كل ما احس اني مسيطرة على حياتي اخد من النرجسي الم سخن وارجع ألوم نفسي لاني انتكست وآمنت له
حالة بتقول انها تعافت تماما وهي فعلا انا بشوفها تعافت ٩٥٪ فعلا المهم بتقول انها بتحس انها مسيطرة تماما على الحياة وماسكة زمام الأمور في ايدها وهو كبر و ضعف الى حد ما وبيدعي القرب من ربنا او بيقرب الله اعلم ، المهم انها بتقول انه كل فترة يديها الم سخن يفوقها ويحسسها انها ولا مسيطرة ولا لها أي قيمة أصلا وطبعا دة بيخليها تلوم نفسها وترجع لمنطقة الإحساس بالذنب وتبدأ تراجع نفسها وتقول انا غلطانه اني آمنت وهديت وبطلت اتلاعب بيه ،
للأسف الشديد جدا انتي لو بتروضي النرجسي بتكوني كأنك عايشة في قفص الأسود الجعانة لو غمضتي عينك حتتاكلي ،للأسف للأسف عشان كدة دايما أقول اللي تقدر تهرب يكون افضل لكن انا عارفة ان دة مش سهل وحاجات كتير بتحكمه ،المهم اللي بيحصل انك بتلاقي الدنيا استقرت شهرين تلاتة هو ماشي بالقلم والمسطرة ومحترم وكيوت وانتي من وقت للتاني بتدي فتات خبز وممشية الدنيا فلما الدنيا بتمشي معاكي تمام انتي بتهدي واعصابك بتسترخي وبتحسي بالاستقرار والهدوء اللي بيخليكي مش تآمني للنرجسي لا بيخليكي توقفي تلاعب وبترجعي لطبعك كمتعاطفة حتى لو هو بالنسبة لك قط بتربيه او جار بتراعيه فانتي بتلاقي نفسك واخدة بالك من صحته مثلا او بتراعيه سنة زيادة نتيجة انك نفسيتك هديت شوية بسبب الهدوء اللي حصل في الحياة ، لكن زي ماقلت لك دة بيكون بمثابة غمضة عين في قفص الأسود هو بيلقط الغمضة دي وبياكل دراعك فورا ، يعمل خناقة بدون سبب او غضب نرجسي او يشاكل حد من اولادك ولازم لازم يعتدي عليكي قولا او فعلا باي شكل على حسب نوعه وطبعه ، المهم انه لازم يسبب لك كسر نفسي بأي شكل ، ليه دة بيحصل ؟ لانه لما بيحس انك بدأتي تهتمي بيه من أي جانب من جوانب حياته ، خياله المريض بيصور له انك بدأتي تحبيه تاني وان الهوفرينج اللي تعب فيه جاب نتيجة وبيتخيل انه حيقدر يكسرك تاني ويستعمل معاكي الطرق القديمة اللي هو مش قادر يستخدمها خوفا منك فبيعمل له أي حركة من دول عشان يختبرك ويختبر حدودك الجديدة وصبرك وكل حاجة ، انتي بقى أصلا معندكيش له أي رصيد عشان تصبري عليه وانتي كمان حدودك بقت صلدة وحادة ولسة مبقتش صحية مرنة انتي لسة يادوب بتكملي تقويتها ولسة محتاجة وقت عشان تكون حدودك صحية وسطية مرنة ، فبيكون رد فعلك عنيف بس مش عليه على نفسك للأسف وتبدأي تلومي نفسك انك آمنتي وان انتي مغفلة وهو بيخدعك ويضحك عليكي وكل دة عادي جدا بس مش مفروض ياخد منك وقت طويل لان هنا مدخل فظيع للشيطان وللانتكاس والضعف ، لازم توقفي التفكير بالطريقة دي فورا وتردي على نفسك ان انتي بشر وان اللي حصل دة طبيعي ولازم يحصل وحيفضل يحصل للأسف طول ما انتي عايشة مع النرجسي لكن عدد المرات حتقل والمدة بين كل مرة والتانية حتطول يعني بدل مابقت كل اربع شهور المرة الجاية حتكون بعد ست شهور ، ودة منطقي وطبيعي ولازم تحطي في اعتبارك ان الاسوياء في العلاقات السوية لازم بيحصل بينهم مشاكل كل فترة فكونك مع النرجسي ويحصل على فترات متباعدة فدة انجاز ولكن الفكرة المهمة انك ماتدخليش في منطقة لوم نفسك لانك بتظلمي نفسك بلومها على فطرتها ،
كمان الموقف اللي بيحصل منه اللي ضايقك لازم يكون لك وقفة حكيمة مفهاش خناق ولا زعيق ولا انهيار ، تدي يومين ثلاثة صمت عقابي مع تجاهل بدون منع الخدمة طبعا يعني لاووقود ولا علاقة وغالبا هو حيحاول يعتذر او يصالح اذا كان خفي واذا كان له مصلحة ومعندوش مصدر وقود غيرك وفي الحالة دي بتتناقشي بمنتهى القوة والثبات وتبيني الغلط اللي عمله وانك كنتي تتمني انه يكون وصل لمستوى احسن من كدة وان انتي كنتي شايفة تقدم كبير في سلوكه وفي علاقتكم وان اللي حصل دة ممكن يؤثر عليكم بالسلب وانه مش مقبول ، حيحاول طبعا يلبسك الغلط في الحالة دي تنسحبي من المناقشة وتقولي انا بتكلم معاك على أساس انك تعرف اني مش قابلة دة وطالما انت شايف انك مش غلطان يبقى ملوش لازمة الكلام أصلا ، وماتنسيش جملة (انت عملت الحاجة الفلانية ، انت قصدت اني اتضايق او انت كنت عايز تضايقني ؟ ) بمنتهى الحسم والقوة ، وطبعا حيقول لك لا في الحالة دي يكفيكي كلمة لا ، حتى لو اه في الحالتين انتي حتقفلي النقاش على كدة بس هو حيكون فهم ان انتي فعلا اتغيرتي ومش حتتراجعي ولا حتضعفي ولا حيقدر يخترق حدودك تاني