ازاي تتجاوزي صدمة انه طلع نرجسي وتعدي من عنق الزجاجة ؟
حقول لك
١- اسمحي لنفسك تتجنني شوية ،أيه ؟ايه ياست انتي الكلام دة احنا ناقصين ؟ حقول لك بس اصبري ، انتي أصلا اول مابتكتشفي بتلاقي نفسك تضحكي وعندك فرحة عظيمة واحساس غريب انك منتصرة وفرحانة انك فهمتيه وان الذل اللي كان عامله فيكي اتفهم وبقيتي عارفة ان العيب فيه وانه مش ملاك وانه معتدي وان لكي عنده حق وكل دة بيخليكي تحسي بالفرحة وفي نفس الوقت بتحسي بالغضب الشديد والحزن والمرارة انك اتعمل فيكي كدة وبيحصل نوبات بكاء هستيرية بيتخللها ضحك زي المجانين بالظبط ، فانتي اسمحي لنفسك بانها تخرج كل المشاعر المتناقضة دي وماتكبتيهاش ابدا ابدا وخليكي حريصة ان النرجسي مايلاحظهاش ولو لاحظها قولي أي حاجة عندي اكتئاب ،الهرمونات متلخبطة حاجة بتوجعني اتخانقت مع أي حد المهم مايحسش انك فهمتيه .
٢- دوري على حد قريب بتثقي فيه ومتأكدة انه مش نرجسي وانه بيخاف ربنا وامين على اسرارك واحكي له كل الحكاية من أولها لاخرها كل يوم تحكي شوية ،ولو مش لاقية حد امسكي ورقة وقلم واكتبي كل اللي حصل برضه كل يوم تكتبي شوية ، وانتيب تكتبي اللي حصل والاحداث والمواقف اكتبي ساعة الموقف حسيتي بإيه وفهمتي الموقف او التصرف ازاي ودلوقتي فاهماه ازاي واحساسك بقى ازاي ولازم تحللي الموقف وتفهمي نفسك هو عمل كدة وكان قاصد ايه وتفهمي نفسك انك كنتي فاهمة غلط وان اللي قاله دة مش موجود فيكي
٣- سواء لقيتي حد تحكي له او ملقتيش فانتي في كل الأحوال محتاجة لسند يقف في ظهرك ويساعدك وياخد باله منك ويطبطب عليكي ويجيب لك حقك وسنين عمرك ، والسند دة موجود بس انتي كنتي ناسياه ،النرجسي خد قلبك منه وشاركه فيكي وهو مبيحبش كدة عشان كدة لازم ترجعي له بقلبك كله وتستسمحيه على تقصيرك معاه وترجعي بقى لعلاقتك القديمة بيه لو كانت اتقطعت او لو كانت بقت فاترة بلا قلب وأصبحت طاعة بالبدن فقط والقلب خرج منها ، ارجعي بقى رجعي قلبك لصاحبه الحقيقي واطلبي منه المعونة والصبر والطبطبة عليكي وهو مش حيخذلك ،مش عشان انتي بعدتي شوية هو مش حيقبلك تاني حاشاه هو أصلا مستنيكي ترجعي له وبيفرح برجوعك اكتر مانتي تفرحي برجوع رضيعك لو تاه منك ، ارجعي له واسجدي وابكي كتير كتير كتير في الفترة دي لان دة هو اللي حيخرجك من الصدمة بسلام وبدون خسائر .
٤- مش محتاجة أقول لك ابدأي في التشافي عشان تتخلصي من الإدمان وخدي بالك انك مشاعرك في الفترة دي ناحية النرجسي حتكون غضب وكره ملوش حدود فانتي ماتتغريش وتقولي خلاص كدة انا مبقتش مدمناه لا انتي لسة مدمناه طبعا زي ماقلنا طول مافيه مشاعر تجاهه سواء سلبية او إيجابية طول مانتي مدمناه ومش حيتفك الإدمان في يوم وليلة لان دي كيميا الجسم مش بتتغير بالسرعة دي طبعا محتاجة شوية وقت ، فانتي ابدأي بالتشافي فورا اول حاجة مفروض تعمليها لما تعرفي انه نرجسي انك تسمعي فيديوهات التشافي وبعد ماتخلصيها وتحسي ان اللي فيها اصبح بالنسبة لك أسلوب حياة ابدأي شوفي المتعاطفة اذا كنتي متعاطفة ومعاها الثقة بالنفس
٥- لما بتعرفي انه نرجسي بتلاقي نفسك عندك شغف رهيب بالمعرفة عنه اكتر وبتلاقي نفسك تنغمسي في الفيديوهات اكتر وتسمعي كل حاجة عن النرجسي والاعيبه عشان انتي محتاجة تتأكدي اكتر لان في الفترة دي هو بيحس ان فيكي حاجة غلط وبيحاول يفهم فمرة يعمل لك هوفرينج ومرة يعمل لك غضب نرجسي ومرة ينكش فانتي بتتلخبطي فتتعمقي اكتر وتحاولي تعرفي اكتر وبيكون عندك نهم للمعرفة دي ودي حاجة كويسة ولازم تطاوعي نفسك وتعرفي كل حاجة بس لازم يكون لكي ذكر بتقوليه طول الوقت مع المعرفة دي عشان الذكر يسندك ويقويكي لانك أحيانا تسمعي كلام صعب وتتوالى الصدمات عليكي فلو انتي مش قريبة من ربنا اوي حتتعبي جدا في الفترة دي وخصوصا لو انتي عايشة معاه ومحبوسة ومفيش حد حنين جنبك فلازم يكون لسانك رطب بذكر الله ، قولي اللي ربنا يلهمك بيه قوليه وكرريه طول الوقت
٦- خدي بالك من نفسك النفس أحيانا بتتلائم على صاحبها عشان مش بتحب تخرج من منطقة الراحة ومش عايزة تتعب وتشتغل وتغير فتعمل فيكي حيلة دفاعية شبه حيل النرجسي ،ايه هي ؟ تحطك في دور الضحية وتثبتك عليه وماتعرفيش تخرجي منه وتبقي طول الوقت تعيطي وتحكي وتعيطي وتحكي لحد ما الناس تزهق منك وتبعد عنك من كتر مانتي بتحكي وتشكي ومش بتسمعي لنصيحة حد وواقفة محلك سر فاكيد الناس حييجي وقت وتبعد محدش عنده استعداد يفضل يستقبل منك طاقة سلبية طول الوقت وياريتك مستفيدة الا انك بتؤذي اللي حواليكي ع الفاضي فبيضطروا يبعدوا عنك وانتي تتعمقي اكتر في دور الضحية وتقولي كل الناس طلعوا نرجسيين ، وانتي غرقانة في الحالة دي مش بتعرفي تخرجي وللأسف فيه ناس بتفضل سنين طويلة في الوضع دة ، عشان كدة بقول لك خدي بالك من نفسك لازم تكوني منتبهة ومصحصحة وتراقبي تفكيرك وافكارك وماتسمحيش لنفسك انها تقعدك جوة منطقة الراحة عشان هي كسلانة ومش عايزة تبذل مجهودولا تبذل طاقة ،ماتكونيش الوجه الاخر لعملة النرجسي ،سوقي نفسك وماتخليهاش تسوقك ، خالفيها واعملي عكس ماهي عايزة دة لو لقيتي نفسك وقفتي مكانك واتجمدتي ومااخدتيش أي خطوة للتشافي لمدة ست شهور اعرفي ان نفسك ركبتك وعرفت تمشيكي واعرفي انك لازم تمشيها وتعدليها وتسيطري عليها وتخرجي برة الكسل والراحة وتشتغلي بجد وتطوريها وتحسنيها وفي نفس الوقت تصالحيها وتسامحيها زي ماتربي طفلك بالظبط
٧- اخر نقطة اشغلي مخك بحاجة مفيدة لكي وللي حواليكي ،شغل او عمل خيري او تحفيظ قرآن او دروس خاصة في أي مادة او مذاكرة لاولاد الجيران اللي معندهمش يودوا دروس او تساعدي حد من الضحايا اعملي لنفسك أي هدف ولو بسيط وصغير تشغلي بيه دماغك عشان تنشغلي شوية عن النرجسي واللي كان واللي جرا لحد ماتخلصي من ادمانه