رقم حجز الاستشارات والكورسات : ٠٠٢٠١١٥٠٥٨٦٠٥٢
- تتعاملي ازاي مع النرجسي بعد مايعرف انك قفشتيه في خيانة ومش حتعرفي تاخدي موقف ولا تسيبيه
دلوقتي احنا اتفقنا في حلقات قبل كدة انك لو عرفتي ان النرجسي بيخونك وانتي مش حتقدري تاخدي موقف ومش حينفع تهدديه بالطلاق لانك مش مستعدة أصلا للطلاق اتفقنا ان في الحالة دي ماتعرفيهوش انك عرفتي ومهما حاول يسيب لك دليل ولا كأنك شفتي حاجة نهائيا
طيب لو انتي ماقدرتيش تسكتي وواجهتيه او حكيتي لحد وهو عرف ،المهم لو هو عرف انك عرفتي انه بيخونك مفروض تتعاملي ازاي في الحالة دي؟
دلوقتي انتي عرفتي وسكتتي يعني انتي قبلتي يبقى حينطبق عليكي المبدأ النرجسي انا مروضها على تقبل الخيانة ودة معناه انه حيكلمها ادامك ومش بعيد يجيبها البيت وانتي مش موجودة وشوية شوية يجيبها وانتي موجودة ولا يقول لك روحي اخطبيها لي ، المهم انتي لازم تتجنبي كل دة ، ازاي؟
بعد التشافي والتخلص من الإدمان طبعا وبعد علاج اضطراب ما بعد الصدمة بالتشافي برضه .
أولا: انشغلي عنه جدا بكل الطرق ،اللي هو يحس انك مش فاضية تفكري في الموضوع اللي عرفتيه ،انتي تقدري تحسسيه انك مشغولة للدرجة دي ،خليه يحس انك بتشغلي نفسك عشان تنسي الموضوع ادرسي او زودي شغلك او ذاكري لاولادك او اخرجي كل واحدة وامكانياتها وحسب الحرية اللي مديها لها النرجسي
ثانيا : حاولي تحسسيه انك عندك انكار للكارثة اللي عاملها حتى لو هي بالنسبة لك مش كارثة ولا حاجة وانتي مبسوطة انه حيتلهي عنك شوية وماصدقتي يبعد عنك برضه حسسيه ان الموضوع كبير لدرجة انك عاملة انكار ومش عايزة تصدقيه وتوصلي له الانكار دة ازاي ؟ تعامليه عادي جدا ماتغيريش معاملتك ابدا وكأنك مقتنعة انها مجرد زميلة او معرفة وهو بيعاملها زي اخته لدرجة انك لو كلمها ادامك تقولي له فلانة دي سلم لي عليها ، ودايما لما تتكلمي عنها تقولي مسكينة ظروفها وحشة دة لو هي في نطاق اجتماعياتكم ومعروفة أصلا بالنسبة لك ، اما لو ماتعرفيهاش أصلا فلما يكون بيكلمها او يرمي لك أي كلام عنها ماتتعامليش على انه بيخونك معاها ابدا اتعاملي على انك مش مصدقة ان فيه بينهم حاجة وانها مجرد واحدة وحتاخد وقتها وتمشي ، الموضوع محتاج قوة وثبات انفعالي انا عارفة بس انتي أصلا لو تعافيتي مش حيكون عندك أي مشكلة في كل اللي بقوله لانك بتكوني مش بتغيري عليه أصلا
ثالثا: لو جه يقول لك انا بحب فلانة وعايز اتجوزها قولي له حقك ياحبيبي الشرع محلل لك أربعة زي ماحالات كتير بيقولوا والجملة دي بتعفرت النرجسي ومعظم الحالات بتقول ان النرجسي بيتجنن ويقول لها انتي ازاي كدة ازاي بقيتي كدة ، وبرضه في الحالة دي بتعامليه عادي جدا ولا كأنه قال أي حاجة ،لازم تتماسكي جدا ادامه وتأكدي انك لو زعلانة ومش قادرة تنفذي الكلام دة فانتي محتاجة ترفعي هرموناتك ولازم تشتغلي التشافي عشان تخلصي من الإدمان عشان تعرفي تتعاملي
رابعا : دي فكرة حالة من الحالات قالت لو عرف انك عرفتي وبدأ يبان عليه الارتباك او الهجومية بيني له انك مش مصذقة انه بيخون وانك أصلا واثقة فيه او انك متأكدة انها نزوة وحتعدي وانتي عارفة انه شخص محترم ومالوش في العك ولو هو عايز يتجوز حيتجوز ايه اللي حيخليه يخون وتتعاملي على أساس ان مفيش أي حاجة بتحصل والكلام دة ممكن توصلي له عن طريق القرود الطائرة سواء امه او اخته او مرات صاحبه ، القرود الطائرة في الحالة دي حتكون مفيدة جدا لانك ممكن ماتقدريش تفتحي معاه الموضوع أصلا فانتي أي حاجة عايزة توصليها له من اللي قلناه كله ممكن تستخدمي فيها القرود الطائرة بس خدي بالك انك ماتقوليش غير اللي انتي عايزاه يعرفه وعمرك ماتآمني للناس دي ابدا .
أسوأ الحالات اسوأها تماما اللي بيوصل انه يكلم الجديدة دي ادامك وادام أولاده وفي الحالة دي هو مصر انك تعرفي عشان تفجري مشكلة وياخد وقود او عايزك تطلبي الطلاق وطبعا دة مش في خطتك حاليا فانتي لازم يكون عندك ثبات انفعالي وماتتفاعليش ابدا وعليكي بالدعاء وبس طول الوقت تقولي حسبي الله ونعم الوكيل وبس