مفيش علاقة نرجسية تخلو من طرف ثالث ،خصوصا مع النرجسي الخفي
خصوصا النرجسي الخفي لانه بيعمل اتزان لمشاعره وهشاشة نفسه عن طريقه
اما النرجسي الظاهر فبيستخدم الطرف الثالث في العلاقة من باب الانتقام اكتر منه أي حاجة تانية ، دكتور جراندي بيقول ان اثارة الغيرة عند الزوجة بتحسس النرجسي الظاهر بالقوة والسيطرة والاحساس دة هو بيكون في امس الحاجة اليه عشان يوزن مشاعرة المضطربة ، عشان كدة دايما يخلي في حياة زوجته طرف ثالث ومستحيل تخلو حياتهم من الطرف الثالث دة أيا كان هو مين امه اخته ابوه اخوه زميلة عمل او صديقة او حبيبة ويعلنها ويعرف زوجته بيها او ع الأقل بيسيب لها أي حاجة تشككها ان فيه علاقة خارج الزواج ، دة طبعا غير انه بيلمح طول الوقت عن شطارة فلانة وجمال فلانة ويقارن زوجته بأي حد حتى لو هي احسن منه ، المهم ان النرجسي الظاهر بيستخدم الطرف مش عشان يحس بالقوة وبس لا دة كمان النرجسي الظاهربيستخدم الطرف الثالث في الانتقام من زوجته اذا خانته او اذا سابته ، واكيد كلنا عارفين اللي بيحصل اول ما الزوجة بتسيب النرجسي بيعمل ايه طبعا الصور بتملا السوشيال ميديا بالحبيبة الجديدة اللي عوضته عن الهم اللي كان عايش فيه ويكتب لها شعر وينزل صوره معاها ، كل دة دكتور جريندي بيقول ان النرجسي الظاهر تحديدا بيكون مرتب له ومخطط له عشان ينتقم من الزوجة اللي سابته ، واللي طبعا بتقعد تكلم نفسها ازاي بالسرعة دي قدر يحب غيرها ، وايه الجبروت دة ، وهو عايش حياته وانا بتعذب وهو سعيد ومبسوط بعد مابعد عني وهو لقى اللي يحبها وهو محبنيش ،اصل انا مكنتش حلمه ، اصل انا أصلا متحبش وتضيع اكتر ماهو كان مضيعها ، وللمرة الالف بقول لها هو مش سعيد ولا بيحبها ولابيعرف يحب أصلا وهو بينتقم منك
اما النرجسي الخفي بقى فدة برضه لازمه اطراف مش طرف واحد لا دكتور راماني بتقول ثالث ورابع وخامس وسادس ، ودكتور جريندي بيقول ان النرجسي الخفي او الضعيف لان احنا عارفين ان النرجسي الخفي بيسموه الضعيف ،دة بقى بيستخدم التثليث دة لاسباب كمان غير الاحساس بالقوة والسيطرة ، ايه هي ؟ هو بيحب يختبر علاقته بيكي شكلها ايه هل انتي متمسكة بيه وبتحبيه ولا مش فارق وهل انتي حاسة بالأمان معاه ومتطمنة انه مش حيسيبك ابدا ولا مهزوزة وقلقانه وغالبا بيختبر دة عشان يهزك لو مكنتيش مهزوزة ويحسسك بعدم الأمان لو مكنتيش حاسة ، المهم انه بيشوف رد فعلك على كلامه يعني مثلا يقول لك معانا زميلة في الشغل نشيطة جدا وشاطرة في شغلها وأولادها بيطلعوا الأوائل وواخدة بالها من صحتهم وتخيلي دي تبقى متطلقة انا مش قادر استوعب ان دي زوجة تتساب مين الغبي اللي يطلق واحدة زي دي ، فانتي الرسالة اللي توصلك ايه ، انك مش بتشتغلي أصلا ومش شاطرة وفشلتي ومحققتيش أي حاجة في حياتك ويكون هو اللي مانعك أصلا من الشغل ،والرسالة التانية انك مقصرة في بيتك والثالثة انك مقصرة مع اولادك والرابعة ان الزميلة مطلقة وهنا نقطة الإحساس بالأمان ، هي مطلقة وزوجة متتسابش يعني انتي في خطر ، يعني هو ممكن يفكر يتجوزها ومن هنا لو انتي كان لكي أي رد فعل ع الكلام ولو حتى وشك يتقلب او تكشري فحيفهم انه رسايله وصلتك وانك مش حاسة معاه بالأمان ويرتاح طبعا كدة، المفروض الست الشاطرة تعمل ايه في الحالة دة ؟
ياعيني الله يعينها ليه طلقها الحيوان دة ازاي فعلا واحدة زي دي تتطلق ، بكرة ربنا يرزقها باللي احسن منه ولو ان الستات اللي بتجرب الجواز من واحد غدار زي دة عمرها ماتفكر في الجواز تاني ، الله يعينها ولازم تظهر التعاطف معاها وبكدة بتفسد خطته بالكامل ومش حيجيب سيرتها تاني غالبا ، كمان النرجسي الخفي بيكون عايز يختبر ثقة زوجته بنفسها بموضوع التثليث يشوف هي حتغير وحتقلق ولا هي عارفة ان مفيش حد ينفع ياخد مكانها وبرضه عشان لو واثقة من نفسها يشوف حيهدم ثقتها ازاي (الصراحة دكتور جريندي مش بيقول كدة انا اللي بقول) هو بيقول ان النرجسي الخفي مش بيخطط للتثليث زي الظاهر لكن بيعمله بعشوائية واندفاعية واحيانا بيكون عن غير وعي دة كلام دكتور جريندي ، بس انا اعتقد انه بيكون مدرك تماما انه بيؤذي اللي ادامه
شوفو حلقة ازاي النرجسي بيستخدم طرف ثالث في اخضاع ضحيته

جروب ادرس عدوك النرجسي
https://www.facebook.com/groups/kawthersanad11
صفحتي الخاصة للتواصل معي
https://www.facebook.com/kawthersanad1.wordpress
رابط حلقة السيرة
https://youtu.be/YMsCyN3xVes