رقم حجز الاستشارات : ٠٠٢٠١١٥٠٥٨٦٠٥٢
لينك حجز الكورس ع الواتس:
https://chat.whatsapp.com/B8RBbEPYIzXHCnfvfry3mr

ماتحبسيش نفسك جوة النرجسي حتى بعد ماتسيبيه
انا عايشة بس عشان اشوف انتقام ريبنا من النرجسي
انتي عارفة انتي كدة بتعملي ايه في نفسك؟ شوفي في الأول النرجسي كان حابسك جواه وجوة تفكيره ومشاعره زي ماقلنا كتير قبل كدة النرجسي بيوصلك انك تفكري أفكاره وتحسي مشاعره قلنا
في حلقة ليه مش قادرة تنسي النرجسي ؟ "الانجراف والاندماج مع عقل النرجسي"
طيب بعد ما فهمتي انه نرجسي وفهمتي اللي عمله وبيعمله فيكي اتصدمتي وانهارتي وبعدين الحب العظيم اللي كان جواكي اصبح كره شديد ومرعب لدرجة انك بتتمني انه يموت ويختفي من حياتك واحنا اتفقنا ان دي اول مرحلة من مراحل التشافي وفك التعلق ، وطالما هي مرحلة يعني حاجة مؤقتة حنمر بيها ونعديها ونكمل طريقنا ، لكن للأسف اللي بيحصل ان كتير من الحالات بتقف عند المرحلة دي وتثبت فيها ومش عايزة تعديها وهي دي اللي بتعيش طول عمرها بتستنى تشوف انتقام ربنا من النرجسي ، بدل ماتستنى تشوف نصر ربنا لها وتعويضها عن اللي حصل لها ، الحالة دي بقى بتحبس نفسها تاني جوة النرجسي وجوة نفسه السيئة اللي هو كان حابسها فيها من غير ماتحس دلوققتي هي بتحبس نفسها بنفسها وبرضه من غير ماتحس هي بتؤذي نفسها ازاي
ليه وازاي دة بيحصل؟
شوفي انا حقول لك بمثل صغير عشان اقرب لك المعنى ، انتي لما بتكوني رايحة مكان وعايزة تركبي أي مواصلة بتكوني عاملة ازاي واقفة في الشارع عينك ع المواصلة اللي انتي عايزاها لو اوتوبيس بتدوري ع الأوتوبيس وعينك مركزة على لون الأوتوبيس اللي بتركبيه ورقمه ولو تاكسي عينك مركزة على العربيات الصغيرة ولونها واقفة مش بتعملي أي حاجة غير تبصي ع المواصلة اللي حتركبيها هل في اللحظة دي تقدري تبصي في الموبايل او تقرأي كتاب او تتابعي اخبار او تعملي أي حاجة مفيدة لكي؟ اكيد لا لان كل تركيزك منصب على البحث عن مواصلة ولو أصلا حد حيفوت عليكي وانتي مستنياه فانتي برضه واقفة متأهبة ومستنياه وبتبصي على عربيته يعني برضه مش حتقدري تنجزي أي شيء طول ما انتي واقفة مستنية . تخيلي بقى ان دة اللي انتي بتعمليه في نفسك انتي قاعدة مستنية تشوفي انتقام ربنا من النرجسي واقفة ع المحطة ومستنية الأوتوبيس يعدي ولا بتتقدمي خطوة طيب افرضي الأوتوبيس اتأخر او قالوا لك مفيش اوتوبيسات حتطلع النهاردة حتعملي ايه حتفضلي واقفة ع المحطة معطلة نفسك؟ ولا حتشوفي مواصلة تانية او سكة تانية او تأجلي المشوار ليوم تاني ؟ انتظارك لانتقام ربنا من النرجسي ماهو الا عطلة لكي ،وحبس لنفسك في دايرة النرجسي بعد ماربنا خرجك منها ، طيب تخلصي ازاي من الدايرة دي؟ دلوقتي انتي فهمتي ان الانتظار حيعطلك والمفروض انك بدل ماتنتظري ابدأي اتحركي ابدأي اشتغلي وانجحي ،ابدأي التشافي وكملي خطواته عشان تقدري تخلصي من كل نقاط ضعفك ، اشتغلي ودخلي لنفسك قرش ولو بتشتغلي طوري من عملك وزودي دخلك ، انجحي في حياتك لو عايزة تشوفي انتقام ربنا من النرجسي فعلا فوضي امرك فيه لله وماتتشرطيش على ربنا وتقولي انتقم لي دلوقتي ، وفي نفس الوقت اتحركي انتي في نطاق امكانياتك وانجحي اكتر حاجة تموت النرجسي انه يشوفك بقيتي احسن لما بعدتي عنه ولما يشوفك نجحتي بعد مارماكي وسابك لانه بيتحسر ع الصورة الحلوة اللي رماها مش عليكي طبعا ع المكنة اللي كان فاكرها عطلت تماما واتفاجيء انها شغالة احسن من الأول ،
صدقيني لو عندك يقين بربنا وعارفة انه عدل وانه يمهل ولا يهمل حتطمني وحتعرفي انه حيخلص لك حقك ان عاجلا او اجلا
بطلي تسألي ليه انا حصل لي كدة لان السؤال دة فيه إساءة ادب مع ربنا ،ولانك مش عارفة ومش فاهمة نفسك مش عارفة ومش فاهمة السبب لكن لو لجأتي لربنا بالادب وسألتيه بأدب ودعيتيه انه ينور لك بصيرتك حيفهم كدة حصل لك ليه وايه الحكمة منه ، المهم الادب مع ربنا لا اعتراض ولا استعجال