لما النرجسي يقول لك انا مش عدوك لازم تفهمي العكس
فاكرين فيديو جمل فاضحة للنرجسي اهي الجملة دي من ضمن الجمل اللي فعلا فاضحة للنرجسي . حالة بتقول انه دايما يقول لها انا مش عدوك . لو انتي متأكدة ان زوجك نرجسي فعلا وكان بيقول لك الجملة دي باستمرار فدة معناه حاجة من اتنين ، اما انه حاسس انك عدوته وانك منافس له في كل شيء في الحياة لدرجة انك تنافسيه ع الهواء اللي بيتنفسه ودة بيكون إحساس النرجسي لو انتي كنتي قوية عليه ومش مدياه اللي هو عايزه بمعنى انك ممش بتتفاعلي معاه ومش بتديه الوقود السلبي وانه مش عارف يمسك عليكي غلطة وانك كويسة جدا مع اهله ومع كل اللي حواليه وانك محبوبة من اهلك وجيرانك واي حد يتعرف عليكي بيحبك والناس دايما تلجأ لك وتتلم حواليكي يعني لو انتي كنتي شخصية متعاطفة فانتي بتنافسي النرجسي ع الهوا اللي بيتنفسه وبالتالي بيحس انك اعدى اعداؤه لانك واخدة الاهتمام والحب من كل اللي حواليكم وهو بدأ يبقى مكروه ومنبوذ وخصوصا لو كان ظاهر او خفي وكبر في العمر وبدأ يظهر ، المهم في الحالة دي بيحس انك عدوته وبالتالي بيقول كدة سواء من باب الاسقاط او من باب ان فيه حاجة بتعتمل جواه ومش قادر يتحكم فيها فبيرميها بدون تفكير زيها زي كل الجمل الفاضحة اللي ربنا بيخليه يقولها عشان ينبهنا ويفوقنا وياريتنا بنفوق . والحالة التانية انه يكون عارف ومدرك تماما ان كل تصرفاته معاكي بتدل على على انه بيعاديكي وانه عدوك اللدود فعلا وخايف انك تحسي بكدة فبيبدأ يزرع جواكي بطريقته المعهودة انه مش عدوك وانك بيتهيأ لك وانتي اللي حساسة وهو بيحبك فبيكرر بغبائه الجملة طول الوقت ال يعني حيبرمجك ، لما النرجسي يقول لك كدة اعملي نفسك ماسمعتيش الجملة وماتعلقيش عليها غير كل عشر مرات مرة وتقولي له مين اللي قال كدة انت بتقول كلام غريب جدا وبس وكل عشر مرات تردي رد شبه كدة

من ضمن الجمل اللي بيقولها النرجسي في الحتة دي : انتي ليه مش قادرة تحبيني،وترجمتها انا ليه مش عارف احبك ولا احب أي حد زي ما انتيب تحبي وتتحبي من اللي حواليكي وانا عارف انك تستحقي تتحبي بس مش عارف انا ليه مش قادر احبك ، انتي عمرك ماحبيتيني وترجمتها انا عارف انك بتحبيني بس انا عمري ماحبيتك ، انا مش بكرهك ترجمتها انا بكره كل حاجة فيكي بتخليكي احسن مني حتى حبك ليا بكرهه لانه بيحسسني بعجزي عن الحب ، انتي ليه بتكرهي اهلي وترجمتها انا بكره اهلك لانهم بيسندوكي ولو زودتها معاكي حيقفوا لك ويبقوا ضدي وهم العائق الوحيد اللي بيمنعني اني احكم سيطرتي على انفاسك ، انتي عمرك ماحتفهميني انا الرجل الغامض اللي محدش يقدر يفهمني عشان انا فوق البشر وانتي أصلا اطيب من انك تدركي الشر اللي جوايا ولو ادركتيه عمرك ما حتستمري معايا يوم واحد ، انا فاهمك كويس وعارف انتي بتفكري في ايه وبتحسي بإيه وطبعا دي ترجمتها انتي ملكتيني مفاتيحك من اول يوم لانك امنتي لي وحكيتي لي قصة حياتك فلومي نفسك لا تلوميني