مرحلة التجاهل والرمي
هي دي المرحلة اللي بتفضح النرجسي وبتبينه لضحيته ، في المرحلة دي بيعاملك كطفلة وبيعاقبك ويقول لك ازاي مفروض تتصرفي ،بيستخدم كل نقاط الضعف اللي انتي كلمتيه عنها فيكي وكنتي بتطلبي مساعدته وبتطلبي الامان عشان تقوي نفسك بيه هو بيستخدمها في المرحلة دي ضدك ويجرحك باسوأ طريقة ممكن ينجرح بيها انسان من اقرب حد له في العالم ، حيهاجمك بإعصار اهانات ، واحيانا يكون هادي ويبدوا طبيعي واوقات تانية يكون بيتكلم كتير كلام ملوش معنى ومش منطقي واحيانا يخلط كل دة مع كلمات الحب والتعاطف ووراها علطول يقول لك انك مفيش فيكي امل وانه خلاص مش عايزك(سخن-بارد) ، في الوقت دة بتبقي مش عارفة هو مين الشخص اللي ادامك دة الشخص اللي كان كتلة حنان اصبح جبل تلج لامشاعر ولا اي شيد فعلا كأنك ادام تمثال حتى ملامح وشه مش بتديكي اي تعبيرات وبتحسي انك ادام راجل غريب عنك وكأنه اتبدل ، حد اصبح عدواني جدا ومتجاهلك جدا ومش بيتعامل معاكي وممكن يثلث معاكي بأولادك ويوقع بينكم ومش بيوجه لك اي كلام نهائيا ، ومنهم اللي بيسيب البيت خالص ويروح يعيش عند اهله ومنهم اللي بيتزوج واحدة تانية ويقيم عندها ويرمي الاولى ، وبالرغم من ثورات الغضب اللي بيصبها عليكي طول الوقت بتلاقيه عايش حياته طبيعي جدا لو اتصل بحد بيضحك ولو جاله ضيف بيقابله احسن مقابلة وولا كأن هو كان غضبان وبيصرخ فيكي وانتي طبعا بتكوني منهارة وهو عادي وممكن بيضحك ويهزر مع غيرك ودة من الحاجات اللي بتجننك وتخليكي مش فاهمة حاجة ويمكن تحسسك اكتر ان المشكلة فيكي مش فيه ، وخدي بالك بعد مابينهي العلاقة وانتي في حالة انهيار تام هو بيصدر لك بكل الطرق صورة مزيفة عن سعادته بحياته الجديدة من غيرك او مع زوجته الجديدة اللي ربنا عوضه بيها عنك وعن الغلب اللي وريتيهوله ، وطبعا هو كذاب ولا سعيد ولا عمره عرف ولا حيعرف طعم السعادة اصلا ، وكل دة تمثيل عشان يطبق قاعدة خسارة خسارة اللي قلناها في حلقة (ازاي تتلاعبي بالنرجسي ) يعني هو خسر بانهاء العلاقة خسر وقود نرجسي وخسر ضحية متدربة على ايده فلازم يطلعك انتي كمان خسرانة بس هو عايز يخسرك نفسك بإنه يقنعك ان انتي اللي المشكلة فيكي وانتي قليلة وانتي مش كفاية ومتستحقيش ودي اسوأ رسالة ممكن تهد اي انسان عشان كدة متسمعيش للرسايل الهدامة دي واحمدي ربنا انه نجدك منه ومتبصيش وراكي ولاتفكري هو سعيد ولا تعيس وتأكدي ان اللي بيظلم حسابه عسير دنيا وآخرة .
طيب ايه اللي بيعمله النرجسي الخفي لما يعوز ينهي العلاقة بحيث ميطلعش وحش ادام الناس ؟ هو مش بيكون مباشر ويقول خلاص حطلقك لا هو بيهاجمك ويعاملك المعاملة السيئة دي ويستخدم سياسة سخن بارد لحد ما انتي تطلبي الطلاق وهو يبين للناس انه مش عايز يطلق وانه متمسك بيكي ومش عايز يخرب البيت ، وبكدة يبقى هو ضحية وانتي الجاني وهو الناس تطبطب عليه وانتي الناس تهاجمك وبالمرة بيبدأ حملات تشويه السمعة لكي ودة بيكمل بيه مبدأ خسارة خسارة برضه


اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11
قناة التلجرام
https://t.me/learnaboutnarcisest

الكتب
the covert passive aggressive narcissist