اذا عرفتي ان النرجسي اتجوز عليكي في السر هل من مصلحتك انك تواجهيه؟ واذا هو قال لك بنفسه تعملي ايه؟

طيب اذا عرفتي انه اتجوز وهو مخبي عليكي وفي الحالة دي بيكون كانن وواخد سكة السلامة ومش بيعمل مشاكل وبيحاول يمشي دنيته ، ممكن في بداية جوازه التاني يعمل هوفرينج بعد مايستقر الجواز الجديد ، في الحالة دي الزوجة الأولى بتيجي تقول اواجهه اني عرفت انه اتجوز ولا لا،
هو أصلا مجرد انك بتسألي فدة معناه انك قادرة ماتواجهيهوش وانك قادرة تمسكي نفسك ومانهارتيش ودة معناه انك عندك ادراك كويس لوضعه وانك كمان تعافيتي من ادمانه بنسبة كبيرة جدا ، ودة حاجة عظيمة ، تعالي كدة نشوف لو واجهتيه حتستفيدي ايه وايه اللي حيحصل ولو مواجهتيهوش ايه اللي حيحصل
لو واجهتيه وماطلبتيش الطلاق فانتي بتقولي له دة حقك وانا قليلة عليك وانا مقصرة وانت تستحق من كتر مانت عامل معانا اللي عليك وزيادة فانت تستحق انك تتجوز عليا عادي ( خدي بالك انا بتكلم هنا عن الزوج النرجسي اللي مقصر معاكي في المصاريف وبيظلمك ومش بيديكي حقوقك وبيقصر أصلا في العلاقة الحميمة معاكي عشان محدش يرد يقول من حق الراجل يتجوز اربعه وطالما من حقه يبقى يستحق ، انا مش بتكلم من حقه يتجوز أربعة ولا لا انا بتكلم من حق فلان اللي مش مكفي بيته انه يتجوز تاني وحيكفي بيتين ازاي وخصوصا اللي بتبقى الأولى بتصرف عليه أصلا وحاجات كتير احنا بنخص بكلامنا الناس المضطربين مش الأزواج الاسوياء) المهم كمان لو واجهتيه وانتي مش حينفع تقولي له طلقها لان حرام ماينفعش نقول كدة فانتي مفيش عندك حلول ولا حتعرفي تاخدي موقف منه فانتي كدة كشفتي ضعفك كشف تام وفتحتي حدودك لاخرها وكأنك بتقولي له ادخل واهرس واعمل اللي انت عايزه فيا اذا اتجوزت علي بدون حتى ماتخيرني وانا مجبرة اكمل معاك يبقى خلاص اعمل بقى مابدالك وانتي عارفة الباقي ، دا غير انه حيتبجح عليكي بعد ماكان مخبي وخايف تعرفي وبيكلمها في السر خلاص كل دة حيتقلب كله حيبقى على عينك ياتاجر وانتي عرفتي ورضيتي ودا حقها
طيب اذا تجاهلتي ومواجهتيش انتي بتحطيه في خانة الخوف والتوتر واللي عامل عملة وخايف يتقفش وبيحاول يداري فبيحاول يكون كويس شوية وهادي شوية عشان يداري اللي عامله وبيفضل قلقان وخايف تعرفي فلو واجهتيه ريحيتيه من القلق والخوف منك وفتحتي له السكة بقى يعيش براحته ويكلمها ادامك وهكذا دا غير انك حتخسري فترة الهدوء والمعاملة المتحسنة شوية حتى كهدنة من مشاكله
طيب واذا هو بجحوعايز وقود وعايز يقضي عليكي ويكسرك وممكن أصلا اتجوز انتقام منك ،وجه يقول لك انه اتجوز المفروض تتصرفي ازاي ؟
زي ماقلت لك طالما انتيب تسألي اتصرف ازاي يعني انتي مش مدمناه لانك لو مدمناه مش حتفكري أصلا تتصرفي ازاي انتي حتنهاري وتصوتي وتلمي هدومك وتمشي وحيكون لكي ردود أفعال غير محسوبة ودة طبيعي ، اما اذا انتي تمام مش مدمناه ، فالمفروض يكون رد فعلك قاتل له اقل واجب يعني تاخدي بيه حقك ، اللي هو ايه ، ابتسامة باردة بدون حزن ولا أي انفعال ، مبروك حيقول لك فورا انتي كنتي عارفة ، حتقولي له مكنتش زماني واقفة ادامك دلوقتي لو كنت عارفة ، كل الحكاية اني مبقتش اامن لك ومتوقعة منك أي حاجة ،، طبعا كل دة وهو في صدمة انك مش هامك جوازه هو حيكون بيتحرق من جواه بس ممكن مايبينش لكي لانك هدمتي كبرياؤه وعظمته واهميته وكمان فشلتي خطته في شوية وقود وانه يحس انه انتقم منك وانتصر ، المهم انك لازم تكوني جاهزة بشروطك(في دماغك ومش حتقوليها في نفس اللحظة حتقوليها لما يحاول يصالحك) اللي انتي عايزاها وطبعا حتقولي له كل واحد يروح لحاله بالمعروف وبهدوء جدا وطبعا دة من باب العقاب مش الجد طالما انتي مش عايزة طلاق ،لكن لازم يحس انك مش راضية عن الوضع عشان لما يحايلك تعرفي تملي شروطك ، او انك تقولي له طيب مبروك عليك بس لو سمحت انا متنازلة عن ايامي لها وياريت كل واحد يعيش حياته بدون أي تدخل من التاني فيها والموضوع حيكون جواز ادام الناس حفاظا على الشكل ادام الناس (هنا بتكلميه بلغته) وربنا يوفقك ، انا عارفة ان كل اللي حتقوليه في الموقف دة ولا حيفرق ولا حيأثر معاه في أي حاجة لانه حيكون في حالة صدمة من رد فعلك ودة حيخليه يعيد حساباه معاكي كلها ،طبعا مش لازم رد فعلك زي ماقلت حرفيا انا بديكي مثال وكل واحدة تتصرف على حسب نوعيه زوجها .
خدي بالك اوعي تقولي له ماتعَرفش حد ولا تطلبي في اللحظة طلب مهم ولا تملي أي شروط دلوقتي لان أي حاجة حتقوليها في اللحظة دي حيعمل عكسها ولو أدت الى اذيته لنفسه لانه دلوقتي انتي عملتي له جرح نرجسي مهول لانك رد فعلك غير ماكان عايز .