سؤال الفرق بين الصمت العقابي الطويل وبين التخلي
اذا الزوج النرجسي بطل يستمد الوقود والخدمه والعلاقة من الزوجه وعمل القاء لشهور ونو كونتاكت هل ممكن يرجع از يعمل هوفرينغ ؟؟ ام غادر للابد ؟
مش عارفه الخطوه القادمه عشان اجهز نفسي واطفالي
امتى النرجسي يبطل يستمد الوقود والخدمة والعلاقة الحميمة من الضحية وهل دة صمت عقابي ولا تخلي؟

دلوقتي عايزين نعرف نفرق بين الصمت العقابي وبين التخلي عشان نفهم ايه اللي بيحصل وخليكي معايا لاخر الحلقة حقولك ازاي تعرفي انتي في صمت ولا تخلي بس اصبري معايا عشان تفهمي صح
الأول لازم نفهم ان الصمت العقابي نوعين
١- صمت قصير الأمد يعني مدته من ساعة ليوم وليلة ودة بيكون في حالة النرجسي الخفي الخفيف وبيكون عايز يعاقبك على حاجة انتي عملتيها جرحته او انه حاصل له جرح نرجسي برة من أي حد وعايز وقود غزير يعوض ويداوي الجرح دة فبيجي يتلكك لك على أي حاجة ويعمل لك الصمت دة واللي هو بيكون شبه الخصام لكن بالنسبة للنرجسي بيكون التهام قدر هائل من الوقود نتيجة تفاجئك بتصرفه واحباطك وغضبك وغيظك أحيانا واللي بيعمله النرجسي في الحالة دي انه بييكون متواجد معاكي في نفس المكان قاعد ادام التلفزيون لكن متجاهل وجودك تماما ومش بيبص لك حتى وعايش حياته وبيتعامل مع الكل الا انتي ، وممكن ينام في الليلة دي برة غرفتكم كنوع من الترهيب لكن بيرجع تاني يوم وغالبا دة بيحصل في بداية الزواج من النرجسي الظاهر المستوى اول ، اما الخفي فممكن يكون بالنسبة له أسلوب حياة والضحية تقول هو مش بيعمل صمت عقابي دة خصام يوم او اتنين او تلاتة بس وهي مش عارفة ان دة نوع من أنواع الصمت العقابي والصمت دة بيسموه صمت عقابي مع التواجد ودة بيكون الوقود فيه غزير جدا لانك ادامه لكن بيبذل فيه مجهود في اختلاق المشكلة وفي انه بيكون معاكي ويغيظك ويكلم غيرك عشان يفهمك انه بيتجاهلك فبالنسبه له دة بيكون فيه اهدار لطاقته الشحيحة
٢- النوع التاني بيكون صمت عقابي مع الغياب ودة اللي مشهور ومعظم الضحايا عارفاه ومش بيلخبط لان مدته بتكون طويلة وبيكون النرجسي غايب تماما عن الضحية ومش متواجد معاها أصلا ، هو ممكن يسيب البيت ودة اللي بيحصل لو هو عنده القدرة انه يعمل كدة يعني لو عنده مكان يروح فيه ، اما لو معندوش مكان فبيعمله في نفس البيت لكن بيحتل غرفة الأولاد وبياخد هدومه وينقلها برة غرفتكم وبيعيش مع نفسه لا بيفتح باب الغرفة ولا بيوريكي نفسه أصلا ولو لقاكي معدية يجري يقفل عليه كأنك حتموتيه لوشافك (وهو طبعا بيخبي عنك طلعته البهية أصلا ) وغالبا بيقضي يومه كله برة البيت وبييجي. ع النوم ، ودة بيكون مدته طويلة بتوصل لشهور واحيانا سنة وانا كنت بقول ان دة مش صمت عقابي دا تخلي ،لكن انا كنت غلط لاني عرفت معلومة جديدة كالعادة وحبيت اصلح لكم المعلومة الغلط ،انه مش شرط ان الفترة تطول عشان نعرف انه تخلي لا خالص حقول في الاخر ازاي تعرفي انه تخلي .
المهم النوع دة من الصمت مش بيتطلب طاقة كبيرة من النرجسي لكن بيدي له منك وقود متنوع يعني وقود فكري ازاي انه بيكون متخيل شكلك وقلقك وغيظك منه وانك مش عارفة هو فين وهو عارف انك بتقلقي عليه وعارف انك حتتغاظي من حركة الاختفاء المفاجيء او انه عند اهله وتلاقيه يحط لك بوستات ع الفيس تبين انه عايش حياته ومبسوط ومعندوش مشاكل او يلقح عليكي بالكلام ، المهم هو عشان حافظك بياخد وقود من مجرد توقعه لحالتك ، النوع التاني بياخده من محاولاتك المستميتة في الوصول له سواء عن طريق الرسايل او الاتصال او تقفي ع الباب تحايليه انه يفتح وتعتذري وتصالحي ،والنوع الثالث بياخده في حالة انه خرج من البيت ودة بياخده من الناس اللي هو عايش معاهم سواء اهله او مصدر جديد للوقود.
طيب ازاي تعرفي اذا اللي حاصل دة صمت عقابي ولا تخلي؟ اذا النرجسي لسة بياخد منك وقود وخدمة وعلاقة حميمة يبقى انتي في صمت عقابي ، اما اذا امتنع عن كل دة وممكن يزيد عليه نوكونتاكت وممكن لا لانه ممكن يتواصل بشكل رسمي جدا يعني كلام في حدود المصلحة اللي هو عايزة فلوس خدي فلوس بس ، لكن مش بياخد منك أي حاجة من الثلاثة وقود وخدمة وعلاقة فدة حتما تخلي مش صمت ، اما اذا بياخد أي واحدة منهم فهو صمت مش تخلي .طيب بعد التخلي دة سواء خرج من البيت او لا هل ممكن يرجع يعمل هوفرينج تاني؟ وهل ممكن يرجع يعيش معاكي أصلا وترجع الحياة زي ماكانت؟ طيب هو أصلا ليه بيعمل التخلي دة او امتى بيحصل انه يعمله وايه أسبابه ؟ وامتى بيكون تخلي نهائي وامتى بيكون مش نهائي ؟ دة ان شاء الله حنقوله في الحلقة الجاية