مرحلة التحقير والتقليل مع النرجسي الخفي
انتي في الاول حسيتي بالحب والتفهم واقتنعتي تماما انه بيحبك اكتر ما اي حد في العالم حبك وبتثقي فيه ثقة عمياء وهو قدر يسيطر على تفكيرك ومشاعرك تماما ، وبعدين فجأة حيحصل منه تصرفات واقوال شبه خفية ومش واضحة وخفيفة ميتحسش بيها بتكون كلها رايحة في اتجاه انك قليلة ومش كفاية ومش عاملة اللي عليكي وملكيش قيمة في حياته وانك صفر ع الشمال ، ومهما كنتي عملتي وبذلتي جهد في محاولة ارضائه عمرك ما حتكوني كفاية بالنسبة له ،، الحقيقة المرة انك عمرك ماكنتي حاجة اصلا بالنسبة له ولا حتكوني ولا انتي ولا غيرك والرسالة دي طبعا بتوصلك منه ،
الخطورة هنا واللي بيخليكي متحسيش اصلا انك في مرحلة تحقير ان في نفس الوقت اللي بتوصلك فيه رسائل الاهانات والتقليل بيوصلك رسائل حب وحنية وممكن يلبي طلباتك واحتياجاتك لكن غالبا مش حيديكي فلوس في ايدك حيشتري لك اللي انتي عايزاه بس ، المهم انه بيكون كويس معاكي يعني زي ماقلت لك قبل كدة ايد بتطبطب وايد بتطعن فيعمل لك تشويش ولخبطة بحيث تستمري في الاعتقاد ان علاقتكم جيدة وانه بيحبك وانك محظوظة بيه وبتبيني لكل اللي حواليكي انه مفيش حد زيه وانكم سعداء جدا مع بعض عشان كدة اللي حواليكي كلهم بيبقوا حاسدينك عليه ولما بتكتشفي حقيقته بيكونوا مش مستوعبين انه كدة ومش بيصدقوكي طبعا وبيشكوا ان انتي اللي عندك مشكلة . المهم ان اثناء مرحلة التحقير دي انتي بيحصل لك تدهور في صحتك ونفسيتك وحياتك وشخصيتك وثقتك في نفسك لكنه تدهور بطيئ وناعم لدرجة انك مش بتلاحظيه ولا بتحسي بيه ، ومع مرور السنين لما تنتبهي ان فيه حاجة غلط بتقولي لا طبعا مش هو السبب (التنافر المعرفي اللي اتكلمنا عنه في حلقات التشافي ٦ ) وتقولي اكيد دة بسبب الظروف او الضغوط او الازمات المالية او اهله او اهلك او حتى نفسك ، المهم ان مش هو السبب وهنا طبعا بيكون لإدمانك له دخل كبير في التفكير دة ، شوفي حلقة التشافي ٧ . وكمان لان انتي مش بتكوني ملاحظة المعاملة السيئة اللي بيعاملك بيها لان دة بقى العادي والطبيعي في عيشتك معاه ، كمان هو بيعاملك كويس جدا ادام الناس في الغالب عشان يحافظ على شكله ادامهم وعشان محدش يتنبه له وينبهك طبعا ويفوقك ،
ومن ضمن طرق النرجسي في هدم شخصيتك طريقة الاسقاط ، ايه هو الاسقاط وليه النرجسي الخفي والظاهر بيعمله معاكي ؟
الاسقاط // ليه النرجسي بيسقط عليكي
١- خلف القناع اللي لابسه النرجسي فيه عدم رضا عميق وعدم فهم لنفسه ،لايمنع ان بعضهم واعي تماما باللي جواه وفاهم نفسه كويس جدا وعنده شعور بالنقص والذنب والعار ،لكن في معظم الحالات الخفيفة والمتوسطة بيكون الاحساس دة في اللاواعي لانهم بيرفضوه وينكروه ، فالطريقة الوحيدة اللي يقدر يحسن احساسه بالنقص والعار دة هي انه يخليكي انتي تاخدي الصفات دي ، وفعلا بتطلع ضحية النرجسي من العلاقة وهي كارهة نفسها وعندها دايما شعور بالنقص والذنب والعار ، ولما تبدأ تتعافى بتقول انا مكنتش انا ، اكنت مش موجودة او كنت مشوهة ، اللي بيحصل ان اللي هي كانته دة كان شخصية النرجسي اللي كانت بتتعامل معاه هو اسقط عليها الاحساس بعدم الامان والخوف والخجل والاحساس بالذنب والغضب وبالطريقة دي بيحس انه احسن منك لانك بيقيتي بتحملي نفس صفاته مع سيطرته عليكي اصبح كدة احسن منك وهو دة اللي عايز يحسه
تابعونا على الفيس
اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11
قناة التلجرام
https://t.me/learnaboutnarcisest

الكتب
the covert passive aggressive narcissist