دلوقتي مخك بيفرز هرمون الدوبامين لما تشعري بالسعادة . كل ماتشعري بالسعادة المخ يفرز دوبامين ولما تكون السعادة مكثفة ويوميا (بداية العلاقة مع النرجسي ) المخ بيفرز دوبامين اكتر وبشكل مكثف وبيزيد عن معدله في الجسم يقوم الدوبامين دة يعمل ايه يزود الاحساس بالسعادة والنشوة ولما يزيد يزيد معاه الاحساس دة لحد ماتوصلي لادمان الاحساس دة بالظبط زي اللي بيحصل في حالة ادمان الكوكايين…. في دراسة عملها واحد اسمه فيشر سنة ١٩٩٢ بتقول ان الدوبامين هو المسئول عن ادمان الكوكايين وهو نفسه المسئول عن ادمان الشريك الرومانسي في العلاقة السمية ، بس كدة ؟ لا لسة فيه الاسوأ ! لما النرجسي يبدأ مرحلة التحقير ويبدأ يؤلمك ويهاجمك ويرجع يوهمك بالحب وهكذا بيلخبطك ويخليكي مش عارفة الخطوة الجاية ايه ضرب ولا حب فتيجي الجوايز او المكافئات ( اللي هي شوية حنية) على فجأة ومتكونيش متوقعاها يقوم يعمل ايه يخلي افراز الدوبامين اكتر بكتير من لو انتي متوقعاها عشان كدة احنا بنحب المفاجئات وبتسعدنا اكتر من الحاجات المتوقعة لان الدوبامين اللي بعزز الشعور بالسعادة بيكون افرازه اكتر في حالة المفاجئات ، وكل مازاد افراز الدوبامين كل مازاد ادمانك للنرجسي بالظبط زي ادمان المخدر وانا بكرر الكلمة دي عشان تدركي وضعك اد ايه صعب وتدركي ان العيب مش فيكي ولا انتي غبية ولا ضعيفة انتي ادمنتي وانتي مش واخدة بالك بالظبط زي اللي اصحاب السوء حطوا لها مخدر في العصير كل يوم لحد ما ادمنت هو دة اللي حصل معاكي بالظبط ، فمتلوميش نفسك وفوقي وقاومي الادمان واستعيني بالله وحتقدري بعون الله .
خلاص كدة ؟؟ لااااا لسة الدوبامين دة اصلا كارثة الكوارث : الدراسة اللي عملها فيشر دة بتقول كمان ان الرغبة الشديدة والاحتياج للشريك الرومانسي اللي تم ادمانه بتساوي تماما الرغبة والاحتياج الشديد للمخدر اللي تم ادمانه ، وبالتالي فاعراض الانسحاب من علاقة سمية بتكون نفس اعراض الانسحاب لوقف المخدرات .
طيب ايه تاني انتي تعبتينا جدا ؟
الاوكسيتوسين
هرمون بقى خطير جدا اسمه الاوكسيتوسين مش مهم اسمه دة المهم الاسم الدارج اللي هو هرمون العناق يعني هرمون الاحضان وكمان اسمه هرمون الحب ، الهرمون دة بيفرزه المخ اثناء الرضاعة عند الام والطفل فيحصل الارتباط الشديد اللي احنا عارفينه بين الام والابناء ، نفس الهرمون دة بيفرزه المخ لما بيحصل احتضان وتلامس وعلاقة الحميمة ، ودة اللي النرجسي بيعمله طول الوقت في بداية العلاقة وطبعا بيحصل افراز هائل للهرمون دة وتلاقي نفسك ارتبطي بالنرجسي ارتباط مش طبيعي وانتي بتسمي الارتباط دة حب عظيم طبعا وهو بيعزز الكلام دة بالكلام الحلو طبعا
........
الكورتيزول
دة اسمه هرمون السترس يعني هرمون التوتر وطبعا من اسمه واضح انه بيتم افرازه وقت التوتر والاجهاد سواء جسماني او نفسي ، طيب ايه مشكلتنا مع الكورتيزول دة يعني مهتمين بيه ليه ؟ حقولك ليه . عشان بيؤكد على الشعور بالخوف وبيوططده في الذاكرة زي ما الدوبامين بيعزز ويقوي السعادة الكورتيزول بيعزز الخوف وبالتالي طالما وطده في الذاكرة فلما تيجي بقى تسترجعي الذكريات الاليمة برضه يتم افرازه تاني فيوطد الخوف اكتر ويزود احساسك بالالم ويصعب التشافي من الالم ويطول مدته
.......
الادرينالين
هرمون ثالث بيفرزه المخ اللي في حالتين اذا فيه خوف شديد وفزع وانفعال وفي حالة الانفعال بالحب زي رؤية الحبيب والمشاعر المتأججة بالحب (سرعة النبض والعرق ،.. ) طيب الادرينالين دة لما بيتفرز بيعمل ايه بيعمل تأثير مضاد الاكتئاب فبالتالي بيسبب افراز الدوبامين اللي بدوره بيديكي احساس بالراحة وبالتالي المخ بيربط بين الاحساس بالراحة وبين الخوف والفزع والانفعال فيحصل زي حالة ادمان للخوف والفزع اللي بيسببهم النرجسي وتلاقي نفسك في الاخر مدمنة لحالة التذبذب اللي بتعيشيها مع النرجسي ما بين الحب والنكد ، وتلاقي نفسك بتقولي بالرغم من كل اللي بيعمله فيا وانا مدركة للاذى اللي بيسببهولي الا اني مش قادرة استغنى عنه ، بعض الحالات بتنضرب وتتهان ويتقال لها كلام صعب جدا ويخوض في عرضها وعرض اهلها وبرضه ترجع وهي بتبكي وتقول مش قادرة اعيش من غيره ، هي دي اسوأ الاوضاع مع النرجسي انك تدمني اذاه زي ما بتدمني حبه

تابعونا على الفيس
اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11
قناة التلجرام
https://t.me/learnaboutnarcisest.
الكتب
١- Becoming the Narcissist's Nightmare
٢- Disarming the Narcissist
3- healing from narcissist