ماتوصليش النرجسي انه يمد ايده عليكي
الأول الكلام للي مجبرة تعيش ومالهاش أي حل نهائي
قبل أي كلام شوفي فيديو الثلاثين سؤال عشان تعرفي اذا الكلام اللي حقوله بينطبق على زوجك ولا لا

يعني ايه الكلام دة هو فيه حد بيخلي حد يضربه ؟ شوفي لو حنتكلم عن النرجسي بس اللي هو مش سادي ولا سيكوباتي ،حقول لك ايوة انتي تقدري ماتوصليهوش يضربك ، انا حتكلم من اللي بشوفه وبسمعه من الحالات ،لما الحالة تحكي لي انها قالت له حرام عليك انت معندكش رحمة انت مابتخافش ربنا وهي بتزعق ومسمعة الجيران وهي عارفة انه نرجسي طيب معلش انتي في الحالة دي متوقعة منه ايه ،ماهو لازم تتوقعي غضب نرجسي ولما يكون هو أصلا بيمد ايده يبقي الغضب النرجسي دة حيكون عنف جسدي طبعا وحيضربك ، حتقولي لي هي مظلومة ومقهورة مش قادرة تمسك نفسها وتحكم اعصابها ،طيب خلينا نتكلم بالراحة المفروض انها شخص سوي مش نرجسي وبتقول انها مش قادرة تمسك نفسها وتحكم اعصابها ؟ دة معناه حاجة واحدة انها محتاجة تتعافى من صدمة النرجسي ومن معاملته السيئة هي كدة لازم تشتغل على نفسها عشان تهدى وكمان لما تكون عارفة انه نرجسي وبيحاول يستفزها وعارفة انه مش سوي وبعدين تنفعل وتنقهر طيب ازاي ،يعني كدة لازم تشافي ولازم تتعبي على نفسك كتير عشان توصلي انك ماتنفعليش ابدا ابدا معاه ، كمان بعض الحالات تيجي في اثناء الغضب النرجسي وتقف قصاده وترد عليه الكلمة بكلمة وهو بيكون زي الوحش المسعور طيب متوقعة ايه منه ماهو حيمد ايده ، انتي بتتعاملي مع حد بلارحمة ولا مشاعر فلازم تحمي نفسك منه ماينفعش تقفي قصاده في نوبة غضب نرجسي وتعرضي نفسك للضرب والخطر احنا بنقول في الغضب النرجسي تبعدي عن المكان أصلا ولو حتخافي تتحركي لانه حييجي وراكي يبقى تقعدي ساكتة تماما ماترديش لحد مايخلص ،وبعدين انتي كل مارديتي كل ما اديتيه وقود والاسوأ من الوقود انك بتديه فرصة وتبرير لانه يمد ايده
كمان بعض الحالات بتكون عارفة ايه اللي بيستفزه وتعمله لانها عايزة تغيظه عشان عايزة تاخد حقها لانه ظالمها وفي الاخر هي بتضيع حقها كله القديم والجديد لانه بيضربها وبعدين يقول لاهلها وأهله هي استفزتني ويحكي الموقف والكل يغلطها لانها فعلا بتكون استفزته ،طيب انتي ليه تضيعي حقك وتعرضي نفسك للضرب ،خدي بالك تاني انا مش بتكلم عن النرجسي السادي ولا السيكوباتي اللي هم بيضربوا بدون أي سبب وبدون سابق انذار لان دول أصلا حلهم محضر في ساعتها وزي ماتيجي ، لكن انا بتكلم عن النرجسي اللي نرجسي بس ،وانا بتكلم بناء ع اللي بشوفه مع الحالات ،
طيب بعض الحالات بيحصل انه بيمد ايده من غير سبب بس بيكون نغزة او زقة او زغدة زي مابيقولوا من باب النكش عشان انتي يطلع منك رد فعل فيقوم يضربك بقى بجد ، انتي مفروض ماتديهوش رد الفعل اللي هو عايزه انتي اكيد فهمتيه وعرفتي لما بيقول ياشر اشتر وبتبقي عارفة انه ناوي ضرب ومع ذلك بتنزلقي وبتديه اللي هو عايزه ،المفروض لما ينغزك كدة ماتديش أي رد فعل نهائيا فوتي عليه فرصة انه يضرب ،
شوفي انتي عايشة ومستحملة العيشة دي والضرب والغلب دا كله ليه ؟ عشان اولادك ومصاريفهم ويعيشوا في اسرة ، طيب انتي بقى لما بتنضربي ادامهم انتي فاهمة دة بيعمل فيهم ايه بيطلعهم شكلهم ايه ونفسياتهم ايه ،انتي بتستحملي عشان تحميهم وانتيب تؤذيهم مش بتحميهم ابدا عشان كدة لازم تمسكي اعصابك وتبعدي عنه وتتجنبي النقاش الحاد وتبطلي تردي عليه وتتجاهليه عشان مانوصلش للضرب وكمان عشان تحمي نفسك من الأذى اللي بيحصل لك
اشتغلي التشافي ودوري شغل ع النت وبطلي كسل واستسلام وفوقي لنفسك شوفي فيديوهات الثقة واشتغلي عشان تبقي قوية وقربي من ربنا عشان هو اللي حيقويكي ويعينك ،والله لما تتعافي وتبقي قوية ماحيتجرأ يهوب ناحيتك ،بس انتي بطلي خوف وابدأي تصالحي نفسك وتقربي منها ، وخدي بالك بطلي خوف مش يعني ردي عليه واشتميه لا يعني كوني حاسمة وخدي قراراتك لوحدك من غير ماتستنيه يديكي الاذن