رقم حجز الاستشارات والكورسات : ٠٠٢٠١١٥٠٥٨٦٠٥٢

علامات ودلائل ضعف النرجسي مع امثلة حية "قاهرات النرجسي"
شوفي حفضل أقول لك انتي اقوى من النرجسي مهما كنتي ضعيفة . ليه لان النرجسي أصلا هش وضعيف جدا فوق ماتتخيلي ، هو أصلا متدمر بسبب صدمات مر بيها من الطفولة فهو كله نكد وحقد وحزن وضعف ،هو بيمثل القوة دي وبيتقمصها لكن هو فعلا طفل جريح واختار طريق الشر واللوع يعيش بيه فبيفضل ضعيف مهما عمل ومهما ادعى القوة ، هو أصلا بيدعي القوة دي عشان متوهم انه كدة بيحمي نفسه من الرفض والاهانات اللي حصلت له من اهله او من مجتمعه وهو طفل
حالات كتير بتيجي تحكي حاجات عجيبة عن تناقض النرجسي اللي هو في البيت سي السيد والرعب كله وتلاقيه مع اهله كتكوت او حتى لو عنده بنت شخصيتها قوية بيكون معاها قط لطيف وكيوت
حالة بتقول ان هي بتخاف من النرجسي لدرجة اني بقول لها لها سافري يومين لوحدك مع ابنك برأت لي وحسستني اني بقول لها روحي خوني جوزك ، يعني من الرعب الفظيع اللي هي فيه قالت لي ايه دة هو انا ممكن أقول له عايزة اسافر ؟ قلت لها انتي خايفة قالت لي طبعا . وفي نفس السيشن هي بتحكي موقف حصل بين جوزها دة وبين بنتها البنت كلمته بحسم وندهت له باسمه وقلبت الموضوع هزار وهو أصلا كان جاي يزعق لها بدون أي سبب منطقي ، البنت عمرها ١٦ سنة يعني لسة طفلة لكن قدرت تخوف ابوها النرجسي بذكائها وقوة شخصيتها . وهو فعلا خاف وهزر معاها والحالة بتقول انه تقبل الوضع عادي جدا وكانت مذهولة لانها كانت متخيلة ان الموقف دة كان ممكن تطير فيه رقاب ، يعني بالبلدي كدة هي كانت موهومة انها ادام وحش حياكلها لو اتنفست وطبعا لما شافت الموقف مع بنتها بدأت تعيد رسم صورة الوحش من اول وجديد
حالة تانية بتقول انها كانت مستحيل تعترض على أي حاجة حتى لو بيطلب حاجة حرام لانها كانت لما تعترض يقلب البيت نكد ويتخانق ع الهوا ويدور على أي حاجة يزعق عليها وبعدين اتفاجئت ان بنت اخته اللي اصغر من اصغر بنت عنده بتكلمه بمنتهى قلة الادب وبتزعق وتشخط فيه وامها بتشتمه ادام الكل وهو راجل مركز وصاحب سلطة . الحالة بتقول حصلي ذهول انا وبناتي من هول المفاجأة .بقى دة اللي عامل لنا رعب وفزع وممشينا على قشر بيض بيتهزأ كدة ببساطة ،هي بتقول ان من ساعتها وبناته عملوا له حدود وبقوا يتعاملوا معاه بمنتهى الحسم والحزم وتجنبوه تماما وهو بدأ يجري وراهم ويشتري ودهم طبعا لانه بيحب اللي يهمله . نفس الحالة بتقول انها بعد التشافي مبقتش بتخاف منه وصورة الوحش اتدشدشت من ساعة الموقف دة .
حالة تالتة ودي مهمة جدا بالرغم من اني مش بشجع الموضوع دة ابدا لكن ححكيهولكم عشان تعرفوا اد ايه النرجسي ضعيف وهش وانتي راسمة له صورة وحش وهو ماحصلش قطة
الحالة دي خارجة من بيت الاب والام فيه نرجسيين يعني شاربة المر من ساعة ما اتولدت لحد ما ربنا كرمها وبدأت تتعالج ، المهم هي أصلا جاية من بيت أهلها مستكفية وطبعا النرجسي بينقي الناس دي وبيكون حريص على الحفاظ عليها لانه بيكون شايفها ضعيفة ،المهم هو اتهبل ومد ايده عليها ودي كانت نهاية الوحش ، هي بتقول انا ماحستش بنفسي فضلت اضرب فيه وهو جري مني ودخل الحمام وقفل عليه وقعد يبكي في الحمام ،تخيلوا الضعف اد ايه ،ومحدش يقول ياحرام وياعيني لان هو أصلا يستحق اكتر من كدة هو خاف وبكى بسبب اللي كان بيتعمل فيه وهو صغير وهو كمان ضحية لكن ليه يختار طريق الشر هي كمان اتعمل فيها اده عشرين مرة لكن هي كانت واخدة طريق الحب والعطاد وكانت بتعامله احسن معاملة ،ليه هو يمد ايده وبدون سبب .يعني محدش يتعاطف مع الشيطان ،
المهم انك تفهمي ان النرجسي ضعيف وجبان والحكايات كتير لكن الوقت مش حيسعنا نقولها كلها لكن كل فترة حجيب لكم امثلة وقصص لقاهرات النرجسي ان شاء الله