من اخطر اساليب تلاعب النرجسي الخفي
النرجسي الخفي و ال gaslighting
تكتيك من تكتيكات التلاعب المرعبة واللي تأثيرها عليكي مدمر نفسيا وصحيا وممكن يوصلك للشك في نفسك وفي ذاكرتك وادراكك وصحتك العقلية ، التكتيك دة بيوصلك انك تصدقي ان فيكي حاجة غلط ، حتقتنعي انك بتنسي وانك مش بتسمعي ومش بتركزي وصحتك النفسية في خطر وكئيبة وبتحبي النكد وانتي اصلا زي الفل ومفكيش اي حاجة .
ازاي النرجسي الخفي بيوصلك لكدة ؟ عن طريق الانكار المستمر ( حتى لو في ايدك دليل مادي حيقول لك بتتخيلي حاجات ) والتشتيت والكذب واللوم المستمر طبعا بهدف زعزعة استقرارك النفسي عشان تكوني في حالة ضعف شديدة اللي تمكنه من احكام سيطرته عليكي وتبدأي تشكي في نفسك بدل ماتقدري تفهمي ايه اللي بيتعمل فيكي منه ، هو في الاول بيعمل لك انكار في مواقف عادية جدا زي ماشرحت قبل كدة في حلقة ( ازاي تتعرفي على النرجسي - النرجسي كذاب) في سلسلة علامات تدل على ان زوجك نرجسي ، زي مثلا اي حاجة حصلت يقول لا محصلتش ، فلان قال ،يقول لا مقالش وكل دة عشان يشكك في ذاكرتك فلما يحصل موقف جد بقى يكون عامل كارثة وتواجيه بيها حيقول لك محصلش انتي بتتخيلي وانتي تشكي في نفسك وموقفك يكون ضعيف ، وبعضهم يخفي حاجة بتاعتك محفظتك مفاتيحك ، او ياخدها يحطها في مكان غير اللي بتحطيه فيه عشان يوهمك انك بتنسي وبتضيعي حاجتك ،
يعني حالة واجهت جوزها النرجسي بشات بينه وبين واحدة بكلام قذر خطف منها الموبايل ومسحه وقال لها فين دة انتي بتتخيلي حاجات ، وحالة تانية يقول لها دي مجرد زميلة مفيش اي حاجة بيننا ، وحالة ثالثة يقول لها دة كلام عادي مفهوش اي حاجة ولا بيحمل اي معنى . المشكلة الكبيرة ان لما حد بيتلاعب بيكي بيوصل لك انه دايما علي حق وان انتي مينفعش تثقي في نفسك ولا في حدثك ولا في حكمك علي الامور لكن ينفع تثقي فيه هو بس لانه بيعرف اكتر منك وبيفهم اكتر منك وانتي ضعيفة ومش فاهمة حاجة وبكدة بيكون مسيطر عليكي سيطرة كاملة وطبعا بتفضلي عايشة معاه سنوات وعقود وانتي مش عارفة انه بيتلاعب بيكي
ال gas lighting تكتيك خفي وماكر ومتعمد دة كلام ديبي ميرزا
طيب تعرفي ازاي انك بتتعرضي لل gas lighting
اذا حسيتي بالفتور والحيرة وبدأتي تسألي نفسك اذا كنتي حساسة زيادة عن اللزوم واذا كنتي مش قادرة تفهمي انتي ليه مش سعيدة بالرغم من نعم كتيرة في حياتك ، اذا لقيتي نفسك بتلتمسي الاعذار كتير لشريكك ادام الناس وادام عيلتك واصحابك ، اعرفي انك بتتعرضي للنوع دة من التلاعب
طبعا النرجسي الظاهر بيستخدم التكتيك دة لكن مش بخطورة النرجسي الخفي لان الخفي زي ماقلنا قبل كدة بيجننك وياخدك في حضنه ويطبطب عليكي ويوهمك انه خايف عليكي وبيحبك وعايزك تبقي مركزة ومتنسيش وطبعا دة بيعميكي عن اللي بيعمله فيكي وفي نفس الوقت بيؤكد لك انك فيكي مشكلة
طيب نعمل ايه في الحكاية دي ؟ لما تحسي انه بينكر موقف متستسلميش له حتى لو انتي شاكة في ذاكرتك اكدي له انك متأكدة من اللي حصل وقولي له لااا انت بقيت بتنسى ، واعملي زي مابيعمل معاكي بالظبط وبيني له انك بدأتي تقلقي عليه عشان هو مبقاش بيركز وبقى بينسى ، ولما يخفي حاجة منك طنشي ومتديش رد فعل ، وقولي حتبان حتروح فين يعني او مش مهم خدت الشر وراحت ، اما حاجتك المهمة القيمة ياريت تخفيها من تحت عينه خالص ، ولما ينكر حاجة بتواجهيه بيها متديش للموضوع اهمية اصلا قولي له طيب انا وانت وثالثنا ربنا مش مهم انا ولا انت المهم ربنا عارف ايه وبس وغيري الموضوع ، واتعلمي متنفعليش لانك طالما فهمتيه وفهمتي ان مفيش اي امل في التغيير يبقى مش من الحكمة انك تنفعلي ، كأنك بتنفعلي على جماد لانه لاحاسس ولا فاهم مشاعرك تنفعلي ليه ، خليكي هادية وتأكدي ان هدوءك وبرودك سلاح فتاك ضده

تابعونا على الفيس
اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11
قناة التلجرام
https://t.me/learnaboutnarcisest

الكتب
the covert passive aggressive narcissist