جمل نرجسية فاضحة
(يا انتي تنكسري يا انا انكسر واقبل بالامر الواقع )
لما النرجسي ف نص الكلام يقولى احنا دلوقتى الوضع بينا يا انتى تنكسرى يا انا اللى انكسر واقبل بالأمر الواقع
دا معناه ايه بالظبط
لانى لما سألته تقصد ايه غير الموضوع ومتكلمش تانى
بس مستغل الفرصه انى تعبانه الفتره دى ونازل نكد وقرف بس انا اوقات بتجاهله واوقات بقوله حقيقته ف وشه انه قاصد يعمل نكد عشان انا تعبانه وأنه بيفرح بدا ، بس شغال تحقير واستفزاز طول الوقت وانا بتجاهله وفجأه بصيت ف عينه وقولتله اد كدا أنت متغاظ منى وانا ببتسم اتخض من رد فعلى وقالى لا دا انا بهزر معاكى
شوفي احنا اتفقنا قبل كدة ان النرجسي او أي مضطرب بيقول حاجات من أعماق اعماقه في بعض الأوقات بدون مايحس بيقول كلام محبوس فس اللاواعي عامل له ارق وقلق وبيعتمل بداخله ،يعني بيغلي جواه وبيتقلب جواه وعايز ينفذه وعاجز عن تنفيذه أحيانا او خايف يفشل في تنفيذه او انه خايف من رد فعلك لما ييجي ينفذه ، فبتلاقيه فجأة يقوله من غير مايحس ، وقلنا كمان انه دايما وهو في اول معرفته بيكي بيقول لك المنهج اللي حيمشي بيه معاكي بدون ماانتي تاخدي بالك ابدا يعني مثلا واحدة نزلت في الجروب وبتقول ان خطيبها بيقول لها دة انا هموتك من الضرب قالت له ليه قال لها هو انا مزاجي كدة حتجوزك واعذبك واخليكي اتعس انسانة في الحياة وانكد عليكي واحرق في دمك واصحيكي الصبح بعلقة كدة تبقي مش عارفة أصلا هو انتي بتضربي ليه وساعتها حتكوني لبستي خلاص وبعدين اخر جملة :انا قولت بس اطمنك شوية زيادة عشان تعرفي تاخدي قرارك ، الضرب دة حيبقى أسلوب حياتنا ، وفجأة بعد كل دة انا بحبك اوي يا ..... فلانة انا بجد بحبك ،تخيلوا ان دة حوار بين واحد وخطيبته انا قلت لكم الكلام بالحرف هي نزلت صورة من المحادثة اللي دارت بينهم في الجروب ، وانا نقلت لكم الكلام زي ماهو، انا عارفة ان فيه منكم ناس كتير سمعت كلام زي دة وهي مخطوبة وطبعا لو تسائلتي ايه اللي انت بتقوله دة حيقول لك ايه بهزر ولكن نفذه بالحرف الواحد بعد مالبستي ، كل دة انا بقوله ليه عشان افهمك ان النرجسي ربنا بينطقه باللي جواه عشان يحذرك والبنت اللي نشرت البوست دي انا بوجه لها الكلام هي واللي زيها اوعي تكملي معاه لان ربنا حيحاسبك عشان انتي فاهماه وعارفة انه غير سوي وربنا بعت لك انذار وانا رديت عليكي وانتي بعد كل دة تروحي للنار برجلك حتتحاسبي على نفسك وعمرك وصحتك اللي بترميهم في النار ، اما بالنسبة للاخت اللي بيقول لها يا انتي تنكسري يا انا انكسر فدة كمان حقيقة بتعتمل جواه وبتغلي ومش عارف يوديها فين بالظبط زي ماقلنا ع الاسقاط فاكرين لما قلنا ان الاسقاط دة بيكون اعزكم الله عامل زي شيء في المعدة قلبها فجأة فالانسان بدون ارادته بيخرج اللي في معدته هو دة اللي بيحصل بالظبط لما النرجسي بيقول كدة ساعات جمل ملهاش أي مناسبة لكن لها معاني مرعبة . فانتي بعد ماقويتي وبدأتي تتعافي هو شايف انك حتبقي اقوى منه ولو بقيتي اقوى منه فهو حينكسر فهو بشكل لا ارادي كأنه جاي يقول لك انا يا قاتل يامقتول ، او والنبي ماتكسريني ، دة بيتوقف على نوع النرجسي اذا ظاهر خبيث يبقى عايز يقول انا ياقاتل يامقتول اما لو نرجسي خف ضحية يبقى بيقصد والنبي ماتكسريني وفي الحالتين احنا مش عايزين نكسره ومايخصناش نكسره ربنا هو اللي بيكسر احنا اللي يخصنا اننا نقوى وماننكسرش ابدا ، ركزي معايا بقى في الحتة دي عشان دي مهمة جدا ، احنا قلنا قبل كدة في فيديو علاج النرجسي ان النرجسي قناعته ان أي علاقة بين اتنين لازم يكون واحد قوي والتاني ضعيف ومن هنا جه اعتقاده انه يا يكسرك ياهو ينكسر لان لازم يكون واحد اقوى من التاني الشطارة بقى هنا لو انتي ناوية او مضطرة تكملي معاه انك توصلي له انك مش اقوى منه ولا اضعف منه وانتي فعلا عملتي كدة من غير ماتاخدي بالك اول مرة لما سألتيه تقصد ايه وتاني مرة لما بصيتي في عنيه وماخفتيش وفي نفس الوقت مبتسمة ووجهتي له كلام مباشر بدون خوف وبدون إساءة ودة معناه ان انتي مساوية له في القوة لا انتي اقوى ولا انتي اضعف .ودي اهم حاجة لو عرفتي توزنيها مع النرجسي اثناء التجاهل او الحجر الرمادي مش حيسيبك ولا يدور على مصدر جديد وممكن جدا يحصل معاه تعديل سلوك كمان ، بس مطلوب منك تعامليه بفتات الخبز في المرحلة الاولانية عشان تهديه وتطمنيه انك مش حتكوني اقوى منه وهو مش حينكسر مش لازم واحد فينا ينكسر ابدا