رقم حجز الاستشارات وكورس كوني ملكة : ٠٠٢٠١١٥٠٥٨٦٠٥٢

اوعي النرجسي يوديكي جهنم بإرادتك
النرجسي بيهددني اما اشهد زور في المحكمة او يطلقني وياخد من اولادي
حالة بتقول ان النرجسي بيهددها اما تشهد زور في المحكمة او انه يطلقها وياخد أولادها
طيب تعالوا نشوف كدة حكم شهادة الزور دي ايه ؟ شهادة الزور من اكبر الكبائر : النبي عليه الصلاة والسلام قال ايه الاانبئكم بأكبر الكبائر ثلاث الاشراك بالله وعقوق الوالدين وقول الزور ، شهادة الزور كبيرة من الكبائر والنرجسي بيجبر زوجته عليها وغيرها كتير عشان الناس اللي مقهورة اننا بنتكلم عن النرجسيين وخايفين البيوت تتخرب
المهم دلوقتي النرجسي مخيرك بين اولادك وبين ربنا دة باختصار ولو مش مفهومة فهو بيخيرك بين الدنيا والاخرة ، كل ما إحالة تقول لي حياخد اولادي أقول لها اوعي تسيبيهم له ماتهربيش وترميهم فدو لكي ، لكن دي الحالة الوحيدة اللي بقول لها سيبي اولادك وماتخسريش اخرتك ولو ضحيتي باولادك عشان ربنا هو ربنا اللي حيرجعهم لك وحيحميهم لك لانك ماعصيتيهوش ،لكن لو عصيتيه عشانهم مايدريكي ان العذاب في الدنيا يكون على أيديهم وفي الاخرة والعياذ بالله جهنم
،الاختبار صعب جدا انا عارفة وكمان ربنا عارف وربنا عارف كمان ان انتي عندك القدرة انك تنجحي فيه وانك تقدري تقولي لا للنرجسي والا لو انتي عاجزة مكنش ربنا يحاسبك ،
يا زوجات النرجسيين اتعلموا تقولوا لا قبل ماتلاقوا نفسكم واقفين ادام ربنا وبيسألكم انتي ليه اطعتي العبد وعصيتيني وانا ربك وربه
اتعلمي تعترضي وتقولي لا عشان تنقذي نفسك صدقيني ماحدش حيشيل وزرك ولو النرجسي قال لك انا حشيل الذنب عنك اوعي تصدقيه ولا تزر وازرة وزر أخرى
يا حبيبتي انتي رزقك في السماء ربنا قال كدة وفي السماء رزقكم وماتوعدون يعني ماحدش حيطول رزقك عشان يمنعه عنك ماحدش بيرزق ولا يمنع غير ربنا ،ورزقك دة كل حاجة بتاخديها في الدنيا مش الاكل والشرب واللبس والفلوس وبس لا رزقك دة علم واخلاق وحب واولاد وأصدقاء ومساندة وكل شيء بتاخديه في الحياة رزق والرزاق ربنا وبس فانتي مفروض تروحي لمين عشان تاخدي الرزق دة ومفروض تتذللي لمين عشان يديكي الرزق دة ، بصي كدة على نفسك وشوفي انتي مذلولة لمين؟ واللي انتي مذلولة له دة بيرزقك؟ هل طيب بيديكي من اللي ربنا رزقه بيه عشانك؟ هل هو بيديكي اللي ربنا قال انه مفروض يديهولك ؟ هو مش بيديكي أي حاجة أصلا بالعكس بياخد منك وانتي متذللة له ،يابنتي فوقي وشوفي انتيب تعملي ايه في نفسك وفي اولادك وبتعلميهم ايه بخضوعك دة
مهما كان النرجسي قوي وشرس مهما كانت سلطته وثروته فهو ادام ربنا ولا حاجة حرفيا ولا حاجة ولو انتي استنجدتي بربنا صح عمره ماحيقدر عليكي ، لوانتي اتعلقتي بربنا صح وفهمتي ربنا صح وحبيتي ربنا صح حتفهمي ان الخير كله عند ربنا وبس وان القوة والجبروت لله وحده وفي الحالة دي مش حتخافي من النرجسي مهما كان هو مين
هي مش دي الحالة الوحيدة اللي شفتها النرجسي بيزقها على جهنم زق لا كتير اللي عايز علاقات محرمة في وجودها واللي بيطلب منها علاقات ثلاثية واللي عايزها تشرب معاه خمر ومخدرات ، طبعا الكلام دة مش منطبق على كل النرجسيين لكن منهم كدة واسوأ والحالات دي مش بنقول لها تعايشي ولا اصبري لا دي بنقول لها اهربي باولادك لان دة مش امين عليكم والمفروض انك مجرد مايقولك صريح كدة اعصي ربنا مفروض تسيبيه في التو واللحظة مش لسة حتدعي عليه لا سيبيه فورا وابقي ادعي عليه بعد كدة
واسألوا الشيوخ ايه حكم الشرع في الزوج اللي بيحض زوجته على المعصية والكبائر