هل فيه زوجة تقدر تتعايش مع النرجسي الخفي من غير ماتضطر للطلاق ؟ وازاي؟
النرجسي الخفي اخطر نوع من النرجسيين لسبب واحد انه خفي ، انك مش بتعرفي انه نرجسي غير بعد فوات الأوان ، انك ممكن تعيشي سنين طويلة وانتي مش عارفة انك عايشة مع شخص مؤذي ومستغل ، لكن مع ذلك هو اسهل أنواع النرجسيين في التعايش ، يعني تقدري تتعايشي معاه وتسيطري عليه كمان ، طب ليه ؟ لانه اكتر واحد في النرجسيين بيخاف يتفضح امره ، هو أصلا ليه خفي؟ ليه بيخفي نرجسيته؟ هو طبعا مش قاصد يخفي نرجسيته هو قاصد يخفي حقيقته بالكامل ، طبعا لانه اول حاجة فاقد الثقة بنفسه بالرغم من الهالة اللي بيعملها لنفسه دي كلها تمثيل زي ماقلنا لكن هو في الحقيقة فاقد الثقة في نفسه تماما واحساسه بقيمة بنفسه هش ، كمان هو خجول نتيجة احساسه الدفين بالعار وكمان احساسه بعدم الأمان بيخليه خايف طول الوقت خايف ميعجبش الناس وخايف الناس متحبوش وخايف الناس تتكلم عليه ، فبيعمل ايه بيرسم صورة الشخص المثالي وبيتعامل مع كل الناس بيها ، طيب كل الكلام دة بالنسبة للزوجة مفيد في ايه ؟
انتي كدة عرفتي نقطة ضعفه . شكله ادام الناس بخلاف الظاهر معندوش أي مشكلة مع الناس وواثق من نفسه ومبيهموش حد ودة بيكون التعايش معاه اصعب ، اما الخفي فتقدري تهدديه بالناس وبالفضيحة وتقدري تديه وقود إيجابي بانك تنفخيه ادام الناس
التعايش مع النرجسي الخفي سهل بس عايز منك صبر وحكمة ، وثقة في نفسك وتكوني تعافيتي من ادمانه عشان هو ميتلاعبش بيكي يبقى حتتعايشي معاه ازاي ؟
١- التشافي ، شوفي السلسلة كلها وشوفي كمان كل الفيديوهات اللي بتتكلم عنك انتي واخرها فيديو بعيدا عن النرجسي ، اتعلمي تحبي نفسك وتقربي منها وتتممي التعافي كمان من صدمة النرجسي
٢- اتعلمي تتلاعبي بالنرجسي ، اديه اللي هو عايزه في مقابل انك تاخدي اللي انتي عايزاه ،اديه وقود إيجابي وخصوصا ادام الناس عظميه ادام الناس وامدحي مزاياه بدون كدب ، يعني مثلا لو هو كريم مع أولاده ، لو هو محترم مع اهلك ، لو هو كريم مع الناس ( حتى لو كان بخيل معاكي ) المهم انك لما تمدحيه امدحي حاجات موجودة فيه فعلا عشان يصدقك ، حالة عندي لما تعافت وفهمت النرجسي كويس بدأت تشتغل على اللاواعي بتاعه وبدأت تزرع جواه انه شخص كويس وانه يستاهل انه يتحب وانه مش محتاج ان الناس تشوف مميزاته ولا تعرف انه كويس لان هو كدة كدة كويس ويستحق ان الناس تحترمه ، طبعا مش كل الكلام في قاعدة واحدة ، الكلام دة عشان يدخل في اللاواعي محتاج يكون ببطء وفي أوقات معينة ، المهم ان الكلام دة اذا اتعمل صح بيساعد في علاج النرجسي ، ودة اللي مفروض تعمليه مع اولادك اللي بدأ يظهر عليهم علامات النرجسية ،
٣- اوعي تآمني للنرجسسي الخفي ، تعايشي وحاولي تساعديه يتعافى بدون ماتجهدي نفسك ولا تاخدي الموضوع على اعصابك وحطي في دماغك انها مجرد كلمات ممكن تقوليها بنية صافية لوجه الله ممكن تشفيه او حتى تعدل سلوكه لكن لو أراد ربنا فمتبقيش قاعدة مستنية نتيجتها ، وفي نفس الوقت متآمنيش مهما بان لك انه بقي كويس لانه مش حيكون كويس في يوم وليلة لا حياخد سنين ، واذا الكلمات دي مساعدتهوش يشفى فاعتبريها وقود نرجسي إيجابي ومفروض تاخدي قصاده مصلحة بشكل غير مباشر ، يعني هو بعد ماياخد الوقود بيكون موده حلو جدا ومبسوط وهو أصلا عنده عطاء قهري ،لو استغليتي الوقت دة وطلبتي منه حاجة حتعرفي تاخديها منه
٤- قلت لك قبل كدة لما يديكي اللي انتي عايزاه كافئيه ، عوديه انه لما يستجيب لكي انتي كمان حتستجيبي له
٥- استغلي العلاقة الحميمة في نظام المكافئات اذا كان خفي جسماني او نخبة ، واذا كان عقلاني استغلي المناقشات العلمية واقعدي ادامه زي التلميذ اللي بياخد الدرس ، اسمعيه واديه فرصة يتكلم (طبعا لما تكوني لكي مصلحة وعايزة منه حاجة ، او تكوني بتكافئيه)
٦- الأهم من كل دة لازم تكوني قوية وواثقة في نفسك وجريئة وتعرفي تردي بحكمة لما يحاول يقلل منك ، وكمان متأخديهوش عليكي يعني متتباسطيش جدا معاه ومتقربيش جدا له خصوصا الخفي لانه بيترعب من القرب ، فهميه انك مش فاهماه وانه غامض دة حيريحه ويطمنه ويخليه يقلل نوبات الغضب والتحقير
٧- خدي مصلحتك منه بأسلوب مكسب مكسب بتاع دكتور جورج سيمون من كتاب في ثياب الخراف : قلته في حلقة( ازاي تتلاعبي بالنرجسي)
(١) هو يكسب وانتي تخسري ودي الفرضية المفضلة عنده يعني دي غاية المنى واحسن حاجة ممكن تحصل معاه
(٢) انتي تكسبي وهو يخسر ودي اكتر حاجة ممكن يكرهها في حياته وحيحاربك بمنتهي القسوة عشان يمنع حصول الكلام دة عشان كدة اللي بتحاول تنفصل عن النرجسي بتواجه صعوبات مش طبيعية وعصيبة وحروب وتشويه سمعة وكل حاجة قذرة يقدر يعملها بيعملها عشان يطلعك خسرانة زي ماهو خسران ويتجنب كارثة انه يخسر وانتي تكسبي
(٣)هو يخسر وانتي كمان تخسري وهو طبعا بيكره جدا انه يخسر لكن في حالة انه حيخسر لا محالة فحيعمل كل مافي وسعه ومقدرته انه يطلعك انتي كمان خسرانة زي ماقلت لك دلوقتي ، ودة اللي بيوصل النوادر منهم لجرايم القتل او الانتحار في اقصى حالات النرجسية الخبيثة والعياذ بالله ،
(٤)هو يكسب وانتي كمان تكسبي ودة النوع المهم اللي احنا حنشتغل عليه عشان نعرف نتلاعب بالنرجسي ، وطبعا اكيد انتي عارفة انه عمره ماحيسعى لدة انه يكسب وانتي تكسبي لكن دة بيكون دايما الاختيار التاني بالنسبة له اللي ممكن يقبله لومكسبش وانتي خسرتي ، ، خدي بالك ان النرجسي حيعمل اي حاجة في الدنيا عشان ميخسرش ودي نقطة ضعف عظيمة عنده ومفروض انك تعرفي تستغليها كويس ، وتتلاعبي بيه ، فلما تيجي تتفاوضي معاه على حاجة حطي شروط تضمن له شوية مكاسب (من غير ماتخسرك) يعني تحطي له حاجة هو عايزها وبيطلبها دايما وانتي بترفضيها (متكونش حاجة بتغضب ربنا ) زي مثلا زيارة مامته

طالما النرجسي مش بيضرب ولا بيشتم الفاظ صعبة وانتي مش حينفع تتطلقي يبقى تقدري تتعايشي خصوصا مع الخفي وربنا يعينكم ويقويكم

اكونت الفيس بوك
https://www.facebook.com/profile.php?id=100008051807381