رقم حجز الاستشارات والكورسات : ٠٠٢٠١١٥٠٥٨٦٠٥٢
ليه زوجة النرجسى بعد اكتشافها ان زوجها نرجسى وبعد ما تبدا التشافى وتبدا تركز مع اولادها.. وتصطدم بصعوبة التعامل معاهم.. بيجيلها شعور فظيع وشك انها نرجسيه زى زوجها. وانها هى السبب مش زوجها.. ؟كنت فاكره انى لوحدى اللى عندها الاحساس ده لقيت بوستات كتير لامهات عندها نفس الشعور.

شوفي المشكلة ان زوجة النرجسي بتكون مشغولة تماما عن أولادها قليل جدا من الزوجات اللي بتاخد بالها منهم وبتقرب منهم وتمنحهم الحب والحوار والقبول ، المشكلة ان النرجسي بيكون عايز الأولاد في صورة حلوة عشان صورته تطلع حلوة فبيركز على اكلهم ولبسهم ودراستهم (دة لو مش بخيل) وطبعا بيكون ضاغط على زوجته انها لازم تنجز الصورة دي على اكمل وجه فهي بتلاقي نفسها فعلا كل تركيزها على اكلهم وصحتهم وبالتالي طول الوقت في المطبخ وكمان لازم تاخد بالها من لبسهم وبالتالي وقت طويل في الغسيل والمكوى والشراء وما شابه وناهيكي بقى عن التمارين ومشاويرها وفوق كل دة الدراسة ،المفروض ان الام بتعمل كل دة أي ام مش زوجة النرجسي بس لكن الام اللي زوجها سوي بتعمل كل دة بروقان بال وكمان الزوج السوي ممكن يشارك ولو هي تعبت بيشيل عنها انما وبتكون بتعمل كل دة حبا في أولادها وحرصا عليهم ،انما بقى زوجة النرجسي بتعمل كل دة حبا في النرجسي وخوفا من زعله وخوفا منه وبتكون حريصة جدا على انها تنفذ كلامه بالحرف الواحد مع الرعب والتوتر اللي بيعمله لها بتكون بتعمل نفس المجهود لكن بتوتر ومش عايزة أقول عدم حب بس هي أصلا بتكون دايرة في دوامة مش حاسة بأي حاجة وللأسف مش بتكون شايفة أولادها هي مش شايفة غير النرجسي سواء حب فعايزة تنفذ له كل رغباته وعايزة تفرحه ،او خوف فعايزة تتقي شره او عايزة تثبت له انها احسن من اللي بيقوله عليها ،المهم ان هي مش بتكون بتتعامل مع أولادها بمشاعرها ،هي بتحبهم اه لكن مش فاضية للكلام دة او مش موجود في بؤرة تفكيرها هي كل مشاعرها منصبة في اتجاه النرجسي واهتمامها كله عنده فحتى مش في دماغها انها تعبر عن حبها لاولادها ومش في دماغها انها تسمع لهم ولو حب واحد فيهم يتكلم معاها بتكون عصبية ومتوترة ومش طايقة نفسها أصلا لانها بتجري ورا البيه اللي بيشات ولا بيقابل ولا حييجي يعمل مشكلة من لاشيء وهكذا ،فأول ماتفوق بتلاقي نفسها مش فاهمة أولادها ولا عارفاهم ولا حتى هم عارفينها كمان ممكن يكونوا شايفينها الساحرة الشريرة لان النرجسي كان شغال على دماغهم بمنتهى اللؤم (زي اللي كان بيقول لأولاده لما ماما تيجي حقول لها عليكم عشان تعاقبكم ،يعني عاملها البعبع اللي بيخوفهم بيه) ، فهي لما تبص لأولادها وتلاقي اشخاص لكل واحد فيهم طابعه الخاص واللي منهم حنين واللي منهم جامد واللي منهم عصبي وكأن كل واحد منهم واخد واحدة او اتنين من صفات ابوه وبعضهم يكون شبهه في الشكل فهي بعد الفوقان تتفزع الا يكونوا العيال طالعين لأبوهم ، طيب مش الأول تقربي منهم وتعرفي هم مين وهم ايه وبعدين تحكمي؟ المشكلة بقى ان بعض الزوجات لما بتتصدم في طباع أولادها وهي أصلا منهكة ومصدومة وطبعا معندهاش طاقة تصبر عليهم وتشوف مشاكلهم فبترفضهم من غير ماتاخد بالها هي في الواقع بترفض واقعها وبترفض حياتها حتى نفسها بتكون رافضاها والمفروض ان كل دة بيهدى مع مرور الوقت ،بس هي بقى مش بتصبر على نفسها هي بتبدأ تتهم نفسها على طريقة النرجسي المزروعة جواها وتبدأ تقول لاكون انا اللي نرجسية وانا السبب في المشاكل لا أكون ظلمته وظلمت اولادي كمان ،انا اللي بخرب البيت وطبعا الأولاد بيكونوا شبه مقتنعين ان هي السبب في المشاكل فبيبدأوا يعبروا عن دة بمجرد ماهي تقرب منهم لانهم مابيصدقوا ان يحصل حوار بينهم وبينها، فكلام النرجسي اللي في دماغها بيتوافق مع كلام النرجسي اللي في دماغ الأولاد وبالتالي فعلا بتشك في نفسها
عايزة اطمن كل واحدة خايفة لاتكون نرجسية انها مش نرجسية ابدا لان النرجسي لو اكتشف انه نرجسي بيكون مبسوط وفخور انه نرجسي مش خايف يكون نرجسي طيب الام في الحالة دي تتصرف ازاي وتسترد أولادها ازاي؟شوفي فيديو
"ازاي تمنعي النرجسي انه يقلب اولادك عليكي؟ وازاي تسترديهم لو قلبهم عليكي فعلا"