اشهر طرق التحقير عن النرجسي الوهم
النرجسي يقلل من قيمة زوجته بكل الطرق : ،
الوهم ، يعرف يوهمك كويس جدا ويحط افكاره في دماغك ويرتبها ويوهمك كمان انها افكارك
الحلقة دي كانت متسجلة زمان صوت بس لكن حبيت انزلها تاني عشان انشطها لانها مهمة جدا وحتكون مقدمة لحلقتين بعدها مهمين جدا جدا فياريت نركز فيها ونتابع الحلقتين اللي بعدها
طيب ازاي بيزرع أفكاره دي في عقلك؟ يقولها لك في وقت من اتنين : إما وقت صفا وقصف عاطفي او وقت رعب وفزع عامله فيكي وفي الحالتين دول بيكون الانسان في حالة من التنويم المغناطيسي (علميا للي بيحب علم النفس يقرأ عن التنويم المغناطيسي ) يعني بيكون عقلك الواعي غايب وعقلك اللاواعي هو اللي صاحي فالافكار في الحالة دي بتدخل مباشرة على اللاواعي
حفهمك يعني ايه الكلام دة انا قولته قبل كدة بس حقوله تاني عشان اللي اول مرة يسمعني ،دلوقتي عقل الانسان عنده إمكانية الحراسة يعني ايه يعني مش أي معلومة تدخل مخك وتثبت بيه لازم العقل الواعي يشوف المعلومة ينفع تدخل ولا لا طيب بيعرف منين انها ينفع تدخل ولا ماينفعش ؟ بيقارنها بالمعلومات القديمة اللي عنده اذا كان فيه شبهها او شيء متوافق معاها بيدخلها اذا لا مش بيقبلها وبالتالي انتي بتقولي ايه مش مصدقة المعلومة دي او بتقولي لا المعلومة دي مش منطقية
،طيب ازاي النرجسي بيستغل دة في تحقيرك والتقليل منك وخصوصا لو انتي مميزة عنه ودة غالبا اللي بيكون حاصل ؟ مثلا حيوصفك دايما بالغباء ، دايما يقولك هو انتي فاهمة حاجة خليكي انتي في المطبخ ولو حتى كنتي انتي استاذة في الجامعة ، لو اتكلمتي في اي موضوع ثقافي او فكرة علمية حيقول لك الكلام دة تضحكي بيه على العيال ، هنا هو بيكرر معنى انك غبية او جاهلة بجمل مختلفة وباستمرار عشان يخدع حارس المعلومات بتاعك العقل الواعي فلما تيجي المعلومة تدخل اول مرة بيرفضها العقل الواعي ويقول دي مفيش زيها في الذاكرة لكن لما المعلومة تكرر كتير بكلمات مختلفة لكن نفس المعنى بييجي وقت العقل الواعي يقول اه المعلومة دي موجودة اتسمعت كتير بيسمح لها بالدخول ويعمل لها ملف وانتي كدة اقتنعتي بيها وهكذا كل صفة النرجسي عايز يقنعك انها فيكي بيدخلها في مخك بالطريقة دي ،ودة حنقوله بشكل علمي اكتر بيبين خطورة الموضوع في الحلقة الجاية ان شاء الله. طيب ايه كمان النرجسي بيعمله عشان يحسسك انك قليلة اوي عشان يحسس نفسه انه كبير اوي ؟
، يشغلك خدامة في بيتك وفي بيت والدته ومش بعيد اخواته وقرايبه على حسب ضعفك ، وحيقولك لوجه الله او يرغمك بالارهاب ، لو انتي مستواكي المادي والاجتماعي ميسمحلوش بكدة وهو اهله برضه مش محتاجين لكدة حيذلك لهم ويسخر منك ادامهم كبار وصغيرين وحيخليكي في اخر الطابور علطول ، لو مشيتي معاه في مكان حتلاقيه ميمشيش جنبك ابدا لازم يكون سابقك بخطوتين ويخليكي تجري وراه عشان يحسسك بضعفك وعشان هو من جواه حاسس ان محدش يستحق يمشي جنبه ، لكن لو في مرحلة القصف العاطفي حيمشي وراكي مش جنبك بس ، عمره ماحينصفك مع حد مهما اتعمل فيكي انتي اكيد اللي غلطانة حتى لو حد ميعرفوش ، لكن لو حد عايز يوقع بينك وبينه عشان يخلص منه ويخليكي لوحدك وملكيش حد غيره ساعتها بس ممكن يغلطه ،،، طبعا لو انتي عايزة تدرسي مش حيسمح لك ولو انتي عايزة تشتغلي برضه مش حيسمح لك الا لو مرتبك مجزي وحياخده منك طبعا ، دايما وابدا حيطلع فيكي عيوب في جسمك في ملامحك وحيكون حريص انك متروحيش كوافير ولا يكون عندك امكانيات تجملي نفسك واو تحسني حالتك الجمالية او الصحية وحيرفض بكل الطرق انك تعملي اي حاجة من الحاجات اللي تحسسك بنفسك وخصوصا لو كنتي واثقة من نفسك عشان مينفعش تفضلي واثقة من نفسك وحيكسرك حيكسرك .