حاولت اقرب له ورفض وانا قررت مش ححاول معاه تاني ،لاني كنت كل مرة انا اللي بصالح
انا عرفت ان هو ناوي يسافر انا خايفة جدا ياخد ولادي لان هو بردو له تجربة زواج سابقة وهي غلت منه وحرمته من البنت ف اكيد مش هيكرر تاني
الخوف والرعب اني لقيته داخل علي جروب زواج لناس من جنسية معينه ف مصر انا هموووووت م الخوف هو بيدور علي عروسة وممكن ياخد الولاد ويمشي م البلد وانا مش هعرف اجيبه انا لو حصلي كدة هموت مش هقدر اصلا استوعب واحارب عشان ارجعهم هما اصلا اللي ماليين عليه حياتي ومخليني مستحملة وانا بقول انا مش هتجوز اكيد واذا هو مستفيد من خدمته ف انا مستفيدة من صرفه عليه فالمنفعة متبادلة وانا مفلسفة مع نفسي الامور بالشكل دة ارجوكم ادوني اي حلول واقتراحات ازاي أمن نفسي وولادي من غير ما يحس
بصي من الآخر كده الحياة مع النرجسي حرب والحرب مافيهاش كسبان 100% و خسران 100% الحرب كلها خساير فاللي إنتي بتعمليه ده من وجهة نظري و الله أعلى و أعلم إنك عايزه تكسبي 100% ، أو خلينا نقول 90% مثلا وده شبه مستحيل في الحرب مع النرجسي خصوصا ، سيبك بأه من الكلام ده و ركزي معايا :لما البني آدم يبقى عنده مشاكل أو مصايب كتيييييييير ومش عارف يحلها و الدنيا مطربقه على دماغه / بيعمل إيه بيشوف أكبر و أخطر مصيبه فيهم و يحلها لوحدها الأول فبينزل من على كتافه حملها و بعدين يشوف غيرها وتاخد زي ماتاخد وقت ، المهم تتحل ، صح ؟؟ تمام يبقى إنتي تشوفي إيه المصيبه الحاليه دلوقتي
أو المصيبه اللي زي ما بتقولي ممكن بعد الشر تموتك وهي مصيبة الأولاد طيب ده نرجسي و مالوش أمان ( آدي طرف) وإنتي كرامتك واجعاكي ( وآدي طرف )
طب معلش دلوقتي ( دلوقتي بس ) ( و في حالتك إنتي و حسب وضعك إنتي ) ، كرامتك و لا عيالك ، فيه ستات كتير قلبهم جامد شويه ( وفي نفس الوقت أبوهم مش منحرف أخلاقيا ) يعني مش حتخاف عالعيال و هما معاه ، فماسكه نفسها و مجمده قلبها ها ، تعرفي تعملي زيها ؟؟؟؟؟ أكيد وحسب كلامك لأ و ألف لأ يبقى نحل المصيبه دي إزاي نلعب عالحبل زي البلياتشو ( معلش ) لحد مانعرف نتمكن من إن الأولاد مش حيبعدوا عننا مش حأقولك إتنازلي عن كرامتك ، لأن ده ضد كل المبادئ لإنما حأقولك فكرة ويا رب تنفع معاكي ، إنسي دلوقتي خالص انه نرجسي
تناسي الموضوع ده خالص ومثلي على نفسك إنك لسه مش فاهماه وعيشي معاه دور الزوجه الهيمانه في حبه ( بس طبعا مش مره واحدة و فجأه كده ) واحده واحده ، و انسي مصايبه و قلة أصله و كل حاجه وحشه ، و خليه يعيش لافبامبينج منك ماشفهوش قبل كده ( بالتدريج ) و اتعاملي طبيعي خالص وتابعيه ، غالبا حتلاقيه بعد شويه عن موضوع الزواج التاني ده و لو إلى حين ، تكوني إنتي ربطيه بيكي وبدلعك ليه ، وإوعي تبينيله إنك بتمثلي عليه ، و عيشي معاه شويه كده و شويه كده ، سخن كتيييير وبارد شويه ، واستحملي لحد ما الأولاد ما يكبروا سنه كمان او سنتين ، تكوني إنتي في الفترة دي ، عملتي إشباع عاطفي للأولاد و تعلقيهم بيكي بكل الطرق بحيث إنهم مايعرفوش يبعدوا عنك ربع ساعه وياريت يكون ده من غير ما يحس ، بعد فترة حتلاقي فيه تغيير أكيد ، من حيث إنك بقيتي مرنه شويه مش بتتأثري بهبل النرجسي ، و عندك قوة شخصية ( في إنك مش مهزوزه ، و بتعرفي تكيفي الوضع على حسب هدفك ( وهو عدم بعدك عن أولادك ) وحبذا لو شفتي التشافي و طبقتيه كويس ساعتها تبقي أستاذه الأساتيذ ، على الله تعرفي تعملي كده

الفكرة ان كل الرجاله ( الطبيعين ) فيهم طبعين متناقضين ، ربنا خلقهم كده ، طبع الوحش ، و طبع الطفل .الرجل الطبيعي بيحب يبقى طفل على حجر أي ست والراجل الطبيعي المحترم بيبقى عايز يبقى طفل على حجر حلاله بس ( زوجه او أكتر ) ، و أنا بأتكلم عن القاعدة السوية مش عن الغير سوي
المهم إن الطبع الوحش بيطلع في أوقات معينة ، منها لما يحس إن بيته أو عرضه أو أهله في خطر أو لما بيحس إن كرامته في خطر ، حتى لو من أقرب الناس ليه ، بس مش بيخش على مرحلة العض علطول ، بيزمجر الأول و بعدين يخوف من بعيد ولو مافيش فايده فبيبدأ يغضب بغباء ( ياروح ما بعدك روح )
كل الرجاله الطبيعيه كده ، الشاذ من القاعده دي ، إن فيه رجاله ( أعرفهم شخصيا ) يعتبروا زي الملايكه ، ودول طبعا نادرين جدا ، مهما حصل معاه طبعه هااااادي مش بيتعصب خالص ، وفيه اللي بيهبش علطول من غير تفاهم المهم خلينا احنا في الطبيعي ، ده بأه عايز واحده تحترمه وفي نفس الوقت تدلعه زي الطفل ، تعيشه الدورين والطبعين يعني طب النرجسي وضعه إيه في الكلام ده
النرجسي حقير مالوش كتالوج ، و التعامل معاه محتاج حد ذكي ، حد راسي ومركز ، حد عارف هو عايز إيه ، وله هدف لازم يحققه ، طب ليه الكلام الكتير اللي فوق ده كله عن الرجل السوي؟
عشان أقولك اتعاملي معاه ( أظهريله كده ) إنك بتتعاملي معاه على إنه طبيعي زي الرجاله اللي اتكلمنا عنهم فوق إوعي تبينيله إنه نرجسي ، ولا غير طبيعي ولا غبي أو ظالم لأ خالص ، زي ماقلتلك في الحلقة اللي فاتت إنتي ليكي هدف ، لازم نحققه بإذن الله يبقى نعمل اللي اتفقنا عليه ونشوف هو حيعمل إيه بس إوعي تديله الأمان ( و إوعي يحس إنك مش مدياله الأمان ) ، زي ماقلتلك حنلعب عالحبال وإوعي تتنازلي ابدا عن حق من حقوقك بس برضه بالطريقه وتاكلي بعقله حلاوه زي مابيقولوا والله الدنيا مشت و اتعدل ، خير فضل على وضعه ، يبقى إحنا ربنا قدرنا و حققنا هدفنا ساعة ما يأذن ربنا بأه بحاجه ، نبقى إحنا فهمنا فين راسنا و فين رجلينا وأكيد شخصيتنا حتبقى أفضل و أرسى من دلوقتي