رقم حجز الاستشارات وكورس كوني ملكة : ٠٠٢٠١١٥٠٥٨٦٠٥٢

ايه اللي وصلك لكدة؟ النرجسي ولا انتي؟
حالة بتقول في الخطوبة مرحلة حب دهبية عظيمة وبعد الزواج بدأنا في مرحلة التحقير وكان علطول زعيق وخناق وصوت عالي وضرب في النادر ، "وهي بتوصف بتقول كنا عايشين حياة عادية " المهم ربنا فتحها عليه وفلوسه زادت ونقلنا في فيلا ومن وقتها زادت المشاكل وزاد مد الايد والمعاملة بقت في منتهى السوء ،وشوية عرفت انه اتجوز ، واهم حاجة هاماها ان عمرها راح معاه واتجوز عليها وطبعا الأولاد اتربوا غلط.
الوضع النهاردة ايه ؟ علاقتها باولادها مش كويسة خصوصا الكبير ونفسيتهم وحشة طبعا وهي نفسيتها متدمرة وفي نفس الوقت متأقلمة وعايشة وبتبكي وبس.
هل هي السبب في الوضع دة ؟ ايه اللي خلاها تعيش كل السنين دي في الحياة دي وهي فاكراها حياة عادية؟
اول حاجة لازم نفهمها هنا انها اعتبرت الحياة اللي كلها زعيق وخناق ونادر لما يضربها ،هي بتعتبر ان دي حياة عادية ، وكلمة عادية هنا معناها كبير جدا معناها انها متعودة على ان هي دي الحياة وان هو دة العادي ، ودة ملوش غير معنى واحد ،انها كانت عايشة في اسرة الام بتنضرب او بتضرب او بمعنى أوضح اما ابوها كان بيضرب أمها او ان أمها او ابوها كان بيضربها هي واخواتها ، يعني المعاملة السيئة والضرب والاهانة بالنسبة لها شيء تم التعود عليه ، خلاص اصبح ادراكها ان دة وضع غلط مش موجود ليه لانها اتعودت ، زي بالظبط لما تدخلي مكان فيه ريحة وحشة اول ماتدخلي حتنتبهي وتقولي ايه الريحة دي وتغطي مناخيرك وشوية شوية حتلاقي نفسك بدأتي تتقبلي الريحة وشوية وتلاقي نفسك خلاص مش حاسة بالريحة أصلا ولو فضلتي قاعدة فيها أيام مش حتحسي تاني ان فيه ريحة وحشة وحيتهيألك ان الريحة راحت او ان الدنيا كلها ريحتها كدة لكن لو خرجتي برة وشميتي هوا نضيف ورجعتي المكان اللي ريحته وحشة ساعتها بس حتدركي ان الريحة لسة موجودة ماراحتش ولا العالم كله ريحته كدة ، هو دة وضع الحالة اللي اتربت في بيت كله اهانات وخناق وضرب ،متعودة على كدة وشايفة ان دة العادي لكن اذا حد شاف العادي دة وقال لها ازاي انتي عايشة كدة ساعتها بس ممكن تفكر ايه دة هو فيه غير كدة؟
طيب هي لما اتربت في بيئة سامة كدة وبعدين طلعت منها على بيئة سامة زيها تماما فطبيعي جدا انها تتخيل ان دة العادي خلاص لما اتجوزت نرجسي ملقتش فيه حاجة مختلفة عن العادي اللي هي كانت عايشاه فاستمرت الحياة .لحد النقطة دي هي عندها عذرها لكن لما ربنا ينور لك ويقول لك فوقي بقى دة مش عادي دي اشخاص مضطربة وبعدين انتي تيجي تقولي تاني كانت حياة عادية ،دة معناه أيه؟ معناه انك لسة محتاجة تعرفي وتقرأي او تسمعي عن الشخصية اللي انتي اكتشفتي انك عايشة معاها من ساعة ما اتولدتي سواء اب او ام وبعدين زوج ، لو قرأتي وفهمتي الشخصية صح حتعرفي حاجات كتير ومش حتحزني الحزن دة كله .
طيب خدي بالك بقى اذا انتي اتعمل فيكي كدة واتعودتي على ان دي الحياة وان دة العادي وطبعا قبلتي على نفسك حاجات كتير مكنش مفروض تقبليها واتعمل فيكي حاجات كتير وانتي فوتي وحاولتي تعيشي وخلاص ومر العمر ولله الامر طيب واولادك وبناتك هل حنكرر معاهم نفس اللي حصل ؟ هل حتعلميهم ان دي الحياة العادية ،طب وانا مالي هو انا النرجسي؟ اعمل انا ايه طيب ؟ انتي صمتك وسكوتك وتقبلك اللي بيحصل بيوصل لبنتك ان دة العادي زي ما وصل لك ، حتى لو انتي معندكيش القوة انك تقفي ادام النرجسي وتعترضي فعلى الأقل لازم يكون فيه حوار بينك وبين اولادك انك مش راضية عن الوضع وانك بتخططي انك توقفي المهزلة دي او انك بتخططي انك تتركي ابوهم اذا ما عدلش سلوكه واذا أطفال لازم يكون فيه تعليق منك علي التصرفات الغلط اللي بيعملها ،ماتكرريش أخطاء اهلك لما قالوا لك الكبار مش بيغلطوا ولو غلطوا ماينفعش نقول انهم غلطوا وان ماينفعش نقول لا للكبير حتى لو غلطان وان الكبير مايعتذرش للصغير والصغير هو اللي يعتذر حتى لو الكبير هو اللي غلطان .. كل المبادئ المغلوطة دي لازم نتخلص منها ومانقولهاش لاولادنا ابدا ولازم يفهموا ان الغلط غلط مهما كان مين اللي عمله حيفضل غلط وحيفضل له عواقب مؤذية للي غلط . .
اذا انتي اتعودتي علي تقبل أخطاء النرجسي فمتخليش اولادك يتعودوا على كدة عشان ماتبقاش حياتهم شبه حياتك