ليه بعض النرجسيين لما بيمشي مع زوجته في أي مكان بيسبقها واحيانا يختفي أصلا ومتلاقيهوش؟ والسؤال كان بيخص السوبر ماركت . لكن هو بيعمل كدة في أي مكان تمشي فيه معاه ، ليه بقى ؟ هو حاسس انه اعلى منك او نفسه يحس بكدة فلما يمشي وانتي تجري وراه زي الطفل اللي بيجري ورا ابوه ومش عارف يحصله عشان هو ضعيف وابوه قوي ،فهو بياخد الإحساس دة انه قوي وانتي ضعيفة
كمان يوصل لك انك مش من مستواه ومتستحقيش تمشي جنب عظمته ، عندي حالة بتقول انه طول عمرهم لما يخرجوا يجري كدة وهي تجري وراه ولما كبر بدأيتعب وميقدرش يعمل كدة وهي خطوتها بقت زي خطوته لانها اصغر منه بكتير فبدأ يعمل ايه عشان ميمشيش جنبها ؟ يقول مش قادر امشي ويمشي ببطء يخليها تبقى ادامه معظم الوقت وهي طبعا بتقول طول عمره سايبني وراه خليه ورا بقى ، بس هو لما يكون عايز منك حاجة بيمشي جنبك سواء كبر ومش قادر يمشي او صغير وبيجري ، حتى دي بيستخدمها في مصلحته
بالنسبة لاختفائه المفاجيء دة غالبا بيكون غير مقصود هو غالبا بينسى انك معاه لانه أصلا في الوقت دة مش محتاجك في حاجة فبينسى انك معاه ، واحيانا بيكون متغاظ منك ويقصد يبين لك انه نسيكي ، واحيانا يخليكي واقفة تتفرجي على حاجة في محل ويخرج من غير ما ينده لك ويمشي وانتي تتفاجئي انه اختفي ولو عاتبتيه يزعق ،او ممكن يزعق لك من غير ماتعاتبيه عشان هو أصلا عامل كدة عشان يخلق خناقة او عامل كدة قاصد وعارف انه غلطان ومش عايزك تغلطيه فيزعق ، النرجسي عايز يعمل أي حاجة وكل حاجة غلط من غير ما حد يراجعه ولا يقول له عملت كدة ليه ولا يحاكمه ، فعشان يتجنب المحاكمة اما يكدب وينكر الغلط او انه يزعق ويعمل غضب نرجسي وصمت عقابي عشان يهرب من المحاسبة
بالنسبة للسوبر ماركت بقى فهو ملوش دعوة انتوا عايزين ايه ولا محتاجين ايه هو بيجيب الحاجة اللي هو عايزها ومحتاجها عشان كدة أحيانا يرجع اللي بتحاولي تاخديه لانه شايف انه ملوش لازمة ، كمان هو بيجري بالترولي عشان انتي تفضلي تجري وراه ويتهد حيلك رايحة جاية وطبعا هو من ضمن أهدافه انك تكوني منهكة عشان متفكريش ابدا في تصرفاته وتلاعبه ، هو عايزك منهكة عشان ابدا ابدا ماتفوقيش من الغيبوبة اللي هو حاطك فيها،في ناس اقترحت حلول للسوبر ماركت انك تاخدي ترولي وتلفي بيه وهو حيتفرس بس ممكن يزعق لك ادام الناس ، وانا بقترح انك تعتبري نفسك بتتريضي وماتحسسيهوش ان الموضوع مضايقك أصلا والمهم انك فاهماه وفاهمة هبله ومتقفيش ع الحاجات التافهة معاه طالما مضطرين نكمل ، بالنسبة للطلبات اللي بيرجعها لازم تفهميه انك مثلا مش حتعملي الاكل الفلاني من غيرها ، انها ضرورية ، لازم تتكلمي ولو انتي عندك مصدر رزق تاني هاتي اللي نفسك فيه من وراه ، للأسف الشديد النوع دة مش بيدفع ولا بيديكي اللي انتي عايزاه الا اذا لقاكي معاكي فلوس وخايف تستغني عنه فيفضل يديكي عشان يحسسك انه له فايدة في حياتك فمترميهوش وفي نفس الوقت ياخد منك وقود إيجابي عشان بيديكي وصاحب فضل والكلام دة ، او انه يكون عايز منك حاجة كبيرة في مقابل الفتات اللي حيديهالكعشان كدة حفضل أقول لك اشتغلي ودخلي لنفسك أي مصدر رزق ومتستنيش تاخدي منه حاجة

جروب ادرس عدوك النرجسي
https://www.facebook.com/groups/kawthersanad11
صفحتي الخاصة للتواصل معي
https://www.facebook.com/kawthersanad1.wordpress
رابط حلقة السيرة
https://youtu.be/DPs4Co1XRck