رقم حجز الاستشارات والكورسات : ٠٠٢٠١١٥٠٥٨٦٠٥٢
هو انا اللي خليت جوزي نرجسي بسبب ضعفي؟
هل فعلا الزوجة ممكن تكون هي اللي حولت جوزها من شخص سوي لشخص نرجسي بسبب ضعف شخصيتها؟
حالة بتقول ان هي السبب ان جوزها بقي نرجسي لانه كان كويس جدا معاها سنين وبالتدريج اتحول لشخصية نرجسية وبقي يعاملها أسوأ معاملة ويخونها ويسقط عليها ويكدب ويعمل لها جاسلايتينج ،
طيب احنا أصلا متفقين ان اضطراب الشخصية النرجسية دة بيكون سببه التربية ومعاها الجينات ، والتربية هنا يعني الطفولة والظروف اللي الطفل نشأ فيها يبقى ازاي انتي اللي حولتيه لنرجسي ؟
كل الحكاية ان النرجسي بغض النظر عن مرحلة اللافبمبينج وعن انك بتكوني أصلا بتحبيه جدا في الأول وبتسمعي كلامه وعايزة تحافظي ع البيت وكل دة قلناه قبل كدة وكل دة بيكون سبب في ان النرجسي بيفضل لابس القناع أطول فترة ممكنة .
لكن انتي أصلا مش بتكوني فاهمة ولا شايفة انك بتتئذي انتي بتلتمسي له الاعذار وبتقولي مش قاصد وعصبي والكلام دة كله ، دة غير ان انتي طول ما انتي مش بتعترضي عليه ولا بتقولي لا ولابتختلفي معاه في الرأي فهو حيفضل هادي ومستأنس ومايبانش عليه أي نرجسية يعني ضعفك اللي متخيلة انه السبب في نرجسيته هو اللي كان مخبي نرجسيته وهي نرجسيته موجودة مش بتتكون فجأة ابدا هو بس كل الحكاية ان فيه حاجات بتحصل بتخلي النرجسي يشيل القناع ويظهر لك على حقيقته ولو بعد سنين وانتي تتخيلي ان انتي السبب انه اتغير
لكن اللي انتي ممكن تكوني السبب فيه انك تحوليه لظاهر لو فضحتيه عند اهلك او اهله بعد ماتكتشفي خيانته مثلا او لو زود عليكي في العصبية
لكن خدي بالك انتي ماحولتيهوش لنرجسي لكن انتي ماحافظتيش على حدودك انتي من اول يوم مارفضتيش حاجات كان لازم ترفضيها لكن لانك مابتعرفيش أصلا تقولي لا بسبب تربيتك فانتي سهلتي عليه المهمة او بمعنى اخر فتحتي له الطريق لانه يهدر حقوقك ، طبعا لازم تفهمي زي ما قلنا قبل كدة ان لكي يد في سير حياتك لان لو ملكيش فيها يد يبقى ملكيش فيها حل يعني انتي عاجزة عن تغيير الوضع ودة مش صحيح ،الوضع حيتغير عن طريقك انتي مش النرجسي ،
عشان تغيري لازم تفهمي ان انتي مش سبب في انه شرير لكن انتي سبب في انه يستمر في الشر معاكي لانك مش بتقوي نفسك وتمنعيه من اذاكي
بطلي تتهمي نفسك وبطلي تشوفي ان انتي السبب ودايما تفكري نفسك ان النرجسي الأول والأخير في حياتك عايزينك تفضلي حاسة بالذنب عشان تفضلي تعملي اللي هم عايزينه خوفا من انك تكوني مذنبة وتفضلي تلفي في فلكهم حتى بعد ماتفهميهم لانك دايما حاسة انك مذنبة تجاههم ،اعرضي الموقف على الشرع وشوفي هو فعلا اللي بتعمليه فيه ذنب ولا لا واسمعي للشيوخ الوسطيين اللي بيتكلموا عن الدين بدون تشدد





#النرجسي #الحرب #التعايش #الخداع #اللؤم #الكتمان #الحماة #النرجسية #القوة #الذكاء #مشاكلـزوجية #زواج #ازواج #زوجات #اسرة #اسرية #الخفي #النرجسيالخفي #حبينفسك #كونيملكة #القوة #الثقة #الاكتئاب #الصحة #النفسية