رقم حجز الاستشارات والكورسات : ٠٠٢٠١١٥٠٥٨٦٠٥٢
هل انتي مهمة عند النرجسي؟
احنا متفقين ان النرجسي لا بيحس ولا بيحب ولا انتي ولا غيرك ولا حتى أولاده ولا امه وابوه . طيب امال ازاي تكوني مهمة عنده ؟ ايوة مهمة عنده زي ماعربيته مهمة وطول ما انتي محطوطة في القالب فانتي مهمة جدا ، وطول ماهو مستفيد منك فانتي مهمة جدا ومايقدرش يستغنى عنك مش حبا لا مصلحة عشان كدة بنشوف النرجسي بينهار لما تفاجئيه بالتغير او بطلب الطلاق خصوصا النرجسي الخفي اللي مبيكونش عنده بدائل لكي
طيب ايه سر اهميتك دي ؟
عشان تعرفي سر اهميتك لازم تعرفي ايه اهم حاجة عند النرجسي وايه أولوياته وانتي حتفهمي ازاي تكوني مهمة عنده وتفضلي مهمة .دة لو انتي مضطرة تتعايشي

أولا: النرجسي بيعتمد عليكي اعتماد كامل في انه يحس انه بني ادم ذو قيمة في الحياة ، تخيلي ؟ هو أصلا بياخد منك التقدير والاحترام اللي بيأكدوا له انه انسان محترم وبيأكدوا له أوهام العظمة اللي عنده . سواء دة عن طريق حبك وادمانك له واللي هو بيحاول يزوده بخداعك بالهوفرينج ( اللي هو شوية الحب المكذوب اللي بيوهمك بيه لو حس انك حتبدأي تفهميه فيلخبطك ..عشان الناس اللي بتسأل يعني ايه هوفرينج) المهم انه انتي حبك وادمانك دة هو اللي بيخلي النرجسي يحس ان له قيمة ودة اللي بنسميه الوقود الإيجابي ، او يحس بقيمته عن طريق اضعافك واذلالك وانهياراتك ودة الوقود السلبي انا عارفة انك كلكم عارفين الكلام دة لكن بكرر عشان اللي اول مرة يسمع عن النرجسي يفهم
طيب كدة فهمنا ان النرجسي اهم حاجة عنده نفسه واحساسه الوهمي بالعظمة وانك تحسسيه باهميته وتهتمي بيه وتركزي على بطولاته وتحسسيه انك مقتنعة انك اخدتي اعظم راجل في العالم وطول ما انتيب تعملي دة طول ما انتي مهمة عند النرجسي تبعا لأهمية عملك وانجازك فيما يخصه ويخص نفسه المهمة

ثانيا : طيب تاني حاجة مهمة عند النرجسي النجاح والثروة ودة على حسب شخصية النرجسي بتميل لانهي فيهم اللي بيهمه النجاح العلمي بيروح ياخد ضحية أستاذة في الجامعة او واحدة بتدرس وبتحب العلم فيستفيد منها في انها تساعده في دراساته وابحاثه ولو هو بيميل للثروة بيروح ياخد واحدة بتكسب كويس وعقلها اقتصادي وشاطرة جدا في انها تدبر أموالها وهي فعلا بتكون المدبر الرئيسي لشغله وتجارته وطول ماهي بتساعده في شغله وطول ماهو محتاج لها طول ماهي مهمة لكن اذا قدر يستغني عنها وخصوصا بعد مايكبر ويحقق الثروة والنجاح العظيم اللي هو عايزه بيحس ان انتي شريكة النجاح دة ودايما جواه عارف ان لولاكي ماكنش نجح وانه مدين لكي بالثروة والنجاح فدة بيحسسه انه مسجون وانه مش هو اللي عظيم وانه فيه حد شايف انه ضعيف وان مش هو اللي محقق النجاح دة بالرغم من انه ممكن يكون تعب وبذل مجهود حقيقي لكن هشاشته وضعف ثقته في نفسه بيصور له كل دة فيبدأ يفكر انه لازم يتخلص من الشعور دة واللي بيتنشط كل مايشوفك فيبدأ يخرج فيكي الغضب الناتج عن الإحساس بالفشل او انه يقرر يتخلص منك تماما ويخرجك برة حياته بمنتهى البساطة وبدم بارد .عشان كدة لازم اللي بتساعد النرجسي في شغله لازم تكون ماسكة في ايدها سر ماتديهولوش ابدا يعني العملاء مثلا قايمة العملا ماياخدهاش ولا هو ولا غيره ، تمسك إدارة هو ميكونش له دخل فيها ،تدير الصفقات وتقوي علاقتها بالعملاء بحيث هو مايقدرش يستغنى عنها ودة طبعا مش بيكون سهل في كل الحالات
ثالثا: انتي المكون الرئيسي للصورة المجتمعية وانتي كمان اللي بيرسم باقي الصورة بالاولاد وتربيتهم ودراستهم وزيجاتهم فطول ما انتي بتحققي الهدف فانتي مهمة .
رابعا وأخيرا زي ما قلنا قبل كدة انتي ذاكرة التاريخ انتي لما يكبر وتخلص إنجازاته وتقل أوهام العظمة مطلوب منك تفكريه بامجاده وبطولاته وتسمعي حكاويه المتكررة المملة وتمجدي وتعظمي وفي الوقت دة انتي لا بتبقي عايزة تستمري ولا تتعايش ولا تشوفيه أصلا فمش بتقدري تعملي دة وهو بمنتهى الجبروت بيروح مطلق لو كان يقدر يطلق وفعلا بنشوف حالات بتتطلق فجأة لما النرجسي يعدي الستين وهو فاكر انه عاقبها وهو حررها فعليا من سجنه وهي بتفهم دة بعد ماتتجاوز الصدمة