رقم حجز الاستشارات والكورسات : ٠٠٢٠١١٥٠٥٨٦٠٥٢
ازاي تعرفي انك في علاقة سامة
اكبر مشكلة بتقابلك مع النرجسي
النرجسي بيحملك مسئولية إبقاء العلاقة على قيد الحياة وهو في نفس ذات الوقت بيحط للعلاقة سم بطيء عشان يموتها ومطلوب منك انك تحييها
دة اكبر فخ بيوقعك فيه النرجسي ، هو يسيء ويتلاعب وينسحب من العلاقة أحيانا وبعدين يقول لك انتي السبب ان الفجوة بتزيد بيننا انتي بتقصري في كذا وكذا وانتي لانك متعودة يا اما من بيت اهلك يا اما منه على مر السنين انك دايما غلطانة وان انتي دايما السبب في كل حاجة بتحصل فبتصدقي وبتحاولي بكل الطرق تراضيه وبتحاولي تبقي العلاقة على قيد الحياة .
طيب انتي اللي بتقولي لنا نتلاعب بيه عشان نقدر نعيش يعني انتي بتقولي لنا نجتهد عشان نبقي العلاقة على قيد الحياة؟ . شوفي انا بقول لك تتلاعبي بيه عشان تحافظي ع الهدوء والسكينة الى حد ما في حياتك وحياة اولادك لكن انا ابدا مش بقول لك ابقي العلاقة على قيد الحياة العلاقة كدة كدة ميتة العلاقة أصلا ميتة من اول يوم لانها علاقة سامة ومسمومة هي بالنسبة للاسوياء علاقة ميتة لا فيها حب ولا عطاء متبادل ولا فيها احترام ولا فيها أي مقوم من مقومات العلاقة الصحية لكن احنا بنحافظ ع البيت احنا بنحافظ ع الأربع جدران اللي آويينك وآويين عيالك وبنحافظ على الحقوق المادية لكي ولاولادك احنا عايزين نحافظ على صحتك وصحة اولادك فلما بقول لك تتلاعبي دة مش عشان تحافظي على العلاقة بالعكس انا بقول لك مش حتقدري تتلاعبي غير لو تخلصتي من ادمانه يعني ايه يعني تموتي انتي العلاقة بنفسك والمقصود هنا بالعلاقة اللي هي الحب والتوافق بين طرفين التعلق الصحي بين اتنين مش التعلق المرضي وطالما العلاقة تحولت لتعلق مرضي فاصبحت علاقة سامة ولازم تنتهي فلما تتعافي تماما حتكوني خرجتي من العلاقة السامة دي لكن انتي موجودة في الحيز اللي النرجسي موجود فيه بحكم الزواج وبحكم الظروف اللي اجبرتك ع البقاء وكل واحد له ظروفه واسبابه والناس اللي بتعلق ازاي واحدة عندها كرامة تستمر في الحياة دي عايزة أقول لها احمدي ربنا انه قدرك تخرجي من العلاقة وماتلوميش ع اللي مش قادرة لان مش كل الناس زي بعضها ومش كل الناس ظروفها زيك والكلام دة انا قلته قبل كدة كتير فيه ناس ملهاش اهل معندهاش مكان تروحه ولاحد يساندها ولا حتعرف تصرف على أولادها فكفاية اللي هي فيه هي مش ناقصة حد يلومها ويجرح كرامتها المجروحة أصلا ، ارحموا من في الأرض يرحمكم من في السماء ، المهم اللي عايزاكي تتعلميه النهاردة ان إبقاء العلاقة على قيد الحياة مش مسئوليتك لوحدك فلو الطرف التاني مش بيمد ايده لكي عشان تحيوا العلاقة سوا فتأكدي انه مش شخص سوي او انه شخص مستغني عن العلاقة ، في الحالة دي حاولي تعرفي هو مين فيهم اذا شخص سوي وعايز يخرج من العلاقة خلاص موضوع منتهي اما اذا كان شخص مش سوي فانتي لازم تخرجي نفسك برة العلاقة بنفسك بالتشافي ، ازاي حتعرفي اذا هو سوي لكن مش عايز عالعلاقة ولا غير سوي ؟ لوكان الشخص اللي معاكي دائم اللوم عليكي وبيوجه لك دايما الاتهامات ان انتي السبب في خراب العلاقة وان انتي مقصرة وان لازم تتغيري ولازم تبذلي مجهود اكتر عشان تحافظي ع العلاقة وهو شايل ايده تماما وشايف نفسه مفهوش غلطة وهو عامل اللي عليه وزيادة وان دورك انك تحيي العلاقة لوحدك فدة شخص غير سوي ، اما لو الشخص سوي حيقول لك ان احنا الاتنين مسئولين عن العلاقة وواضح اننا ماقدرناش نحييها لأننا مختلفين فلازم ننهي العلاقة ، دة الفرق بين الشخص السوي والغير سوي وكمان الشخص الغير سوي مش بيكون عايز ينهي العلاقة هو بيكون عايزها تستمر وتكبر بس تتغذى على روحك وجسدك يعني بتكوني انتي القربان اللي بيتقدم للنار عشان تستمر العلاقة .
احسن طريقة تعرفي بيها انك في علاقة سامة انك تراقبي مين فيكم اللي بيحاول يصلح العلاقة وبيحاول يحييها ويحافظ عليها اذا لقيتي الطرف التاني بيحملك مسئولية إحياء العلاقة لوحدك وهو متفرج وناقد تأكدي انك في علاقة سامة