أعيش مع النرجسي الزاني ولا ابويا اللي بيتحرش بيا وبأولادي؟
بصراحة انا مكسوفة من العنوان وحزينة ع اللي وصلت له امة محمد ، احنا فعلا فعلا في اخر الزمان ، لله الامر من قبل ومن بعد.
عايزة أقول ان طبعا الاتنين مضطربين الزوج والأب وهي بين فكي الرحى ، اللي زي دي مين يقدر يحل لها مشكلتها ؟ لما المجتمع ربنا عاميه عشان هو مش عايز يشوف والناس حاطة راسها في الرمل على أساس لا تشوف ولا تتشاف ،
المهم يابنتي محدش حيحل مشكلتك غيرك ، وماحدش حيعينك ويساعدك غير ربنا ، انتي لاتعيشي مع الزوج الزاني اللي ممكن ينقل لك امراض قاتلة ولا مع الاب المختل اللي بيتحرش بيكي وبزوجة اخوكي وبصراحة الاب دة مفروض تبلغوا عنه ويتاخد يتحجز في مستشفى مجناين او في سجن ،ودة اقل مايستحق ولو سبتوه يؤذي الخلق كدة حتتحاسبوا عليه وماتخافوش من فضايح الدنيا خافوا من فضايح الآخرة أولى ، المهم انتي دلوقتي اذا حتقدري تعيشي مع النرجسي في بيتك بدون إقامة علاقة حميمة نهائيا معاه يبقى تمام دة لو انتي يعني معندكيش مجال تتطلقي ، لكن اذا مش حتقدري يبقى لازم تطلقي وتبعدي والمفروض ان الشقة من حقك ،طيب لو هو خرجك من الشقة او الشقة في بيت عيلة ومش حتعرفي تعيشي فيها يبقى تعيشي عن ابوكي وتكوني حاسمة وصارمة معاه وتهدديه انك حتفضحيه وتفهمي اولادك انه مريض ومش طبيعي وتفهميهم لايسمحوا له بأي تصرف مخل ولا يقربوا منه ولا يحضنوه ،لكن الكلام دة لازم تفهمي انه وضع مؤقت شهور معدودة بس لحد ماتشتغلي وتقفي على رجلك وتقدري تؤجري مكان على ادك انتي اولادك ، المهم في كل الكلام دة انك تشتغلي على نفسك وتقوي نفسك عشان تقدري تواجهي العالم ، قربي من ربنا والتزمي أوامره واجتنبي نواهيه وبعدين اطلبي منه وشوفي حيساعدك ازاي ،الجأي له واطلبي منه المعونة وهو مش بيخذل العاصي اللي بيقول يارب وبيديه فما بالك الطايع ،
شوفي فيديوهات التشافي والثقة بالنفس واشتغلي على نفسك وابدأي تشوفي شغل باي طريقة عشان تحمي نفسك واولادك انتي قوية وتقدري اوعي تفكري انك ضعيفة وانك مش حتقدري وان لازم يكون في ضهرك راجل يحميكي والهبل دا اوعي تفكري كدة انتي اكتر واحدة شايفة ان اللي بيحمي مش الراجل ادي الاتنين اللي اسمهم رجالة اللي في حياتك الاتنين بيعتدوا مش بيحموا ، محدش بيحمي حد في الزمن دة كل واحد النهاردة عنده القدرة انه يعمل كل حاجة موضوع الراجل والعضلات دة خلاص زمنه ولى وراح ومبقاش حد دلوقتي محتاج عضلات غير للاستعراض والضحك على عقول البنات ، دلوقتي زمن العقل والذكاء مش العضلات ،وانتي اذكى وادهى من أي رجل فدة زمنك ، دافعي عن نفسك بذكائك واحمي اولادك بذكائك ، واستعيني بالله هو بس اللي بيحمي وبيسند ويطبطب ، خدي بالك انتي مسئولة عن نفسك ادام ربنا وانتي مسئولة تحافظي على حقوقك وجسمك وصحتك ماتهدريش نعم ربنا وتفكري انك مش حتتسئلي عنها ، قومي وانفضي نفسك واخرجي من المستنقع اللي انتي عايشة فيه واشتغلي وموتي نفسك في الشغل ونامي ست ساعات كفاية وقومي الفجر اقرأي وابحثي ودوري وحتلاقي الف شغلانة وشغلانة وربنا حيفتح لك السكك والدنيا بس انتي اتحركي ،انتي ابدأي انتي وري نفسك لربنا انك عايزة تحسني وتغيري حالك ، اللي في الوضع دة تقدر تغير بس تبطل كسل وتخرج برة منطقة الراحة ولازم تبطل تخاف ،الخوف هو عدوك الأوحد والاكبر ،لو الخوف دة يتحول لخوف من ربنا وبس حتكوني اقوى حد في العالم ، الخوف من ربنا بيديكي شجاعة وقوة وثقة بالنفس سبحان الله ،الخوف من ربنا بيديكي اطمئنان وسكينة وراحة ، الخوف من ربنا بيخلي الناس تخاف منك وتهابك وتعمل الف حساب ومنهم النرجسي سواء اب او زوج ، الخوف من ربنا هو الخلاص من كل شرور الدنيا والاخرة
الخوف من ربنا خوف صحي خوف محبة مش خوف رعب خوف لايزعل منك وخوف لاتتحرمي رؤيته في الاخرة وخوف لامايكلمكيش في الاخرة وخوف لايعاتبك في الاخرة وخوف يزعل منك ويحرمك حبه في الدنيا ، الخوف دة اجمل خوف ممكن تحسيه ،الخوف اللي يعيشك في الجنة وانتي في الدنيا ، صدقيني جربي تقربي من ربنا وتتقوي بيه حتشوفي العجب حتشوفي المعجزات والله بعنيكي ، جربي وتعالي احكي لنا بس انتي ابدأي وقربي من ربنا وقربي من نفسك