رقم حجز الاستشارات والكورسات : ٠٠٢٠١١٥٠٥٨٦٠٥٢
علمي نفسك ان المشكلة مش مشكلتك
لما تتعاملي مع شخص سام لازم تفهمي انك مش لازم تفهمي هو بيعمل كدة ليه
المهم تفهمي ان المشكلة مش عندك ، المشكلة فيه هو
طيب معنى كدة ان انا ماعنديش مشكلة يبقى تقعد ساكتة بقى واتحمل ولا اني لازم اسيبه وامشي؟
دة بيتوقف على هو مين الشخص السام دة وعلاقتك ايه بيه ،اذا العلاقة سطحية او حتى احد الأقارب يعني صديقة او زميلة او زوجة اخ او حتى اخت او اخ فدول كلهم سهل جدا انك تتجنبيهم وتبعدي عنهم وتمنعي اذاهم عنك لكن بذكاء وبدون هجوم عليهم ولا أصلا تبيني لهم انك فهمتيهم وفاهمة انهم اشخاص سامة لا نهائيا الشطارة زي ماقلنا قبل كدة انك تكوني غامضة مع الأشخاص السامة أيا كانوا هم ايه وبما انك بقيتي خبيرة في النرجسية والنرجسيين وبتعرفي تتعاملي معاهم فانتي حتعرفي تتعاملي مع أي شخصية سامة تانية ، اهم حاجة في التعامل مع الناس دي انك تكوني مش مفهومة مش مفهوم انتي بتفكري في ايه ولا حاسة بإيه ولا ناوية تعملي ايه ، فلما تتجنبي الناس دي ماتقوليش انك بتبعدي عنهم عشان مش مرتاحة لهم ولا عشان هم مش تمام ولا أي حاجة من الكلام دة ولا تقوليه لهم ولا تقوليه لاي حد محتمل يكون قرد طائر لهم ، المهم انهم مايوصلهمش انك فاهماهم لان أي اهدار طاقة معاهم ملوش أي لازمة .
طيب لو كانت الشخصية دي قريبة جدا سواء زوج او اب او ام او حتى أبناء ، التجنب في الحالة دي مش حينفع وحيكون صعب ،لكن بتقدري تعمليه بشكل جزئي وفي نفس الوقت بتتعاملي معاه بذكاء وبرضه تركزي جدا ع الغموض بقدر ماتستطيعي ،
المهم بقي انك دلوقتي عارفة حتتعاملي معاه ازاي لكن لسة بتتسائلي هو ليه وازاي بيعمل كدة ، ودة اللي عايزة اعلمهولك النهاردة وعايزة تبطلي تتسائليه تماما ، ليه؟ لان ماينفعش نسأل ليه القط بينونو ومش بيتكلم ، ليه الحيوانات المفترسة بتاكل لحووم ومش بتاكل نباتات ، ليه العصافير بتصوصو مش بتنونو ينفع تتسائلي التساؤلات دي؟
ماينفعش لان دي خلقة ربنا ،ربنا خلقهم كدة ، نفس الكلام ليه اللي عنده انفلونزا بيكح ويعطس ؟ هنا بقى فيه فرق شوية هنا ممكن تروحي تدرسي طب وتفهمي ليه الاعراض دي بتحصل ، هي هي نفس الفكرة ليه النرجسي بيعمل كدة؟ ادرسي علم نفس عشان تفهمي ،لكن سطحيا بنقول اللي عنده برد بيعطس ويكح عشان عنده برد ، والنرجسي بيؤذي ويكدب ويلاوع ويتلاعب عشان نرجسي ،طيب هل انتي محتاجة تعرفي تفاصيل الموضوع هل انتي حيفرق معاكي هو بيعمل كدة ليه اد مايفرق معاكي مفروض تتعاملي معاه ازاي؟ . اكيد انتي محتاجة اكتر تعرفي حتتعاملي ازاي معاه وعشان تعرفي دة لازم أصلا تكوني بتعرفي تتعاملي مع الاسوياء عشان تعرفي تتعاملي مع المضطربين ، وعشان أصلا تعرفي تتعاملي مع الاسوياء لازم تكوني بتعرفي تتعاملي مع نفسك صح ، يعني ايه اتعامل مع نفسي صح؟ يعني تعاملي نفسك بحب واحترام وثقة وتلبي احتياجاتها وتحطيها أولى اولوياتك ، طيب وازاي تعملي دة ؟ تفهمي نفسك الأول وتتعرفي عليها وبعدين لما تعرفيها صح حتقدري تقربي منها وتحبيها وبالتالي حتحترميها وتثقي فيها .
طيب ازاي تتعرفي على نفسك ؟ قلنا الكلام دة كتير بس حقول لك باختصار ،
١- اول حاجة هاتي ورقة وقلم واكتبي في نص الصفحة صفاتك الإيجابية والنص التاني صفاتك السلبية وخدي الورقة ولفي بيها على الاسوياء القريبين منك وخليهم يكملوا لك الصفات اللي انتي ماكتبتيهاش ويعلقوا ع الصفات اللي كاتباها وياللي شايف انك كاتبة صفة موجودة فيكي يحط عليه علامة صح واللي شايف صفة مش فيكي يحط عليها علامة غلط ، وامسكي الورقة بعد ماكل الناس تكتب وبصي ع الصفات الإيجابية اللي فيكي وشوفي الصفات دي تستحق انها تتحب ولا لا وشوفي الصفات السلبية وحاولي تشتغلي عليها اد ماتقدري ، ودي بتكون اول علاقة بينك وبين نفسك وأول حاجة تعمليها عشان تعرفي انتي مين .