلي الرعاية دي بأي تصرف تاني واحسن بدل انك تراعي نفسك ( شوفي انتي بيبقى عندك احتياج انك تراعي حد ودة بيديكي متعة كبيرة اللي هي متعة العطاء فبيبقى صعب عليكي انك توقفي ودة مثلا زي انك لما تلاقيه متضايق تفضلي تسأليه مالك ، لو عنده مشكلة بتتطوعي وتحليها له ، لو بيفكر في حاجة تجهدي نفسك في التفكير وتديله اقتراحات ، تلاقيه مش عارف يعمل حاجة او بيدعي انه مش عارف او مش قادر او معندوش وقت تتطوعي انتي وتعمليها ، طول الوقت بتحاولي تسعديه ) نرجع بقى لتبديل الحاجات دي كلها لما تحبي تبدلي التصرفات دي فكري نفسك في ساعتها بآخر خناقة او تلكيكة او شتيمة او تحقير عمله فيكي بدون سبب ولا ذنب وانتي فورا حتقولي لنفسك وانا مالي وتبدأي تفكري في نفسك وتشوفي تراضيها ازاي وتصالحيها ازاي وتشوفيها حاسة بإية وعايزة ايه
واذا لقيتي نفسك عندك شلل فكري ومش قادرة تتوصلي لمشاعرك ، حقولك تمرين قاله مارجاليس في كتابه healing from a narcissistic relationship التعافي من العلاقة النرجسية ان شاء الله تعمليه وتقدري تتوصلي لمشاعرك
هاتي ورقة وارسمي فيها دايرة وقطعيها اربع ارباع واكتبي في كل ربع انتي حاسة بإيه في اللحظة الحالية فإذا موصلتيش غير لاتنين او ثلاثة كرري اقوى شعور في باقي الارباع ، يعني مثلا عندك شعور بالغضب والحزن ومش عارفة ايه كمان حتشوفي انتي غضبانة اكتر ولا حزينة اكتر لوغضبانة اكتر حتكتبي في الربعين الباقيين غضب وغضب واذا حزينة اكتر اكتب حزن وحزن ونفس الكلام لو كنتي عرفتي ثلاثة حيتبقى واحدة حتشوفي اقوى احساس عندك وهو برضه اللي حتكتبيه في الربع الفاضي ، ولو عرفتي توصلي للاربع مشاعر ممكن تلاقيهم متضاربين عادي متتفاجئيش ، يعني ازاي متضاربين ؟ يعني ممكن تحسي بالغضب والاحباط والالم والارتياح في نفس الوقت ودة طبيعي جدا بالنسبة لواحدة مصدومة وبدأت تتوصل لحل لمشكلتها او بدإت تحس انها فهمت حاجات كتير مكنتش فاهماها وانها مش حتكون مغفلة تاني ولا حينضحك عليها تاني
فكري بقي بقى كدة بالراحة في كل شعور منهم على حدة حاولي توصلي للسبب اللي اثار الشعور دة وخرجه على السطح ؟ زي مثلا ( انا تأذيت لما زوجي قاطعني في وسط كلامي واتريأ على كلامي )دة السبب ، وبعدين فكري تصرف زوجك دة خلاكي تحسي بإيه تجاه نفسك زي مثلا : ( انا حسيت بعدم الاهمية واني رخيصة ) . وآخر حاجة قرري انتي عايزة تعملي ايه في الشعور دة عشان تغيريه وتتغلبي عليه ؟ مثلا ( انا عارفة اني مهمة عند اولادي واصدقائي ومش مهم اصلا هو بيفكر فيا ازاي )
التمرين دة ممكن ياخد منك وقت قصير كام دقيقة وممكن ياخد كذا ساعة وممكن ايام ، دة بيتوقف على مدى سهولة او صعوبة اتصالك بنفسك وتوصلك او تعرفك على احساسك وشعورك وادراكك للاحداث اللي اثارت الشعور دة
خدي بالك انتي طول الوقت بتعملي كدة مع النرجسي طول الوقت تفكري ياترى هو حاسس بإيه ياترى هو متضايق ليه ، طب انا عملت ايه زعله طب ايه الموقف اللي حصل معاه خلاه جاي من برة زعلان وبتفضلي تفكري وتجهدي نفسك لحد ماتلاقي اي اجابة تسكت التفكير دة ، جه الوقت بقى اللي تعملي الكلام دة مع نفسك انتي دلوقتي اولى بالتفكير والمجهود دة ،
(٦) غيري ردود افعالك
طريقة تفاعلك مع النرجسي ومع تصرفاته وردود افعالك لازم تتغير عشان تقدري تكملي حياتك بشكل افضل ، طيب تغيري ازاي ردود افعالك تحاولي تكون ردود افعالك رمادية مش مفهومة خصوصا في المواقف اللي انتي مش عايزاه يعرف رأيك فيها اما المواقف الاستفزازية فلازم ميكنش لكي اي ردود افعال نهائيا عشان تمنعي عنه الوقود النرجسي بكل انواعه ، برضه في المواقف الايجابية منه اللي هو فيها بيحاول يعمل لك هوفرينج برضه بتخلي ردود افعالك رمادية الى حد ما زي ماقلت لك قبل كدة اوعي تحسسيه انك راضية عنه تماما وانك شايفاه سوبر زي ماهو عايزك تشوفيه لان لو وصله الاحساس دة حيقلب الهوفر ويدخل في تحقير او صمت عقابي فانتي دايما تتحكمي فيه عن طريق الوقود النرجسي طول ماهو عنده نقص في الوقود وانتي بتلوحي له بالجزرة انك ممكن ترضي وممكن تدي له وقود لكن بحساب طول ما انتي تقدري تسيطري علي الوضع ، كمان انتي محتاجة تحمي نفسك من التحطيم النفسي اللي بيحصل لك ، لازم تبطلي تكوني محكومة باحتياجاته ومتطلباته ورغبته الدائمة في انه يكون السيد وانتي العبد وهو الجيد وانتي السيء لان كل دة بيوصلك للغضب والالم والخوف والقلق وكل المعاناه فلا تتفاعلي مع احتياجاته ومتطلباته المنحرفة دي عن طريق تغيير ردود افعالك وتجاهلك للاحتياجات المسمومة دي

تابعونا على الفيس
اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11
قناة التلجرام
https://t.me/learnaboutnarcisest
الكتب :
١- Becoming the Narcissist's Nightmare
٢- In sheep's clothing
3- healing from narcissist