امتى تصرفات النرجسي الخفي تبدأ تبقى عدوانية ويبان لك انه نرجسي
لو عايز ينهي العلاقة او شاف ضحية جديدة احسن او فيها مميزات بالنسبة له اكتر من الاولى او انتي كمصدر وقود نرجسي ضعفتي ومبقاش ياخد منك الكم الكافي . او انك اكتشفتي خيانته وواجهتيه بعنف وجرحتي كبريائه وحس انه انكشف ادامك،او انك بشكل او بآخر بدأتي تتغيري وتكوني قوية وواثقة من نفسك وبدأتي تنتبهي اكتر لنفسك واحتياجاتك ودة طبعا تصرف عدواني جدا بالنسبة له لانك بتاخدي من اهتمامك بيه وتدي لنفسك فكدة بيحس انه بدأ يفقد السيطرة عليكي ، او انك قررت تخرجي من العلاقة لاي سبب ودة نادر لو حصل بسبب الادمان اللي غالبا بتكوني فيه ، المهم انه في الحالة دي بتظهر كل الصفات النرجسية وبيصبح بالنسبة لك ظاهر لكن مع باقي الناس هو خفي والناس بتحبه وبتحترمه ولو قلتي لهم اي حاجة وحشة عنه حيهاجموكي وطبعا هو حيقوم بالواجب وحتطلعي في الاخر انتي اللي مريضة نفسيا ومحتاجة تتعالجي.
ديبي ميرزا بتقول ان بعد الضحية ماتخرج من العلاقة بتبص للماضي اللي عاشته مع النرجسي الخفي وتعرف اد ايه هي كانت محبطة علي مدار العلاقة ووحيدة وكانت بتلام على كل شيء وبتشوف طبعا الخسائر الصحية اللي لحقت بها
يعني ايه العدوانية السلبية ؟؟ يعني العدوانية بطريقة غير مباشرة ،اللي هو الكلام اللي ظاهره جميل لكن مقصود بيه تحقير وتقليل زي مثلا انتي حبيبتي اللي مش فاهمة حاجة ، انتي الطيبة بس بيتضحك عليكي طول الوقت ، احلى حاجة فيكي انك مش فاهمة حاجة ، مفكيش عيب غير اهلك ، عيبك الوحيد كذا ، وهكذا ، تكلميه ميردش عليكي ولو عليتي صوتك يقولك ايه مش واخد بالي وخصوصا لو ادام الناس وعنده كل اعذار الدنيا لكل حاجة يعملها وحشة بحيث انك عمرك ماتشكي فيه ابدا
عشان كدة دايما بقول واكرر في اغلب الحلقات انك متتهميش نفسك وتزعلي منها عشان معرفتوش ولا فهمته كل السنين دي لانه متلاعب خطير وصعب جدا علي اي حد انه يعرفه حتى المعالجين بينخدعوا فيه واذكى الاذكياء كذلك
شخصية الحرباء
بيتلون علي حسب الشخص اللي بيتعامل معاه ، عنده كذا مجموعة اصدقاء وكل مجموعة مختلفة عن التانية تماما سواء اجتماعيا او اقتصاديا او فكريا او حتي دينيا . يعني ممكن شلة دكاترة في الجامعة ، وممكن شلة فشلة وحشاشين وشلة اشرار وشلة متدينين ومتشددين وشلة منحرفين وبتوع بارات وملاهي ليلية . وكل دول هو بيخرج معاهم وبيحبوه جدا ومتأقلم مع الجميع لانه بيلبس لكل مججموعة او شلة الماسك اللي ينفعها ويخليهم يحبوه طب ليه كل الناس دي ؟ عشان كلهم بيدوه وقود نرجسي

ازاي النرجسي الخفي بيختبر ضحيته في بداية العلاقة عشان يعرف هي حتكون مصدر مستمر للوقود النرجسي ولا لأ ؟؟؟؟
هو بيحاول يضغط على الضحية ويشوف مدى تمسكها بالعلاقة ، فإذا حاربت عشان العلاقة تستمر فبتكون الضحية المثالية بالنسبة له ، طيب ازاي يعني بيضغط عليها ؟ يعني يطلب منها حاجات صعب جدا انها تعملها وهو عارف ان الحاجات دي مش متوافقة مع شخصيتها يعني شبه مستحيل انها تعملها فيبدأ يضغط ولما متعملهاش يزعل ويعمل صمت عقابي او يتحايل واخر حاجة يهددها انه يسيبها وفي كل مرة بيصعد التصرف الضاغط وفي النهاية لو رضخت تبقى هي دي ولو لا بيسيبها ويمشي يدور على غيرها

تابعونا على الفيس
اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11
قناة التلجرام
https://t.me/learnaboutnarcisest

الكتب
the covert passive aggressive narcissist