ايه احساس النرجسي لما بيشوفك استغنيتي عنه ونجحتي في حياتك؟
شوفي لو انتي عارفة النرجسي بيتلاعب بيكي ليه كل دة وقاعد طول عمره يقرف فيكي ليه حتفهمي حيجرا له ايه لو حس انك استغنيتي عنه
هو أصلا بيتلاعب في الأول عشان يصطادك ويمتلكك ، وبعدين بيتلاعب بعد مايمتلكك عشان تفضلي ملكه وتحت سيطرته وماتخرجيش عن السيطرة دي دي لانه خايف لو خرجتي عن سيطرته تسيبيه او تبقي اقوى منه وتسيطري انتي عليه ، هو خايف يحصل له معاكي اللي حصل له في طفولته مع اهله سواء الرفض او عدم القبول او الاهمال وانه مش مسموع كل دة مش عايزه يتكرر منك، فبيحطك تحت السيطرة عشان ماتكرريش له كل اللي عملته فيه امه او اللي عمله فيه ابوه ،
طيب دا تصوره المريض ،انه لو اتعامل معاكي كويس حتتفرعني عليه واذا ساب لك مجال تتنفسي حتبقي اقوي منه وحتحاولي تسيطري عليه زي ما عملوا اهله فيه او زي ما امه كانت عاملة في ابوه ، طيب كل دة احنا فهمناه طيب بقى لو انتي قدرتي تكسري جدران السجن النفسي اللي حطك فيه النرجسي وبدأتي تشعري بقيمة نفسك كإنسان وبدأتي تتعافي وهو طبعا حاربك بكل الطرق عشان يرجعك تاني تحت السيطرة ومانجحش فبعد عنك وراح دور على مصدر جديد وتمام ، هو بقى كدة خلاص استسلم؟ لا طبعا هو بيفضل يراقبك حتى بعد الطلاق هو مش بينسى انك ملك من ممتلكاته فلما بيراقبك ويشوف انك عايشة حياتك وبتتألقي وبتنجحي بيحس بإيه؟
عارفة لما انتي تبيعي عربيتك بعد ماتعمل حادثة وتبقى الحادثة أصلا كلها في الصاج يعني العربية من جوة أجهزتها سليمة بس من برة شوية تطبيق وانتي تبيعيها وتقولي اسهل لي اجيب واحدة جديدة بدل ما اقعد اصلح ، وبعدين بعد ماتبيعيها تلاقي اللي اشتراها صلحها وركبها وتبان لك كأنها زيرو . بما انك متعاطفة وطيبة فانتي مش حتحقدي عليه لكن حتبصي للعربية وتقولي الله بقت حلوة ، ياريتيني صبرت وصلحتها لان فيها ذكرياتك وماضيكي وحياة انتي عيشتيها مع عربيتك فترة ومريتي بتجارب كتير وتلاقيكي كنتي بتكلميها وانتي راكباها وتشتكي لها حالك لما ماتلاقيش حد تحكي له ، بيصعب عليكي ذكرياتك معاها وحاجات كتير بس دة لانك متعاطفة ، بس قيسي بقى الشعور دة ع النرجسي لو لقاكي بقيتي بتلمعي وع الزيرو تاني . بيحصله صدمة في الأول وبعدين يحس بالغيظ والغضب الشديد جدا وبعدين يحس بالقهر والفشل والخسارة وبعدين يبدأ يفكر نفسه ان انتي لسة ملكه حتى لو اتطلقتي منه ، حيقنع نفسه انك لسة ملكه وحتفضلي ملكه وبالتالي يبدأ يعمل لك هوفرينج قوي جدا عشان يسترجعك لانه أولى بممتلكاته وكل ماتمسكتي بالبعد ومارجعتيش كل مازادت قهرته ، وكل ماحس انك مستغنية عنه وبتنجحي كل مازاد احساسه الفشل وبالتالي بالعار ، عشان كدة دايما أقول لكم فعلا اللي عايزة تنتقم من النرجسي تنجح تنجح سواء وهي معاه او وهي بعيد مجرد نجاحك بيحسسه انه مش عارف يسيطر عليكي وطول ماهو حاسس انه مش مسيطر طول ماهو حاسس بالفشل والفشل بيحسسه بالعار وبالخسارة وطول مانتي رافضة ترجعي طول ماهو حاسس بالخسارة . كمان طول مانتي متمسكة بالمكتسبات اللي وصلتي لها طول ما هو يزيد شعوره بالفشل المهم انك ماتخافيش وماتتهزيش ولاتتراجعي ،خليكي قوية وذكية في نفس الوقت اذا قررتي طلاق يبقى اقفلي السكك ومافيش داعي تحاولي تلاعبيه طالما خرجتي من العلاقة واذا كنتي متعايشة احرسي حدودك معاه وقويها واوعي تدخلي الشبكة تاني ولودخلتي الحقي نفسك بسرعة وماتناميش ومتصدقيش الهوفرينج اللي بيلخبطك