١٢ طريقة النرجسي الخفي بيستخدمها عشان يحبطك عن عمد
١- محاولات التواصل معاكي قليلة جدا ، اذا حاولتي تشاركيه اي حاجة بتلاقي اما عدم رد او رد بايخ ، الناس الطبيعية بتتفاعل وتسأل وتتكلم عن اي حاجة نشاركها معاهم ودة اللي بتكوني متوقعاه من المشاركة تشجيع منه او انك تفرحيه معاكي وولا حاجة من دي بتحصل ، وطبعا دة مقصود وهو بيعمله عن عمد عشان يوصل لك انك مش مهمة ،كمان هو فعلا مش مهتم
٢- بيكون حساس جدا في تجاوبه معاكي واي اختلاف معاه بيحوله لغضب نرجسي عشان يحرمك تختلفي معاه وغالبا بيكون الغضب دة تمثيل امتر منه حقيقة
٣- هو مش حساس تجاه مشاعرك زي ماهو حساس تجاه نفسه وطبعا دة لانه مش مهتم اصلا بمشاعرك وكمان عايز يوصل لك انك مش مهمة عنده
٤- دايما يحسسك ان مشاعرك واحاسيسك فيها حاجة غلط لمجرد انه يحبطك ، يعني مثلا خرجتي مع صاحبتك ورجعتي مبسوطة جدا وعلقتي ان الخروجة كانت هايلة فرد فعله يكون انتي مأفورة كدة ليه مانا وديتك كذا وكذا ، انتي لو قلتي لي انك عايزة تخرجي كنت وديتك كذا وكذا انتي ضيعتي فرصتك ، او انا كنت ناوي نروح المكان الفلاني في الويك اند خلاص بقى طالما انبسطتي ،وانتي ممكن تكوني بتتحايلي عليه بقالك سنة انكم تروحوا المكان دة وهو مش راضي ومش ناوي اصلا بس هو بيحبطك وبس
٥- يخليكي تلاحظي انه مل منك ومش مبسوط ولا مهتم بالتواجد معاكي اصلا ، تبقي معاه وهو ساكت مش عايز يتفاعل ولا يتكلم ولا يحسسك انه شايفك اصلا
٦- ممارسة الحكم عليكي طول الوقت ، على تصرفاتك وكلامك طول الوقت انتي بتعملي حاجة مكنش مفروض تعمليها او ملهاش لازمة او ازاي تعمليها وكأنك بتتصرفي بطريقة غريبة ومش طبيعية ، المهم انه يحكم عليكي احكام سلبية محبطة
٧-لما يكون عندك عد يهمك او انتوا الاتنين خرجتم مع حد يهمك او يخصك لازم يحسسك انه مش مرتاح ومش مبسوط ويفضل طول الوقت متوتر وبيجز على اسنانه بحيث يوصل لك انه ممكن ينفجر في وجود الناس وطبعا اللي موجودين معاكي بيلاحظوا ويبدأوا يسألوكي ماله ودة منتهى الاحراج لكي خصوصا لو هم في بيتك ، وممكن بعد الدنيا ماتخلص تلاقيه رجع طبيعي جدا وكأنه عايز يربط لك بين وجودهم وبين الخوف اللي كان حاطك فيه والاحباط عشان متعزميهمش تاني
٨- بيحاسبك على اخطاؤه ، واذا اعتذر بيكون اعتذاره فارغ ومصطنع واذا مقبلتيش الاعتذار يعمل لك صمت عقابي ،
٩- بيمثل دور الضحية لو حصل اي حاجة تغير الخطة اللي حاططها لحياتكم ، ويبدأ يحسسك انك بتخربي له حياته ،
١٠- لو حققتي اي نجاح وبتحكي له وانتي فرحانة هو من غيرته بيحبطك بكل الطرق او يقلل من قيمة نجاحك او يستهزأ بإنجازك ويسخر بيه المهم لازم يحبطك ويكسر فرحتك عشان متحسيش انك احسن منه وعشان هو يحس بانه احسن منك طبعا
١١-مش حيشكرك واذا شكرك بيكون بطريقة عدمها احسن
١٢- الاخطاء القديمة ممكن تكونوا قاعدين في امان الله وتلاقيه فجأة يأنبك على غلطة عملتيها من سبع سنين وتلاقي الموضوع طلع من لا شيء في وسط الكلام بدون اي مناسبة ، طبعا هو بيكون مرقد لك بسبب حاجة حصلت ممكن تكوني عملتي اي حاجة تبسطك ومقدرش ينكد عليكي في ساعتها فلما لقى الفرصة مفوتهاش

اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11